I am Yuki Lam ~

冰之驕女●二月篇

2012-02-12T23:15:00.000+08:00

冰之驕女好耐無同大家見面喇～對上一次已經差不多兩個月喇～

呢段時間，Yuki既溜冰技術呢…

某Ｄ動作有進步，例如單腳轉圈～宜家轉到兩圈架～

但係飛機呢，就…無甚進步！隻後腳都係舉唔高～

上堂依然係四圍走，古靈精怪依舊～哈哈～

不過每個星期上完堂都肯留低係度再溜多半個鐘，雖然果半個鐘唔係好努力咁練習返Ｄ動作，但係睇見佢悠然自得咁溜圈，ＯＫ喇～

想知Yuki黎緊既溜冰進度如何，請繼續留意冰之驕女不日上映～

見識壽臣山

2012-02-11T23:10:00.000+08:00

壽臣山，位於香港仔海洋公園旁邊的高尚住宅區～ Yuki自小去海洋公園搭纜車時，Daddy Mommy就會同Yuki講話好鍾意下面見到Ｄ屋呀，有自己既泳池架～然後Yuki就會好肯定咁話：「好丫！我第日大個買俾你地住丫！」（真孝順！）

今日終於有機會入去見識一下壽臣山既屋入面到底係點既呢？

呢度係Daddy Mommy以前共事過既公司舊同事屋企～每年農曆新年一班同期舊同事都會盡量相約出黎見見面，食個飯～今年更有呢個機會造訪呢個位於壽臣山既屋企～

呢度雖然無私家泳池，但係都有個好大既廳、好大既廚房、每間睡房都有套房～

真係好估唔到，呢個無小朋友住既屋，居然有咁多玩具同啱小朋友既書～

好似Yuki睇緊呢本pop-up書，有個立體紫禁城架～

其實除左呢本，仲有好多其他既立體書呀～有講香港交通工具，有關於居住環境歷史，有街頭小食～

立體書以外，又有好多袖珍迷你玩具～好似呢套迷你飛機餐～全套其實有８盒，每盒代表一間航空公司～

近睇之下就會發覺呢Ｄ玩具像真度甚高～杯裏面既飲品、筷子套同入面既筷子、餐盤、食具，每一樣都好細緻～

其中一個士多房，裏面仲有好多玩具架～ Mommy話第日去海洋公園的話就順道過黎探下叔叔同姨姨佢地喇～

幾個小朋友，由當年全部未出世，到宜家最大果個都中二（中三果個無黎）同三個細Ｄ既五歲半(Yuki)、四歲半、三歲～希望黎緊我地都可以起碼每年見一次喇～

多謝咁多位叔叔同姨姨們今日派俾Yuki既利是呀～

格仔餅開檔喇～

2012-02-05T23:31:00.000+08:00

話說Daddy呢排鍾情意式飽Panini式食法～於是，四出搜尋有乜方法可以自己喺屋企整到果種grill既效果呢？

終於搵到有部機可能都幾似樣喎～呢部機除左做Panini，仲可以做飛碟三文治，同埋格仔餅添喎～

忽然呢篇咁似開箱文既？哈哈！

Kenwood小型電器，都用唔少，Daddy既磨咖啡豆機就係Kenwood，用左十幾年架喇～

趁下奏有少少時間，先試下整其中一樣先！換好格仔餅呢套夾板，準備就緒～

Mommy兩下手勢就開好左個蛋漿～

第一次整，好興奮～倒到咁樣啱唔啱呢？

見唔見到盞紅燈呀？到盞綠燈都著就食得，大約等五至十分鐘喇～

登～登～睇落都幾ＯＫ喎～

呢份係Yuki既Strawberry Ice-cream格仔餅～

Yuki從此可以喺屋企都有格仔餅食喇～

新春遊海洋公園

2012-02-04T23:43:00.000+08:00

趁正月十五未過，之前已經應承左Yuki會去一次海洋公園架喇～

一入門口剛剛見到舞金龍呀～

恭喜～恭喜～ Yuki喺度再一次祝大家龍年進步！心想事成！

財神爺呀～從佢手上接過金元寶、今年全家富貴又榮華～

後面果架就係年初一代表海洋公園參加花車巡遊既花車喇～企鵝們都玩新既過山車喎～

今年仲剛剛係海洋公園35週年紀念～好大個壽包同佢祝壽呀～

今日天氣回暖返啲，幾舒服～又過左農曆新年黃金檔假～人少少地，好多野都唔需要點排隊呀～

高峰樂園有個新既加油站賣雪糕～價錢OK喎～個軟雪糕十二蚊，有全年証九折，即係$10.8得喇～

Yuki第一次擺呢Ｄ招積pose，大家覺得點呢？

天星碼頭鐘樓重現海洋公園？點會咁既？

原來海洋公園又有新項目～纜車站附近將會開呢個香港老大街～

裏面仲會有Ｄ小食檔，留意住３月揭幕呀～

玩小火車～今次Yuki主動同Daddy Mommy話要自己坐一架了～概然係咁，Daddy Mommy索性唔坐等Yuki喇～

打過鼓～ Yuki祝願大家心想事成～

香港鐵路博物館

2012-01-29T22:15:00.000+08:00

終於到左呢個悠長農曆新年假期既最後一日喇～

呢日更加唔可以浪費既～個天濛查查，有乜地方好去呢?

有！有個地方Yuki仲未去過既～就係呢個位於大埔既鐵路博物館嘞～

呢個鐵路博物館其實係以前大埔墟火車站既原址～由1913年服務市民直至1983年電氣化火車及新既大埔墟火車站投入服務～

下面呢幅歷史照片可以睇到當年大埔墟站開通時有英國人主持儀式～

呢個鐵路博物館唔收入場費架～所以都吸引唔少人入黎影相～

我地今日都見到兩對新人影婚紗相～

喺呢度既必影位：火車軌～

51號柴油火車頭～ 1955年開始投入服務～服務28年直至1983年電氣化～

辛苦哂喇，51號車～

唔該Yuki幫Daddy Mommy影左張合照喎～

咦～ Yuki你買火車飛去邊呀?

Yuki打算要往外闖蕩一下～一臉離愁的模樣～

再見喇～得閒要寫信返黎呀～自己要保重呀！

嘩～原來Yuki咁捨得，居然買左頭等卡！

如果無錢買飛可以點呢? 不如哩埋係車底?

哩哩下居然發覺原來有Ｄ火車居然係火車強國日本製造架～好似呢架車輪旁個牌就寫住由日本大阪既「近畿車輌」於1974年製造～原來間公司宜家仲有架～

參觀完鐵路博物館～順道喺大埔墟附近行下～附近傳來舞獅鑼鼓聲～原來有舞獅幫Ｄ商戶拜年呀～

有Ｄ咁生猛既獅拜過年～相信呢Ｄ舖頭今年一定生意興隆既～

最後一定要介紹間好野俾大家～事先無做過資料搜集，但係見到門口排哂長龍，跟住排都無乜衰～呢間就係亞婆豆腐花～冷熱均一價６蚊一碗～

一個字：滑！唔係，應該兩個字：超滑！連Yuki唔多食到熱野既追住Mommy係咁要，可想而知～大家有機會經過都不妨試下喇～

農場生活體驗～

2012-01-27T23:12:00.000+08:00

終於等到呢個長D既新年假期，可以帶Yuki一齊去體驗下農場既生活～

多得May姨姨既介紹，我地嚟到呢個位於坪輋既有機農場～

首先有Yuki既favorite－士多啤梨～

Ｄ士多啤梨好靚下架～好紅好大粒～

Yuki同Mommy都有幾多收獲喎～

唔係呃你地～真係好多都又大又紅架～仲要係有機士多啤梨播～

跟住呢Ｄ生喺地下既係乜野蔬菜呢？（貼士：呢排新年大家應該食好多佢既製品架）

影多個close-up～認得未？要好用力，加少少技巧先攞到出黎架～

無錯嘞！就係白蘿蔔囉～大家今年食左幾多底蘿蔔糕呢？

跟住呢樣如果有煮開飯既朋友可能知道係乜野～呢Ｄ就係合掌瓜喇～

嫲嫲都成日煮合掌瓜俾Yuki食架～所以Yuki都認得喎～

嘩！一片充滿生命力既生菜田呀～

睇見都哂流口水呀～

除左白蘿蔔之外，仲有紅蘿蔔添～掘幾個返去俾嫲嫲煲湯喇～

那邊廂又有一片蕃薯田～ Yuki又好認真咁拎起泥耙掘蕃薯～

呢邊又有好多未收割得既椰菜喎～下次黎可能啱食喇～

大家睇睇Yuki喺農場幾開心～

農場既婆婆仲好好咁請我地飲茶同食全盒既糖果～啱哂Yuki喇～

總結今日既收獲～

有紅蘿蔔、生菜、合掌瓜、白蘿蔔、魚翅瓜、士多啤梨～

Yuki似唔似一個幫手賣菜的女孩呢？

細心地將士多啤梨放入透明盒～是日體驗完滿結束～

希望Yuki經過今日既體驗，會知道農夫種每一樣野都好辛苦～以後有乜野菜都會食，同埋唔好食剩野喇～

高球初試

2012-01-26T23:56:00.001+08:00

好耐之前已經幫Yuki準備好一枝小童用既高球7號鐵桿～奈何拖下又拖下，原來枝桿已經買左成年幾兩年喇～但係到宜家都仲未用喎～

趁呢個農曆新年假期，立定決心～出發去練波！

嚟到位於將軍澳既Island golf～以前佢喺西灣河近好多架～ Daddy差不多每個星期都會去～

另一個要儘快去打既原因就係枝桿再唔用就會唔啱Yuki用架喇～

好嘞～踏上發球道，放好粒波～

然後眼望目標，睇準落點～

慢慢開始向後上揮桿…

然後重心由右腳移向左腳～向下揮桿放鬆地打出去～

完成動作～上半身面向目標～ Good!

咦？！粒波去咗邊呢？望下先～

好嘢～打得好遠呀！

龍年目標：多啲同Yuki去driving range打波！

赤口街上遇老友

2012-01-25T23:24:00.000+08:00

今日Daddy Mommy帶Yuki行街行行下～迎面見到兩個熟悉既小朋友面孔～

原來係Yuki既好好好朋友－Hillary同埋佢妹妹呀～

好朋友真係會好到唔使約都可以係街撞到架～

話說Yuki同Hillary由K1已經開始同班～但係佢地K1時其實絕不咬弦～兩個經常鬥咀，郁手郁腳～甚至老師家長日都會同Daddy Mommy反映～但係呢！唔知點解，到左K2開始，兩個小朋友既關係居然可以180度轉變～老師話返俾Daddy Mommy聽都覺得好神奇！

宜家佢地兩個直頭係糖黐豆～老師由K1時要分開佢地，因為怕佢地會不斷爭執～到宜家K3都係要盡量分開佢地，不過宜家係因為兩個太friend，成日掛住傾計～希望佢地黎緊升上小學後即使各散東西都可以保持呢段友誼喇～

難得撞到咁啱～一於一齊去個小朋友版high tea喇～

小朋友版high tea就係去食甜品喇～

小朋友們食士多啤梨甜品，Daddy Mommy食呢個香蕉甜品喇～

放埋呢個星期淨返呢幾日假，佢地又可以返學校見面喇～

恭喜發財～龍年進步～

2012-01-23T18:24:00.001+08:00

大年初一！我地又同大家拜年喇～

恭祝大家龍威虎猛～

行運一條龍～

小朋友既就學業猛進，快高長大，聽教聽話～

大朋友既就步步高陞，財源廣進，心想事成～

Yuki亦好乖咁同Daddy Mommy拜左年，財源廣進了！

希望今年世界太太平平、大家和和氣氣～恭喜！

處處皆現春節氣氛

2012-01-22T18:56:00.001+08:00

如果大家無時間去下面呢幾個商場感受新年氣氛的話，等Yuki帶大家走走喇～

時代廣場

唔知你地睇唔睇得出Yuki做緊乜野呢?

太古城中心

MegaBox

康怡廣場

台灣姨姨歲晚一聚

2012-01-21T23:19:00.000+08:00

呢兩日又有機會同奈奈阿姨和ＣＰＵ阿姨一齊「逛街」喇～

佢地剛剛黎香港兩三日有野做～ Mommy佢地當然會盡地主之誼喇～

呢兩日我地有同佢地去行左維園既年宵花市，雖然好迫，好彩佢地都有Ｄ收獲～

第二日又一齊去左幾度地方shopping，同佢地一齊shopping真係好開心架～

好喇～估到呢度係邊度嘛？我地已經送佢地到左香港機鐵站喇～

奈奈阿姨、ＣＰＵ阿姨～希望很快可以到台灣探望你們，還有虎虎呀～掰掰！

準備過年食品

2012-01-20T18:22:00.000+08:00

隨著Yuki逐漸長大，佢喺嫲嫲屋企亦漸漸識得幫多Ｄ手喇～

Daddy Mommy都想Yuki對於傳統習俗同食品多多學習～

今堂就係學整煎堆嘞～

以前Daddy細個既時候都會幫手架～以前我地整果Ｄ係長條型既～

今年Yuki搞下新意思－整左圓型既煎堆～唔！呢Ｄ可以叫做一口煎堆呀～

祝大家煎堆碌碌、金銀滿屋～

準備屋企迎新春

2012-01-15T23:24:00.001+08:00

今年既農曆新年同聖誕節好近，話咁快就要為農曆新年準備佈置屋企喇～

新春佈置物品大哂冷～

今年同Yuki去買左Ｄ新野～呢Ｄ靜電貼質地既揮春比舊果Ｄ更加薄～貼出黎效果應該唔錯～

Yuki幫手剪開個包裝袋先～

嘩～Ｄ靜電貼痴得好實呀，搣唔開喎～ Yuki好專心地剪呀剪～

大家知唔知靜電貼既好處係乜丫？

好處就係無限次黏貼，咁就可以俾Yuki發揮佢既創意鍾意點貼都得～

小朋友對於呢Ｄ傳統節日，總有一點莫名既興奮～

Yuki早兩個禮拜已經講話要佈置新年架喇～

除左客廳既大窗之外，入門口呢面鏡當然都要裝飾一下，用黎歡迎新年黎既朋友嘛～

加埋五歲半既Yuki歡迎大家～

飯廳旁滿佈相片的一角～

完成！雖然今日外面天雨濛濛，不過無損我地為迎接新年既喜悅～

Yuki為大家展示佢今年既創作～

當然唔少得呢張今年既新春特別版揮春喇～記唔記得呀？係上個星期「自然玩，自由玩」既「笑口常開」揮春呀～

其實今年除左有新既靜電貼揮春，仲有買其他新野架～下面呢個學業進步Hello Kitty裝飾都係今年新買架～

仲有一個星期就農曆新年喇～希望大家都快快樂樂、開開心心迎接龍年喇～

Mommy~ 生日快樂～

2012-01-10T23:35:00.000+08:00

終於等到Mommy生日喇～今年繼續選擇西餐～既然又係weekday，都係搵近近地架喇～

生日禮物早一兩個禮拜已經諗左～ Yuki今年好叻地真係保守到秘密無洩漏俾Mommy知道送乜野禮物俾佢～

登登～ Mommy鍾意嘛?

是夜菜式：白酒煮藍青口

其實Ｄ酒已經揮發哂，所以Yuki都有食～仲。。。愈食愈多～

然後主菜到～影呀影！忽然：「唔好意思，呢碟唔係你地架～」

原來頭先果份係隔望枱既安格斯～跟住呢碟先係我地既和牛～

然後有北海道帶子黑松露意大利飯～之不過食落似炒飯多Ｄ～但其實都好好食～ Yuki食到最後一粒飯都食埋～

最後係送俾Mommy既Happy Birthday版心太軟～

Mommy! 祝你生日快樂～

Yuki與Daddy祝你：青春常駐～愈黎愈靚～ Happy Birthday, Mommy!

臨走Daddy終於有得上鏡喇～ (由Yuki操刀既, thank you!)

自然玩、自由玩 (下)

2012-01-08T23:50:00.000+08:00

好喇～食過自備午餐可以準備開始下午既環節喇～

趁呢個空檔時間俾大家睇睇導師們要帶幾多工具同物資去俾我地～辛苦哂佢地呀～

《移形換影換支竹》

呢個遊戲可以訓練小朋友既協調性～一齊數一二三，然後一齊放手同行前一步捉住前面個人放手果支竹～

玩幾次掌握到喇～愈玩愈開心添～

《無字天書?》

以前既武俠小說成日都有話無字天書～今日小朋友就有機會親手畫喇～原來係要用檸檬汁黎寫係張薄既紙上面～

寫好後就要放係火上面，用Ｄ熱力烘一陣就會出現我地所畫既野架喇～

《十字架懷舊玩意》

用兩枝樹枝紮成十字～然後用麻繩繞成線圈綁住個十字架～咁就可以嘗試拋個圈然後用個十字架穿住個線圈勒～

《手繪飛碟》

最後一樣作品係自己做一隻飛碟～小朋友自己可以畫任何鍾意既圖案～

玩完哂呢堆項目之後，跟住導師哥哥叫左大家過去隔離既大斜坡話有野玩喎～

過到去第一樣見到既有呢堆好好心機砌成既流水裝置～

由最上面果條竹筒倒Ｄ水落去，就會見到Ｄ水逐支竹筒咁流落最下面既一個盆～

另一樣遊戲就係用麻包袋滑斜坡～先係Mommy拉Yuki玩幾次先～

然後… 掉轉！變成Yuki拉Mommy呀！

導師哥哥跟住話到最後階段喇～問邊個小朋友無預備多套衫既就可以避開少少喇～

Yuki其實係無帶多套衫既～但係Mommy見佢好似好想玩咁喎～咁樣…玩左先算喇～

睇下呢段就知點解會要準備多套衫架喇~

但係睇下Yuki笑得幾開心～

最最最後一樣遊戲～水戰呀！

係海灘或者泳池玩水戰就多～係郊野公園冬天玩水戰真係第一次～

Yuki好乖地最後倒數十秒既時候就開始行返上去然後準時放低個噴水壼～

全日既節目告一段落喇～影埋大合照～橙色衫係導師哥哥姐姐～綠色衫既係義工哥哥姐姐～多謝你地呀～

大自然～真係要自然玩、自由玩架～ Bye Bye!

自然玩、自由玩 (上)

2012-01-08T22:43:00.001+08:00

星期日去左一個全新體驗～要多謝Daddy既同事May姨姨既好介紹呀～

呢個活動係一個叫智樂兒童遊樂協會既非牟利團體所舉辦～佢既活動唔收參加者任何費用，佢地主要靠其他機構既贊助黎營運～佢地既宗旨係希望小朋友從玩耍中學習，啟發～

我地今次報名參加既係體驗版～目的令小朋友知道原來我地身邊既大自然都有好多野可以玩架～呢個世界唔係袛有遊戲機既～

交通方面安排好哂～我地袛需要去集合地點（油塘站）就有旅遊巴士接送我地去目的地－－清水灣郊野公園～ Yuki都係第一次黎架咋～

因為導師哥哥係車度已經同大家玩下遊戲、估下IQ題，所以小朋友們去到已經warm-up哂～

《自製百寶袋》

成日咁多活動，有好多工具要用～先要每個小朋友自己諗辦法將一條繩同一個公文袋做一個百寶袋可以揹著佢～

呢個就係Yuki自己決定要點整既百寶袋喇～

《古代暗器》

第一樣做既係將一張紙卷成筒狀，然後執Ｄ松子，或者將樹葉卷成雪糕筒狀～跟住塞入去個筒度～

由尾用力一吹～ Mommy接住～

然後大家收集更多既葉、樹枝、草、松子～用黎做乜呢？

《大自然揮春》

下一樣制作就係用呢Ｄ大自然物件發揮創意做一張揮春出黎～ Yuki一諗就話要做「笑口常開」～（笑口常開係Yuki今年聖誕表演項目既名）好喇！咁我地諗下點樣表現個笑口常開喇～

睇唔睇得出呢個係「笑口常開」呢？

朋友仔豆豆就做左個吉字揮春～今年屋企會多一張特別版揮春喇～

《放大鏡體驗》

小朋友未需要用放大鏡睇報紙～咁放大鏡，加戶外，加太陽伯伯～有咩玩呢？

無錯～就係體驗放大鏡點樣集中太陽既光線～

聚到變成一點，過幾秒就有煙出架喇～（家長指引：記住叫小朋友千萬唔可以係屋企玩呢樣野）

《蟲蟲屋》

導師哥哥教大家要好好愛護所有生物～所以就算係我地捉左既幾隻小昆蟲，小朋友都要用樹葉，石頭，草，幫佢地起間蟲蟲屋，跟住放佢入去住囉～

左後方有大樹葉果間係屋～右前方有細石頭同花果個係花園～

《蕃茄蛋新煮意》

上午最後一個項目係同整野食有關，咁整完就可以食埋佢～

蕃茄蛋大家都食過～咁有無食過原隻蕃茄既「蕃茄蛋」丫？

先將個蕃茄切頂，挖空中間既肉～

然後打一隻新鮮雞蛋入去～搞拌，搞拌～可以隨意加少許磨菇碎～

最後用牙簽拮番個頂就可以放上錫紙兜開始慢燒～

燒到收乾水就可以揭開落少少鹽就食得架喇～好健康，零食油～

跟住自由食野時間，大家拎自己一早準備好既午餐食物出黎～我地就做左三文治，Kathy姨姨整左鹵水雞亦同大腸，仲有Cheery姨姨佢地既燒烤食品～

由於實在太多節目～下午部份下一篇再繼續～

Happy New Year 2012

2012-01-01T14:20:00.001+08:00

Yuki第一次得到Daddy Mommy既許可，唔使瞓覺住，可以一齊等到１２點倒數迎接２０１２～

不過我地袛係於屋企倒數，所以著哂睡衣，不適宜上鏡～哈哈！

仲有成兩三個鐘前Yuki就已經好興奮咁練習倒數：「5..4..3..2..1 開幕！」

「開幕！？」 Yuki! 唔係講開幕架～係「Happy New Year」呀～

睇下電視，玩下Ｄ聖誕禮物～好快就到１２點喇～

10..9..8..7..6..5..4..3..2..1! Happy New Year!

Yuki同Daddy Mommy希望大家進入新既一年～開開心心～健健康康～呢個世界唔好再咁多天災人禍喇～

Wish every one who supported Yuki’s blog a Happy and Great New Year in 2012 with their loved ones!

大除夕 ● 遊公園

2011-12-31T23:20:00.000+08:00

今年大除夕剛好遇著星期六，所以有得去街喇～

２０１１年既最後一日，我地選擇約個朋友仔去下公園喇～

朋友仔未到，Yuki先影下相先喇～呢個水池位應該係香港公園曝光率最高既位置，一家大細既影、結婚既又影、畢業既都影、家傭姐姐們梗係影喇～

Arthur到喇～ Yuki等埋Arthur黎到先可以入去水入面影架咋～大家睇Yuki笑到見牙唔見眼就知佢幾開心喇～ Arthur～你又望緊乜野呢？

聖誕剛過，仲有Ｄ聖誕裝飾，Yuki拎埋聖誕收到既糖出黎派俾Arthur同Lilian姨姨呀～

Yuki你咁開心～Ｄ糖派哂未呀？

我地今日去香港公園既主要目的其實係去遊樂場玩呀～

玩左一陣之後，見到有兩個姐姐吹緊bubble喎～ Yuki睇左一陣愈行愈埋～

繼而開始追波玩添～玩多幾玩…

果兩個姐姐好乖呀～居然兩樽都借哂俾Yuki同Arthur吹呀～

同朋友仔有遊樂場玩～一眨眼就個幾鐘～開始日落喇～

等我地用呢個２０１１年最後一個日落就為今年既結尾喇～

各位２０１２年再見！

Boxing day with lot of Princess

2011-12-26T13:02:00.000+08:00

多謝每一位有送禮物或利是俾Yuki既親戚朋友～

一如以往，Yuki必須忍住將所有禮物留待今日Boxing day先可以拆架～今朝一瞓醒第一樣做既當然係拆禮物喇～

隨著Yuki愈黎愈大個，禮物亦逐漸「公主化」～哈哈！大家都好明白Yuki呢！

廿七年來最凍聖誕節

2011-12-25T23:52:00.000+08:00

尋晚係屋企點起聖誕爉燭～平平安安咁迎接呢個廿七年來最凍既聖誕節～ Yuki唔知係咪諗住可能見到聖誕老人太興奮，居然成１２點幾都未瞓著喎～過左唔知幾耐… Zzz…

瞓醒起身～已經成十點～過左最凍既清晨10.3度～

Yuki非常開心地從聖誕襪收到聖誕老人送俾佢既禮物～ Thank you, Santa!

搞下東，搞下西～過左下午大半奏先出發～

第一站：中環繽紛冬日節～

今年中環呢度多左一樣好特別既玩意～排住隊先，一陣再同大家介紹～如果大家想玩，其實袛要捐出５０蚊予慈善團體就有得玩架喇～

係喇！無睇錯～我地唔係去左海洋公園或者迪士尼樂園～呢度係中環～呢隻旋轉木馬係由Tiffany & Co所贊助既～

可以係中環鬧市呢個皇后像廣場坐旋轉木馬，扺喇～

剛剛有一班姐姐唱聖誕詩歌～

Yuki祝大家聖誕快樂～

假日既中環，有行人專用區～無車行既馬路，我地鍾意點影相都得～嘻嘻～

哎～哎～哎～ Yuki…! Daddy話點擺姿勢都得～唔係咁呀！救命呀！

影完中環，再往下一站：尖沙咀～

慶幸行走於中環同尖沙咀既渡海小輪依然行走著～因為渡海小輪已經逐漸愈黎愈少～雖然中環碼頭宜家搬得好遠～但係Daddy久不久就想搭下船過海，希望Yuki會識得珍惜身邊呢Ｄ雖然舊但係好有價值既事物啦～

「Yuki，你會嗎？」

袛有渡海小輪先可以俾我地咁容易地欣賞到咁靚既維港風景啊～

到左尖沙咀，尚未天黑～去1881趁下熱鬧喇～

人太多～好多人排隊埋去影馬車～我地都係離遠影吧～

Yuki今年識得講話要食聖誕大餐喎～無預約下～我地想試下自己既運氣～由麼地道逐間行，逐間問，無一間有得walk-in~ 行到黎帝苑酒店，都本著應該又係無既心情上三樓～居然。。。居然。。。有位呀！

Thank you Santa for your blessing and listening to Yuki’s wish!

Yuki拎著酒店既Santa送俾佢既X’mas gift~ looks so happy~

仲有第二樣lucky事件～因為我地walk-in，食少45分鐘，其實都仲有個半鐘俾我地食～佢地居然收我地八折咋～

Merry X’mas! 食完聖誕大餐露出得戚表情的Yuki～

行過兩步去百週年紀念公園，諗住玩埋今年另一特別節目－室外溜冰場～可惜，真係無得咁完美既～今晚由八點到半夜關門既每一場都滿哂喇～ Yuki帶住一臉失落，好不情願地離開尖東返屋企了～

希望一月頭完結前有機會同Yuki黎滑一次喇～

Yuki返到屋企淨係記得熱切期待聽朝起身既boxing day－拆禮物呀～

X’mas party @ Daddy’s office 2011

2011-12-23T23:41:00.000+08:00

又到Daddy公司一年一度既X’mas party! 可以俾小朋友去公司睇下D daddy mommy返工既地方～

Daddy一早就應承Yuki今年再俾佢黎聖誕party架喇～

派對一開始就有兩個小丑哥哥扭吹氣波波同埋表演雜耍～

玩左一陣，忽然傳來一陣鐘聲喎～紅卜卜既衫同帽～係聖誕老人呀～

聖誕老人你今年既眼鏡唔同左既？！（Yuki真係認得架喎！）

咪理咁多聖誕老人由北極咁遠黎到～同聖誕老人影返幅相先喇～ Merry Christmas!

同聖誕老人影完相，再加埋一輪抽獎之後，有得食喇～ Yuki你呢個樣係開心定唔開心呢?

食飽之後玩得喇～今年大熱既Angry birds! 公司送每個小朋友既禮物袋都有呢個摩天輪～

見返Ｄ成年無見既朋友仔，袛需小小時間就warm up返哂～玩到成條街都聽到佢地把聲～希望無嘈到Ｄ同事們喇～希望快Ｄ到下年再玩過喇～

呢Ｄ係今年所收到既禮物～好開心呢～

同一眾小朋友仔哥哥姐姐叔叔姨姨拜拜之後，Mommy又無得早放，唯有同Daddy兩個周圍玩下先喇～

太古城出面既公園原來換左Ｄ新既設施喎～ Yuki真係玩到樂而忘返呀～

Daddy覺得呢個鞦韆過癮Ｄ，成個過山車咁～

希望大家都過一個愉快既聖誕～期待下年既X’mas party!

幼稚園生活最後一次聖誕表演

2011-12-15T23:55:00.000+08:00

來到幼稚園的最後一年是K3的大姐姐了～

之前幾日一直擔心，因為由星期一開始Yuki就病左，幾日都有咳同少少燒返唔到學，都唔知表演當日好得返未～

好彩～到星期三終於都退熱喇～黎到星期四，Daddy同Mommy都請左假睇Yuki佢地既表演～

今年佢地表演既服飾好靚架～係一條鮮紅色既吊帶裙～係老師托某位家長幫忙去九龍搵左好耐先搵到架～

Yuki班所表演既曲目叫「笑口常開」，希望大家日日都開開心心～

今次所跳既舞的確比起之前果幾年所跳既難度再高一點～好多手、腳、全身既動作～

之前幾個星期Daddy Mommy都會叫Yuki係屋企表演一下，都似模似樣架～如果叫Daddy Mommy做返呢Ｄ動作實跟唔到呀～

表演既時候Yuki異常認真，完全無留意到Daddy就係佢既右前方呢～不過專心表演係好既～

到最後一段，所有小朋友戴上笑口常開面具，同大家揮手～

到最後謝幕喇～俾大家見下Ｄ男孩子既服飾喇～

Yuki,你地表演得好好呀～ Well done!

表演後回到課室，換返便服，有聖誕自助餐呀～黎到K3，學校方面希望呢班小朋友要變成大朋友喇～所以唔再係一人一份咁派野食，直情係似自助餐咁出面擺幾張枱放食物，然後小朋友一枱一枱咁出去拎自己鍾意食既野～

睇隻碟就知Yuki鍾意食乜喇：雞翼、芝士腸、炸蝦春卷～

尋佢地食野，Daddy在課室裏面，見到兩幅勞作放在一起～係Yuki同好友Hillary所做既勞作～左邊既係Yuki做既，右邊既係Hillary做既～

跟住Daddy見到一個柜側邊貼左上次Yuki佢地去淺水灣校外上課既相呀～十年後睇返唔知Yuki仲認得幾多個同學仔呢?

會台友★煲仔飯夜

2011-12-11T23:52:00.000+08:00

今日上完溜冰堂即刻出發往中環IFC～因為Mommy約左台灣友人－CPU阿姨同佢既家人～

趁佢地未到，我地又影下聖誕裝飾先喇～

IFC今年既裝飾都幾靚喎～

好大個聖誕老人呀～ Yuki舉高個汽球都係到聖誕老人既下巴咋～

終於見到CPU阿姨佢地喇～ Mommy先同佢地係機鐵站Check-in左Ｄ行李，跟住我地就向半山出發～去邊呢？咪去香港好出名既茶餐廳「翠華」囉～好多遊客都慕名而來架～

上次CPU阿姨同奈奈阿姨黎香港果次BB無一齊黎～今次終於都見到樂虎BB喇～好開心見到你地呀～

食完飯我地再係附近帶大家血拼血拼～約五點幾就要同佢地講拜拜喇～因為我地要出發去食晚飯呀～

夜晚我地又再去食一年一度既煲仔飯喇～今年我地陣容更加鼎盛，約埋伯伯一家呀～所以早一個星期就打去訂位喇～

Yuki展示尋日新買既羽絨褸（扮獅子）～

好喇～有野食喇～先黎一個羊腩煲～

主角出場～炭燒煲仔飯！今次人多Ｄ，我地可以叫多幾款～

白鱔田雞飯～

臘腸排骨飯～

臘腸滑雞飯～（仲有個滑蛋牛肉飯唔記得影添）

水準依然係咁高～飯焦脆卜卜，又唔會太膿～

可以係咁凍既天氣食呢餐煲仔飯，真係好幸福～

冰之驕女－飛機得左喇～

2011-12-11T23:27:00.001+08:00

終於都得喇～經過多時苦練，Yuki終於都做得到似樣既飛機喇～

Daddy, Mommy 連Hei Tung老師都好開心呀～

Toy to the world

2011-12-10T23:54:00.000+08:00

去完Mommy公司既活動，Daddy話不如去影下燈飾喇～咁不如去尖沙咀影反斗奇兵喇～

黎到尖沙咀，雖然時間早早地，但係今日午餐食得早，有Ｄ肚餓播～

Daddy話去試下前排人氣甚高既新拉麵店「一風堂」～

六點都未到，已經要等３０張飛喇～又話少左人既～

下面張相Yuki有少少BB時既樣呀～ Daddy & Mommy都好鍾意呢幅相～

幸運地多得侍應姐姐既安排，等左半個鐘左右就有位，居然仲有張卡位俾我地呀～坐得好舒服呢～

一風堂係一間日本直營既拉麵店～可能因為呢個原因，都幾多日本人黎食架～

我地叫左一碗白丸、一碗赤丸～白丸好味～赤丸真係幾辣～

呢個係叉燒角包～係名物黎架喎，梗係要試喇～

相比起前排去食過既另一間「達磨」，好似「一風堂」好食Ｄ呀～

食飽飽可以開始影燈飾喇～先影下室內呢Ｄ好似Lego既公仔做warm-up～

出到室外，今年既主題係Toy Story，因為Disneyland剛剛開左Toy Story Land嘛～

有一個corner既三眼仔圍起左，原來袛要捐錢入呢個箱俾香港血癌協會就可以舒舒服服咁同下面幾隻三眼仔影架喇～

下送一連串三眼仔連環拍～ Featuring: Yuki, Mommy & Daddy

離開果個區域，即時迫左好多～影邊度最少人？影上天囉～哈囉，彈弓狗～

中段既另一堆三眼仔～ Yuki繼續要影～

遙控車郁喇～恐龍你都一齊望過黎呢邊：Say Cheese!

翠詩呀！翠詩呀！ Yuki扮翠詩咁企，但係學少左個笑容喎～

紅心！你砸住果箱禮物係咩黎架？

Yuki shrink into the Toy Story world~

Look! The crayon is taller than Yuki!

希望黎緊聖誕前可以再影多幾個唔同既燈飾喇～

Mommy公司聖誕兒童遊戲日

2011-12-10T23:27:00.000+08:00

相隔一年無去過Mommy公司舉辦既Children Day～今年終於有得再去喇～

今早又破左今年入冬以來最凍既紀錄～得１１度～不過不減大家既熱情～幾咁多人！

宜家任何俾小朋友玩既遊戲設施都唔少得吹氣遊戲～

小朋友就係有用不完既精力～可以不停咁爬、玩、跳～

玩得咁興奮之際都仲記得要望下Daddy~ 都算Yuki乖喇～

經過多一個星期，Yuki宜家綁鞋帶已經非常熟手啦～

另外呢個新穎Ｄ既係一個吹氣火車頭～新奇又好玩～好難得先影到呢張隔住隻窗仔見到Yuki咋～不過唔記得影成隻火車既外形呀～

因為每樣吹氣遊戲都要排好耐隊，所以我地轉戰攤位遊戲喇～

呢隻雪人係度做乜呢？

係遊戲黎架～有六個乒乓波轆落黎～要用個魚綱接住～

接到幾多個唔緊要，因為最重要係等小朋友玩得開心，點都有禮物架～

臨走再係門口同雪人、聖誕老人影埋相先走喇～

離開八鄉站之前，陽光開始變成夕陽鹹蛋黃～

岩哂影相囉～

離開八鄉出九龍再搵節目～

冰之驕女－綁鞋帶

2011-12-04T23:18:00.001+08:00

對上一次寫冰之驕女已經一個月前喇～

呢一個月到底Yuki有無進步到呢？

唔通眯埋眼都得？睇睇片喇～片尾仲有上完堂玩London Bridge添架～

另外值得記低既一樣野～就係Yuki真真正正掌握到綁鞋帶既方法喇～

連呢對新鞋既鞋帶短短地都應付到～ Well done!

X’mas Family Day - 2nd year

2011-12-03T22:42:00.000+08:00

又到左舅父公司一年一度位於數碼港既聖誕家庭日喇~

雖然今朝起身得十二度好似好凍，但係下奏去到果陣好猛太陽，所以要除外套先得喇～

先排隊俾呢個姨姨幫Yuki化好個妝先～（Yuki全日最定就係呢幾分鐘，哈哈）

呢隻係紫色既蝴蝶黎架～

Mommy陪玩兩層樓高既吹氣滑梯～

好好玩呀～每人可以玩三四次～不過Mommy話行上呢Ｄ軟林林既吹氣樓梯其實都好攰架～

Daddy’s favorite picture of the day!

到左表演姐姐請小朋友上台幫手跳舞既時間喇～

“Can you move it like this?”

“I can shake it like that!”

跟住有加埋Ｄ Daddy Mommy一次跳既YMCA歌呀～

大家估下呢幾個動作係做緊乜野英文字母？

仲有同上年一樣都有既排排隊拉火車－Christmas Conga~

嘩～好多人呀～咁多人排隊做乜呢？

大家其實係排隊同Santa Claus影相同攞禮物呀～

「唔知今年既禮物會係咩呢？」

攞到喇！係用黎做聖誕咭或為生日咭既玩具呀～

今年既吹氣遊戲好似無上年咁吸引，不過Yuki玩Ｄ簡單既都好開心lu~

玩吹氣遊戲指定動作：除鞋，着鞋～除鞋，着鞋～自從買左呢對新既閃閃鞋之後，Yuki綁鞋帶叻左呀～

影個close-up俾大家睇下對靚鞋喇～ Yuki幾乎想瞓覺都着住呀～

接近尾聲，太陽開始下山，即刻涼左好多～

排隊食下Yuki咁大個女第一次食既棉花糖～

睇呢個樣就估到佢覺得好唔好食喇～

再一次多謝二舅父佢地兩年都請埋我地參加呢個咁好玩既party呀～

海洋公園迎聖誕喇

2011-11-26T23:37:00.000+08:00

今個週末無乜特別節目，因此Mommy就約左Lilian姨姨同Arthur一齊去海洋公園喇～

今日唔知做乜野呀～下奏成三點入到海洋公園都仲好多人～

明明Ｄ聖誕裝飾都仲未準備好，但係多人既程度係我地黎咁多次海洋公園最多人既一次～每樣遊戲都要排成四十五分鐘～

我地選擇避開人群，行下自然大揭秘，玩下Lilian姨姨送既新裝Kinder出奇蛋～

條吊橋得我地行，搖下搖下～驚驚呀～

Arthur拖住就唔驚? 仲好開心笑添～

諗住玩下幻彩旋轉馬喇，點知條隊排到落樓梯呀～咁唯有去遊樂場玩下算喇～

威威師令你好嗎？今日好多人探你地呀～

呢隻威威師令就換好聖誕裝添～

行經水瀨池剛剛見到訓練員哥哥餵野佢地食～

原來佢地都好乖架～好似海獅／海豹咁叻呀～

話咁快未六點就黃昏日落喇～

最後行埋新開既高峰樂園新廣場～多左好多樣新野～不過五歲既Yuki一樣都唔玩得，全部要120或130cm以上～

大家如果想睇聖誕裝飾既話，請於12月1日之後再去喇～

好天氣●行山去～

2011-11-20T23:19:00.000+08:00

立冬都過了，才隱約感覺到秋天既天氣～

Mommy與姨姨們約好今日一齊去行下山～

先係附近既地鐵站集合先～

行幾步就到我地今日行山既起步點喇～

開頭一段上山路段好寬闊，地面舖得好靚，好好行架～

行幾個字已經進入左大潭郊野公園既範圍喇～

中途見到呢顆好特別既樹～ Daddy去飲咖啡整Ｄ心形就見得多，今日見到既係有心形既樹呀～

Yuki同豆豆呢排好鍾意影overlap企位既相播～

影合照喇～剛埋位，各有各～哈哈！

經過媽咪們既指示，終於企返好Ｄ黎影返張合照先～

行柏架山路段其中一個歷史遺跡就係睇呢Ｄ戰時爐灶～

呢Ｄ二次大戰年代既爐灶，好似無乜用過咁喎～無錯，原來當年政府起左呢Ｄ爐灶準備同日軍作戰時俾市民煮食用～點知後來香港好快就失守，結果呢Ｄ爐灶至今都未曾用過～

希望呢Ｄ戰時用具永遠都唔再需要用喇～

Yuki今日咁鍾意起飛腳架？女仔唔該斯文Ｄ喇～

前後約兩小時既行程，由鰂魚涌街市出發，到康怡花園旁為終點～下次要加強難度，行耐Ｄ，行遠Ｄ先～

Barbie的聖誕派對

2011-11-19T22:55:00.000+08:00

呢篇係一篇充滿著粉紅色既blog~

今日去開銅鑼灣買野，泊低架車係時代廣場～出到黎就見到有Yuki好鍾意既Barbie呀～係好多好多呀～

先從地下戶外果Ｄ開始～ Yuki興奮到每一個屋仔都衝埋去要Daddy同佢影～

仲要捉埋Mommy一切影添喎～（點解無捉Daddy既呢?）

無論屋內～

以及屋外～ Yuki都唔放過架～

跟住上去二樓大堂，Barbie屋企，繼續嘩嘩嘩～

睇見呢set人咁高衣柜，一排排既鞋，一套套又靚又無得賣既晚禮服，唔好話Yuki，連Daddy見到都嘩嘩聲～

假如大家都鍾意Barbie，為大家送上兩位美麗既Barbie～

有興趣既朋友慢慢都未遲既～因為呢個展覽一直到2012年1月1日架～

渣打藝趣嘉年華

2011-11-13T23:44:00.001+08:00

上個星期睇過太古城中心既預告，今個星期就係正式係維多利亞公園舉行既一年一度渣打藝趣嘉年華喇～

Daddy同Yuki兩個去到維園已經約下午三點，全部攤位遊戲都已經截龍唔俾排隊喇～

唔緊要喇～無野玩咪週圍睇下囉～

今次主題係愛麗絲夢遊仙境～好多好特別既巡遊公仔同跳舞隊伍～

呢隻好似Totoro入面隻龍貓巴士呀～

巡遊尚未開始，Yuki～擺Ｄ甫士黎喇～

嘩！呢幅扮嬲好肉酸呀！哈哈～

好喇，開始喇～巡遊開始喇～

Yuki好醒咁爬上台仔，企係人堆中攝位睇～

再見喇Alice～

睇完巡遊諗住返得屋企喇～點知Yuki小姐話肚餓要食燒賣喎～好！食都得～俾Daddy影張相放上blog喇～嘻嘻～

出年再要參加的話睇黎要朝早就黎排隊喇～

學校親子大旅行

2011-11-12T23:17:00.000+08:00

(School outing to Wetland Park)

真好～秋高氣爽的日子來得剛好～

前幾年學校家教會既旅行都未去過，今年算係幼稚園臨畢業既最後一次旅行～梗係要報名喇～

我地一早就要去到西灣河集合上車～好多人呀～

第一站～最近先去過一次既荔枝角公園－嶺南之風～今次去當然唔同喇～有全學校大部份既同學仔一齊嗎～

Yuki就差不多全程都同佢既best friend- Hilary同Hilary既妹妹一齊行～

妹妹好得意呀～跟住兩個姐姐係咁chok chok chok～

一開始已經玩到忘形既Yuki，起跳喇～

呢～同Yuki一齊影相既咪就係Hilary囉～

They looks so happy together~

原來除左我地上次玩過個遊樂場，仲有多一個係入門口既左手邊～

連條滑梯都好得意呢～

上百個小朋友係呢個遊樂場玩得過開心呀～

大概玩左一個鐘就差不多要出發去食晏～

地點：荃灣熊貓酒店？悅來酒店至真～

小朋友們問點解英文都叫Panda，中文唔係叫熊貓呢？

我地既車差不多最早到～上到宴會廳仲準備緊，好大既廳，好多既枱～

宜家仲一望無際～但係。。。

過左十分鐘左右，已經變成咁～

食飽午飯～係時候向第二主題進發～大家記唔記得呢度係邊呀～

無錯，係天水圍既濕地公園呀～

三個小女孩，吱吱喳喳，好高興哦～

行到邊，笑到邊～

Daddy手痕痕用新相機影花添～

跟住呢度見到好多業餘中既專業～觀鳥台上好多長短炮對準一眾水中雀島～

我地無長炮咁點影呢？唯有借助公園提供既單眼望遠鏡，然後用相機對住黎影～又得喎！

進入今日行程既尾聲，入返主大樓～「有麥兜呀！Hilary影相丫！」

正要落樓離開之際，居然俾我地見到有得俾小朋友自己油顏色做襟章～

快Ｄ喇～差不多要上車架喇～

呢隻就係Yuki選擇油既雀仔勒～

ＯＫ～大家覺得如何呢？我地就覺得好似勒～

最後要多謝一下負責今次旅行既老師同家長們～我地好開心呀～

怡和運動日

2011-11-06T23:31:00.001+08:00

多謝Kathy姨姨帶埋我地黎見識下怡和集團既運動日～

唔黎都唔知原來咁多公司都係怡和集團架，包括怡東酒店、文華酒店、仁孚車行、Pizza Hut都係架～

多謝你呀! 豆豆～乜你有熱狗食都咁既樣呀？

睇下Yuki見到意粉個樣開心到呢?

食飽左可以同Ｄ運動健兒打氣加油呀～

好週到既安排呢～有免費Starbucks飲呀～

無論何時何地，小朋友袛要見到吹氣彈床就會好似遇到磁石咁～吸左埋去～

有無盡既體力，不停跳、不停跳、不停跳～

好玩哩～開頭玩仲要無人睇時間，任佢地玩幾耐～好喇～玩下一樣喇～

唔知點解好想幫呢張相整個懷舊feel～希望數十年後佢地兩個會睇返自己細個呢Ｄ相喇～

大會係運動場居然整埋俾小朋友渣船添～

（下面段片可放大有高清版）

玩左幾個攤位遊戲，包括贏左個朱古力蛋糕，Yuki居然唔信係毛巾喎～

最後臨走黎一個賽跑作終結吧～

渣打藝趣嘉年華-預告

2011-11-05T22:54:00.001+08:00

渣打既藝趣嘉年華就快又到喇～下個週末就會係維園舉行～

呢個星期就先係太古城中心俾大家睇下一部份巡遊既藝術品先喇～

叉腰扮惡既Yuki Lam～

Yuki並唔係企係涼亭下，其實係大蘑菇黎架～

大大雞胞魚？

後面呢個就係愛麗絲夢遊仙境既Alice喇～

今年既主題係愛麗絲嘛～

乜Alice Wonderland入面有個咁既黑衣人既咩？

芭蕾舞癮忽然興起。。。

下個星期六日如果有時間記得去玩下呀！

《渣打藝趣嘉年華2011》

冰之驕女－第七十一課

2011-10-30T23:55:00.001+08:00

由今個星期開始，冰之驕女將改以不定期與大家繼續見面～

究其原因，無非係因為Daddy換左部細Ｄ既相機～新既相機唔再有強大既Zoom，而係輕巧既定焦鏡～

唯有趁Yuki剛剛行入去影幾張先喇～

今堂Yuki肩負著一個承諾，到底上堂做唔做得到呢？

放大盡既相就係咁勒～

今堂成績如有神助呀～轉圈、飛機、雙腳跳，全部都無得頂～

Daddy Mommy信守承諾，不過先停一停五樓影返張萬聖節南瓜煲雪雪～哈哈！

登登！Yuki就係為左枱面既麥當勞而今日大發神威呀～

Yeah! 以後繼續加油喇～如果繼續咁叻的話，Daddy就要帶返大相機影返幾次俾大家睇睇啦～

華星有分店喇～

2011-10-29T23:33:00.001+08:00

好多明星支持既華星冰室開分店喇～

多得姑婆尋晚食飯時報料，原來分店已於筲箕灣開幕喇～

懷念美味既滑滑炒蛋呀～

雖則話偏離左東大街，但係都係滿哂座～渣車黎既朋友如果泊門口電車路要有心理準備隨時走鬼呀～我地食既中途就有警察叔叔抄牌喇～好彩我地入左後面街既錶位又剛剛有車走，所以Daddy可以安樂咁食個早餐～嘻嘻～

星期六，賣旗日～ Yuki都做下善事～不過…不過…無人貼面旗上面架喎～

最後俾個地址大家睇睇～有機會既話我地可能會係果度相遇呢～

公公生日快樂～

2011-10-28T23:18:00.000+08:00

今日係公公既生日～我地去左個新地方～

係位於奧運站既金滿庭～大舅父一早訂左間房～

不過我地愈黎愈大家族喇～一張枱原來已經無可能坐得落我地－２０人～所以有Ｄ小朋友要坐後排既凳食～

祝公公生日快樂～同公公影張相先喇～

除左上面既生日蛋糕，今日仲有多一個蛋糕食呀～係姑婆買既朱古力波波－Chocolate Banana ball 不過因為太好食喇～食完先記得未影相，幣！唯有影個紙袋補數喇～

食完飯離開之際… Yuki發現左佢好鍾意既反斗城長頸鹿呀～睇下攬得幾實～攬Daddy Mommy都無咁實呀～

公公～再一次祝你身體健康～生日快樂～

冰之驕女－第七十課

2011-10-23T23:24:00.000+08:00

林穎雪小姐又黎大跌watt喇～

連佢自己都難以致信哩！

主要跌watt項目一：轉圈細力左～今日轉得個零圈咋～

另一跌watt項目：做飛機又變返火箭喇～

29秒可以見到轉圈，最後見到好求其既飛機～

上完溜冰堂，今日同Evan哥哥同佢細佬去左書局一齊睇書呀～

睇睇下Yuki本書突然好吸引到兩個男孩子喎～

無問題呀～大家一齊睇喇～

「古裝」公園

2011-10-09T23:55:00.000+08:00

今日上完溜冰堂去左個電視古裝人常去既地方～

就係位於現代既荔枝角公園三期既嶺南之風喇～

不愧為古裝公園～好多平台樓閣，小橋流水～吸引左Ｄ人請左ＤModel係度影相～

我地肯係唔使請Model喇～有Yuki係度，肯定唔會執輸喇～

以下呢個三連拍係Yuki諗好拍幾張同咩動作，跟住叫Daddy影架～

儘量利用唔同既背景加埋唔同既甫士～

Yuki真係一個好model～攞姿勢自動自覺～

現今公園必備既石春路～小朋友行得輕鬆～始終因為體重輕好多嘛～

除左多人影相，另外我地仲見到有人畫畫添～就係畫呢個景喇～

哈哈～「扮」正經兩父女～

人力車～連Daddy Mommy都未坐過呀～

小朋友既精力真係用之不盡既呢～連環拍之後到連環跳呀～

最後送上分身術Yuki~ 用最近下載既App－Nabit 幾好玩架～

冰之驕女－第六十八課

2011-10-09T23:44:00.001+08:00

天氣回暖返唔少，唔使搵返件厚褸出黎著住喇～

有冇見過人咪見伸脷溜冰？未就要睇下喇～

今日琳琳同Yuki成個孖生姊妹咁～兩個都著住粉藍色Ｔ恤，不過Yuki溜冰著住件褸，所以睇唔到添～

今日既轉圈動作都係保持水準，但係Hei Tung老師話要再練習大力Ｄ，轉多幾圈先得架～

做飛機就ＯＫ勒～聽左Daddy講，一路彎低個身，一路舉起隻後腳～

冰之驕女－第六十七課

2011-10-02T22:41:00.001+08:00

今日上堂齊人喇～

咦？點解仲係著呢件褸呢？嘿～因為Daddy Mommy未搵囉～

今日Yuki上堂好開心呀～古靈精怪～睇下面呢幅扮驚既表情～

另外今堂幾個小朋友既轉圈都使出真功夫呀～琳琳轉到頭髮都飛起哂～ Yuki睇得幾開心～

至於Yuki呢？Good good喇～應該開始掌握到個秘訣勒～轉到四個圈或以上呀～

今日咁o岩幾個同學仔上完堂都唔趕住走，所以可以一齊玩到半個鐘呢～

冰之驕女－第六十六課

2011-09-25T21:52:00.001+08:00

踏入秋天，黎到溜冰場都覺得凍凍地～

睇黎下次Yuki都要著返件厚Ｄ既外套先得喇～今日琳琳無返呀，得Yuki同Evan哥哥兩個上堂咋～

睇下Yuki宜家跳得幾高？高過Yuki呀～哈哈！

轉身單腳跳就始終都係爭少少～轉身既幅度唔夠多～

做飛機呢？都係未夠大膽喇～要放膽彎個上身落去隻腳先起得夠高架嘛～

好似Hei Tung老師幫你做咁樣就o岩喇～

海洋公園初秋遊～

2011-09-24T23:41:00.000+08:00

今日約左朋友左Arthur一齊去海洋公園呀～我地早到少少，俾Yuki同部相機warm-up一下，同Daddy追逐式影住相先喇～

嘩～爭Ｄ捉到喇～咪走呀！

好喇，好喇～ Arthur差唔多黎到喇～整返靚Ｄ頭髮先～

Arthur! 「點解你個樣咁cool既? 你睇Yuki個樣幾興奮?」

去太平洋海岸睇海獅，剛剛有人俾錢餵海獅～隻隻海獅即刻伸長條頸等食呀～

Yuki立正加伸頸甫士學足海獅呀～

呢幅又變返平時既古靈精怪喇～

宜家教大家除左《喜、怒、哀、樂》之外，呢幅叫《驚》呀～ （哎！係「扮驚」至真）

Yuki到底有乜秘密俾海獅知道左，又唔俾佢講，要封住佢個咀呢? 哈哈！

明明Yuki同Arthur已經兩個霸左一架車～

偏偏～ Daddy坐係後面架火車跟住～（唔知Yuki大個左之後Daddy會唔會都係咁呢？）

大家估下下邊呢兩幅相似咩呢？

1) Yuki發現Daddy跟踪，叫Daddy「唔好跟黎喇！」

2) 同Arthur坐坐下都係覺得坐Daddy車好Ｄ，要返Daddy架車度?

最後臨走再玩埋旋轉木馬～玩到攰哂要走喇～

又話暫時唔去迪士尼既?

2011-09-17T23:55:00.000+08:00

係架～我地話左唔會續張全年證架嘛～

今次係因為Mommy剛剛有兩張飛，咁淨係買Yuki張飛就得喇～

今日去迪士尼有幾個第一次架～

第一、今次專登唔渣車入去迪士尼～而選擇搭地鐵轉迪士尼線，等Yuki可以第一次搭下迪士尼列車～

Yuki~ 你既興奮程度真係有Ｄ似遊客喎～

呢期原來Yuki鍾意用雙手黎擺甫士喎～

得閒要問下佢其實有乜意思既呢?

時間尚早，週圍影多幾張先入場～

話咁快萬聖節既主題已經開始左～連後面用花砌既Mickey都有用南瓜黎砌個咀架～

想同Mickey Minnie影相但係排隊又太多人喎，咁點算呢？咪就係襯佢地行出黎果陣離遠少少影囉～佢地行過Yuki身邊仲有同佢say Hi架～

另一個第一次、就係幫襯大街餐廳勒～黎左迪士尼咁多次，每次都無機會食呢間，次次都排哂隊，有次睇完煙花想入去食埋野先走，但係原來已經唔俾人再入呀～

今日又好好彩地，唔使排隊都有位喎～

兒童餐袛係五十幾蚊，算抵喎～

雖然已經過左中秋，但係點解仲係咁熱呢？好彩帶左遮可以遮下太陽o者～但係Yuki可能唔多滿意我地帶既遮唔襯迪士尼勒～行過呢檔賣遮既即刻要開Ｄ公主遮黎遮下太陽呀～

買就唔得架喇～俾你用黎影下相喇，Yuki～

迪士尼既萬聖節佈置得好過海洋公園～無咁恐怖嘛～ Yuki想扮恐怖都扮唔出乜野恐怖樣～

臨走睇埋花車巡遊～

Yuki又有幫手去隊尾拉繩呀～

小助手，唔該望望呢邊呀～

嘩咁快就過左差不多五小時歡樂既時光～

Daddy要求Yuki一件事～就係以後廿五度以下先好入迪士尼喇～

中秋團圓在維園

2011-09-12T23:41:00.000+08:00

今年中秋節我地係炮台山一齊食團圓飯～我地食第一輪，所以食完先八點三，仲好早呀～

足夠時間再搵下一輪節目～

Daddy講過想帶Yuki去維園睇火龍～咁一於同埋家姐、boy哥哥佢地去維園趁下熱鬧喇～

今年有李錦記既超大燈籠魚～要破健力士世界紀錄呀～

就係呢條魚喇～有成十幾層樓長架～

Yuki今年既燈籠繼續係用左第二年既傳統兔仔燈籠～

近電車路果邊既足球場就係舞火龍會入黎既地方～不過…都未開始就已經有好多人圍住左～咁多人都係睇唔到架啦～

所以我地變成去左大草地搵個空位坐低一齊賞月，感受一下呢個中秋氣分添喇～

見到雖然有好多雲～不過中秋月亮都不時於雲堆中出黎同我地見面架～

我地無玩爉燭，玩Ｄ安全好多既－螢光棒～警告：日本城既螢光棒非常之唔得，唔夠光，又易爆，漏哂Ｄ螢光水出黎～

宜家唔用爉燭，所以呢Ｄ紙紮燈籠可以用得耐好多～以前好快就已經會燒爛左～

去完公園仲未夠～再去爺爺麻麻屋企既平台玩多一輪～

家姐幫Yuki整既螢光蝴蝶～

因為家姐想打鞦千，維園果Ｄ有好多好多人～所以我地返黎呢個平台打返夠本～

無人爭，好開心呢～

真夏之暑假－沖繩之旅：萬座＞嘉手納＞那霸＞香港(8月28日)

2011-09-11T01:10:00.001+08:00

呢間酒店有包早餐～有兩間餐廳可以選擇～一間係自助早餐，另一間係日式早餐～

尋日落到黎見到自助早餐果邊條人龍好長～所以尋日就食左唔使排隊既日式早餐～

今日Daddy同Yuki早少少落樓排住隊先～酒店亦都好貼心咁安排左個員工整氣球俾一齊等位既小朋友～ Mommy落到黎就差不多入得勒～

食早餐既時候聽到身邊好多廣東話呀～可能呢間酒店始終係香港訂package可以選擇既酒店之一，所以尤其多香港人架～

食過早餐就上房拎埋行李 check-out啦～臨走先有機會同酒店正門影返張相～

驅車出發南下喇～中途經過呢間《御菓子御殿》，即係我地第一日係國際通食tea果間舖頭～呢間恩納店好大架，有埋一部分廠房～

佢既招牌手信食品就係Yuki旁邊既「紅心蕃薯撻」～

據佢網站所講，每日造成９萬個呀！好犀利呀～

呢間野做呢Ｄ板真係好維肖維妙～ Yuki跑到個辛苦樣真既一樣～

好喇～再向下一景點出發～

呢個景點犀利呀～無黎影過相都唔算黎過沖繩呀～就好似去新加坡要影魚尾獅咁～

睇下面呢一幅先～估到未？未呀！再估多陣喇～

真係好好彩呀～天氣非常之好～藍天白雲加超清既海～

登！登！係喇～估岩左喇～咪係《萬座毛》囉～

多謝萬座毛象鼻既眷顧，俾我地見到一個咁好天氣下既萬座毛～

呢個景點唔止外地遊客多～連本地日本遊客都好多架～所以要攝個位影相都唔容易呀～

攝得到就梗係要影多幾張喇～「Mommy & Yuki! 1,2,3 cheese!」

嘩～真係靚到唔捨得走呀～

但係邊度可以唔走呢～

離開萬座毛後，我地向最後一個景點出發喇～

最後呢個地方，係一個軍事重地～呢度就係位於嘉手納既美軍基地喇～

可惜我地黎睇既時候並無戰機升降～淨係見到跑道兩旁Ｄ停機設施～

同埋zoom盡先影到既幾架戰機～

係呢個嘉手納道の駅，Yuki又搵到佢最鍾意既軟雪糕孖公仔～

好喇，全部景點行程都行哂喇～要返去還車喇～

話咁快就到左機場～還返個iPhone先～今次好好彩借到呢部iPhone～真係好好用，又好有用～會黎沖繩既朋友記住借呀～

８月２８日～再見喇，沖繩島～

我地應該會再返黎架～到時再玩埋Ｄ外島～

要行上飛機喇～睇下Yuki個樣，笑得黎有少少離愁，好似唔捨得咁～

回程到Daddy陪Yuki坐～ (定係Yuki陪Daddy坐呢?)

簡單總結今次沖繩之旅～五日四夜唔多夠喉～ Outlet同shopping mall都無行過～

不過。。。起碼我地終於都叫做踏足過沖繩島～

另外係非常感恩地整個旅程都算係好天～五日黎淨係開過一次遮咋～兩個颱風由出發時已經成形，到旅程完結都無對沖繩構成任何影嚮～

租車可以的話租哂咁多日～我地都覺得蠢左，第二日如果有車用去玉泉洞同首里城應該方便Ｄ～

最後希望日本所有野儘快從地震復原過來！我地依然係好鍾意去日本旅行呀～

「日本～またね～」

多謝大家對Yuki今次既沖繩之旅遊記既興趣～希望我地玩得開心時，大家亦睇得開心～

相信不久既將來我地又會有新既旅程架喇～

真夏之暑假－沖繩之旅：名護、恩納(8月27日)

2011-09-10T10:16:00.002+08:00

尋晚睇唔真酒店房外既風景，今朝起身即時補返個日景俾大家睇睇喇～

樓下個泳池真係幾靚架～ Executive floors係14同15樓，不過其實應該就算低層都可以睇到海景～

遠望一望無際既東海～真係180度都係海黎架～

Yuki就係睇到呢條滑水梯就好想玩喇～

Yuki~ 不過我地今日行程緊密，要晏Ｄ返黎先游得喇～你暫時睇住止渴先喇～

第一站係坐玻璃底船出海～呢艘船造型好特別呵～係一條鯨魚既外型～呢度叫Busena海中公園～

可以買套票去埋隔離個海中展望塔～

船既中間有三大格大玻璃～開行幾分鐘就已經到左一堆珊瑚群～

睇下見到幾多魚～相信如果玩浮潛應該仲好玩～

對Yuki黎講，呢個係新體驗～坐係一艘開窿既船～

比起以前Daddy Mommy後生時坐過第二度既玻璃底船，呢度既船塊玻璃係超級清～無錯，係要用超級黎形容先得～

睇下影Ｄ魚正到呢～

沖繩仲有其他地方有玻璃底船坐～不過有Ｄ要坐成個鐘，比較耐～呢度廿分鐘搞掂～夠哂時間睇應睇既野，ＯＫ～

去旅行就可以隨時隨地學習～香港就唔會有機會見到咁大個錨喇～

叫得做海中展望塔～梗係要行到海中間喇～行出去都遠遠地架～

Daddy捉住Yuki～唔通要Yuki揹佢～嘻嘻～

再黎Pose大平賣～

大家感受到Ｄ水有幾清未呢？真係有Ｄ衝動想跳落去呀～

行到出海中展望塔，行落一層樓梯就有360環迴小圓窗～咁睇比起頭先船上面睇仲好喎～

其中一隻窗仲岩岩對住一隻Nemo呀～

第二站：海洋博公園

約３２公里，少於一小時既行車時間～黎到海洋博公園喇～

入口呢隻大鯨鯊好有氣勢呀～整部相機係地下影下全家福喇～

美ら海水族館絕對係海洋博公園既最具人氣館～

進入水族館，第一步，可以伸身摸下海洋生物～記住摸得，但唔可以拎離水面架～

正試進入水族箱範圍，光線開始唔夠～開慢Ｄ快門，Yuki唔好郁呀～

登！登！呢度就係黑潮之海喇～真係好震撼呀！

係黑潮之海食埋晏～出返黎再行下海洋博公園其他地方～

好曬呀～

一個類似海洋劇場既地方～有得近距離隔住玻璃同海豚玩同影相架～

訓練員姐姐唔知同佢地講緊乜野呢？

下面呢條大家估係乜野呢？原來佢都係海豚黎架，因為樽鼻海豚袛係其中一種海豚～

係劇場表演完，仲可以過隔離呢個池再近距離接觸佢地～

諗住黎沖繩既朋友，記得準備好所有防曬措施呀～太陽帽、太陽油、遮～

公園仲有個好大既繩網陣～足足有幾個籃球場咁大呀～

Yuki玩得好happy呢～偷偷笑～

開心笑～最終得意忘形得滯，跌左落地，好彩唔係好高，同埋係草地～喊兩聲就無事喇～

第三站：菠蘿園

由海洋博公園駛往菠蘿園約半個鐘車程～

Ｄ波蘿公仔幾得意～影多幾張～

門口呢個大菠蘿好高呀～

俾錢入場既菠蘿園包括俾架菠蘿車（如下圖）俾你坐～唔使自己渣，佢自己會行同轉彎～咁當然俾Yuki試下做司機既滋味喇～

經過菠蘿種稙區～不過Ｄ菠蘿仲未係好大喎～

坐完車，例必令大家行過一堆購物區～不過唔買野都有菠蘿任食架～

呢度既手信店有沖繩既星砂呀～我估到呢張大家會睇唔清楚架喇～

等我Zoom大Ｄ俾你地睇喇～見到嘛？

網上找來的資料：「星砂，其實是貝殼被潮水磨蝕，最後留下有如星星般的尖角」

應承左Yuki今日要再去酒店泳池游水，試下個滑水梯，所以我地玩完菠蘿園就返酒店喇～我地鍾意自遊行既原因就係呢Ｄ自由自主既好處～唔使下下都玩到夜麻麻先返酒店～

日頭睇既酒店房係咪更加靚呢？

趁間房未整亂，影返張相先～間房真係好大呀～「Yuki! 做乜係度開雪柜呀?」

快Ｄ換泳衣落去泳池喇～咦！不過點解Yuki玩呢條滑梯既？果條大滑水梯呢？

哎呀！原來條大滑水梯要身高120厘米先玩得呀～好彩救生員哥哥話俾daddy聽遠處個池有小朋友滑梯，Yuki一樣玩得開心～

呢個係今次沖繩之旅既最後一個黃昏喇～有Ｄ唔捨得添～

今晚既晚餐我地又去搵燒肉食喇～

Yuki食燒肉就一定會好乖，同食得好多架～自己起碼食到一大碗飯～

Yummy yummy既Agu豬同石垣牛呀～

今日呢間好特別，會俾一杯冰我地喎～做乜呢？原來係用黎俾你幫個爐降溫架～因為Ｄ石垣牛實在太靚喇～Ｄ油脂滴落Ｄ炭度好快就會燒到下面幅相咁～如果呢個時候唔用Ｄ冰去整熄Ｄ火降溫，咁塊牛肉就會變埋炭架喇～

聽日就要返香港啦～今日既行程覆蓋沖繩既西北部～

真夏之暑假－沖繩之旅：那霸＞名護(8月26日)

2011-09-06T22:29:00.001+08:00

進入第三日，開始剩低幾日既租車行程～

今次係我地第一次約租車公司開架車去酒店俾我地～又幾方便喎，雖然果間分店其實離酒店袛係幾分鐘路程，但係如果猛太陽或落大雨之下推住幾件行李行幾條街都幾辛苦架～

原來沖繩島有間租車代理公司好平架～間公司叫沖縄ツアーランド。最後我地經佢租左萬事得Axela～仲有5L油送添～

租車原因係我地今日開始比較遠既行程～我地會由那霸北上慢慢玩上去～

約一個鐘既車程，最先到達既係美國村～

美國村主要都係Ｄ不同既舖頭、餐廳～

後面見到既應該係卡拉ＯＫ、保齡球場、遊戲機中心～

可能我地都算係早黎到，有Ｄ舖頭都未開，人少少，行得舒服～

仲有時間俾我地set相機影合照添～嘻嘻～

我地今次旅行目的並唔係shopping～所以行左一陣就再出發喇～

眨下眼我地居然黎左郵便局？做乜呀？

Yuki! 我地黎郵政局做乜野呀? Yuki好專心咁寫緊野喎～

睇下寫左乜野先？原來係寫明信片呀～

如果大家有收到明信片，可以對一對你果張係咪呢間郵政局寄既呢？

每張都係Yuki親筆寫、親筆畫架～

寄完信，行過對面海邊睇下先～ Yuki拎住既功夫panda係今朝麥當奴開心樂園餐送架～

上到樓梯頂原來可以見到一個海灘架～不過呢度好大風呀～頂帽一唔按住就會飛走呀～

跟住打橫行東駛左約一個鐘車程，我地到達左Uruma／うるま市～呢度既一個獨特景點就叫海中道路～

係上面經過同一般橋好似無乜分別～呢幅相就係橋既一端影既～

等我影張鳥瞰圖小冊子俾大家睇睇就知點解佢叫海中道路架喇～

橋既另一端有一個「道之駅」～哎！唔係呢個叫「海の駅」至真～因為佢起到成隻船咁既外型～

今日既午餐繼續食多次《沖繩排骨拉麵》～

食完麵再黎多個芒果刨冰～美味しい～

好！向下一站出發～又大約一個鐘既車程～今次呢程車，Yuki眼瞓喇瞓左覺呀～

到左開頭都唔肯落車，又扭計～好彩過多幾分鐘就精神哂～

呢一站係黎到殘波岬，睇下呢個全沖繩最高既燈塔－－殘波燈塔～

佢有31米高，即係成十層樓高～俾200円就可以上塔頂參觀～電梯？梗係無喇～

但係即使行到腳仔軟都抵呀～上到塔頂既36 0度全開闊海景，加埋超強勁海風，Ｄ帽幾乎飛落海呀～

雖然今日好大風，但係海面又無心風浪喎～

如果大家有機會黎殘波岬，推薦大家一定要上黎燈塔頂呀～

Yuki黎到第三日，已經不斷、不斷、不斷咁提醒Daddy Mommy幾時去沙灘呀～

正好殘波岬隔離有個海灘－－殘波海灘～好喇～下水禮～

呢個灘水唔算好清，沙亦唔算好幼～但係可以係沖繩既海灘游水呢一點已經夠喇～

沖繩既沙灘好多都有收費既淋浴設施～呢度就100円三分鐘凍水、300円三分鐘熱水～原來三分鐘都幾耐架喎～

游完水係傍晚六點～今晚想去名護出名有日落景既餐廳，唔知去到仲睇唔睇到呢？

Yeah! 好彩日落前終於趕到～

呢間餐廳叫《海の家》，於國道58上，如果無GPS隨時行過龍都唔知架～

今晚有鐵板Agu豬扒、沖繩雜錦天婦羅、海膽、牛油炒夜光貝～雖然呢度無冷氣，不過坐落食落一Ｄ都唔熱喎～

到左今日最後一樣行程，就係去Check-in黎緊呢兩晚住既resort hotel－－Okinawa Marriott Resort & Spa 喇～

好好彩呀～唔知係咪我地比較晏先check-in呢？佢地upgrade我地上executive floor呀～雖然房既大小一樣，不過房內既裝飾佈置都靚Ｄ咁囉～

Check-in完上房其實已經八點半架喇～不過Yuki見到樓下個泳池又即刻話要落去游水喇～睇睇個開放時間～咦？開到十點喎～ OK喎～如是者，落去玩返半個鐘就返上房沖涼瞓覺～ Zzz…

下為我地今日既活動地圖：差唔多走遍沖繩島中部～

真夏之暑假－沖繩之旅：那霸(8月25日)

2011-09-04T22:17:00.001+08:00

旅程第二日～一起身開個電視睇下天氣預報先～

噢！天陰有雨… 下雨機率６０－９０％… 見步行步喇～

今日第一站要去既係「沖繩文化王國。玉泉洞」～由那霸巴士總站搭83號直達玉泉洞，行車時間一小時～巴士班次並唔密，所以最好預先計劃好想搭邊班車～＊溫韾提示：去程時刻表／回程時刻表

見到地下咁濕，好明顯剛剛落完一場雨喇～不過宜家又陽光猛烈勒～我地搭９：５３果班車，準時開車～

但係去到玉泉洞落車又開始落少少雨呀～ Yuki即時披上雨褸，影返個遊客到此一遊相～

一入文化村，先去睇個蛇世界～ Yuki第一次咁近距離睇到蛇咋～

黎呢度最主要睇既就係黎緊既玉泉洞～

玉泉洞內通年都處於攝氐２１度～日本人都試寫「夏涼、冬暖」呀～

玉泉洞其實係一個天然鍾乳石洞～經歷３０萬年而成～

於１９６７年先至被一個大學教授發現～

成個洞全長有５公里，開放俾公眾參觀既都有８００米～唔好睇少８００米呀，行下行下都要成半個鐘以上架！

除左頭頂不時有水滴落黎，另外亦有好似下面呢Ｄ好似河流既小瀑布～

大自然真係好奇妙，伸手觸摸著Ｄ鍾乳石，諗住佢地經歷３０萬年而成，感覺奇妙～

臨近出口有呢個壺，正在做一個兩年前開始做既實驗～佢地希望用慢慢滴落個壺度既水成為一層鍾乳石～下面既字仲話希望大家將來可以帶埋子孫黎見證呢個實驗既成果～

落去行樓梯，上返黎有自動電梯～貼心的安排～上返地面已經陽光普照～

呢塊板果隻到底係咩動物呢？

一個仿似表演台既地方，係用黎做乜既呢？

哈哈～休憩所是也～

Yuki並唔係食緊雪條呀～佢係吹緊沖繩既一種樂器：琉球笛～見個哥哥吹《崖上的波兒》同《多拉Ａ夢》吹得出身入化，有得試吹Yuki當然唔執輸喇～ Yuki吹到好開心！

寫真館～有得俾人租套傳統服飾黎影相～我地就咁係檔口前影得架喇～

臨離開前聽到入口處旁邊有個大表演場，剛剛要開始表演～原來呢度有沖繩傳統舞EISA既表演，每年既八、九月其中三日，會有一年一度既EISA祭，係街上可以見到～如果唔係撞o岩呢幾日黎沖繩，係呢度都可以睇得到～不過因為講明不準攝錄，唯有俾個網址大家參考一下喇～ Super EISA

因為要趕及搭１２：５５果班車走，所以睇左一陣就去返巴士站搭返去那霸巴士總站～

午飯行返國際通搵左間沖繩料理～行到身水身汗，Yuki飲Calpis，Daddy飲啤酒～

叫左兩樣沖繩料理：下為Agu豬(アグー豚)定食～

另外呢個係沖繩排骨湯麵（ソーキそば）～

食完個晏就搭單軌鐵路向我地今日既第二站景點出發～係車上，一個小朋友表演賣廣告式既鬼馬表情～

上面係鍾意飲既白色桃味飲品～下面係用沖繩酸桔仔做既果汁～兩個表情都交足戲架～

好快就到單軌鐵路既終點站－首里站～聽到呢個站名都應該估到我地第二站係邊度啦～

就係前面被高高城牆圍住既《首里城》喇～

整個城有幾個城門～

呢個係守禮門～大部份遊客都係由呢個門進入首里城～

雖然話係主要景點，但人唔算太多～可以慢慢行～

可以睇到個天，晴中帶陰～影完呢幅坐草地既相又開始落雨喇～

不過，唔使幾分鐘又停左雨～後面呢個係瑞泉門～

由首里城既最高點，可以望到好遠既地方，甚至成個海都望到，果然係一個行軍有利既據點～

本來已經叫攰既Yuki當知道有本小冊子叫佢地收集唔同既蓋印，即使攰意全消，全場開心到處跳～

去完首里城，亦都完成左我地兩日沖繩市區既行程，晚餐選擇左另一種可以品嚐沖繩特色食物－Agu豬同石垣牛既燒肉～

係用全炭爐黎燒架～未開始食已經覺得正呀～

飲杯～ Yuki！你果杯咩黎架？

美味燒肉製作中… 跟住已經掛住食唔記得影相喇～

今日比尋日少見到公仔，袛得以後兩幅～

下為我地今日既活動地圖：

真夏之暑假－沖繩之旅：香港＞那霸 (8月24日)

2011-09-03T00:29:00.001+08:00

等足成個暑假，終於到左暑期尾聲，亦係時候出發去我地再次踏足日本既沖繩之旅勒～

香港直航到沖繩島，袛得兩個選擇：港龍或香港航空。我地選擇左香港航空，每日袛得一班機～中午起飛，都好！唔使咁早起身嘛～

不過大家記住要早少少去機場Check-in呀！因為香港航空櫃位唔多，但果個鐘數好多班機，我地上網check-in左都要排成四十五分鐘以上呀～早餐都無時間食呀～

連跑帶跳，過左Immigration，再過埋security check～幾多號閘口呀？吓！49？即係仲要再搭無人列車！結果淨係可以行過Starbucks買個飽拎住衝向閘口～

現正登機喇…

預先幫Yuki定左兒童餐既好處：１）一定岩小朋友食；２）空姐會出哂兒童餐先～即係唔使慢慢等餐車派餐～

機程不足三個鐘就到沖繩那霸機場～國際線大樓應該必定係行落樓梯搭巴士～

即將會去沖繩既朋友請特別注意以下貼士：有免費iPhone借架～

係國際線出左海關就有個TISCO - Tourist Information～我地果日係即場去借，返香港睇返原來可以預先網上預約添～

http://tc.okinawa2go.jp/special/official/rental

呢個電話可以用黎打本地電話，可以上網，可以用埋GoogleMap搵路～

搭車入市區酒店，搭咩呢？

沖繩唯一既鐵路係單軌列車「ゆいレール」由於都算係日本既鐵路，所以機場呢個站就成為「日本最西端既站」勒～由機場搭入去那霸市區袛係幾個站，好方便，又唔多人～比起由成田搭入去市區爭好遠～（順帶一提，隔離的赤嶺站就係日本最南端既站）

單程車票由２２０円至３２０円不等，佢有Ｄ一日乘車券：６００円～我地就無買，因為預左一日唔會搭咁多次～

沖繩－除左陽光海灘，亦令人諗起美軍基地～所以單軌列車一出機場就有幾架戰機擺左係度～

頭兩晚我地係國際通附近住～ Check-in完差不多傍晚，即刻落去附近行下喇～ Yuki見到佢既favorite shop之一：FamilyMart～即時好興奮地話要影相～哈哈～（點解係favorite呢？因為晚晚我地都會入去買雪糕或雪條返酒店囉）

沖繩見得最多既動物就係下面呢Ｄ獅子－Shisa (シーサー) 具有辟邪同守護既作用～

過兩條馬路就到國際通入口～

呢塊紙板好正，最鍾意既左邊果個都係做一個窿搵人扮，配合埋Yuki既表情，Good!

影完相都幫襯下喇～呢間御菓子御殿係沖繩最大既菓子店～國際通呢間袛係其中一間分店～二樓仲有餐廳，可以食個快Tea先～

個紅蕃薯撻好味～

另外呢個唔記得咩Cheese Cake都好味～

七點開始日落既國際通～好鍾意日落既光線～日與夜之間～

行國際通發覺一樣好奇怪既野，明明條街唔多覺有人帶狗出街，但係好多舖頭都擺一堆玩具狗著住T-shirt咁背向行人路～

SMAP賣既廣告，都唔一定係用木村做大頭既～

呢晚既晚餐我地決定近近地食國際通既第一牧志公設市場（即街市）食海鮮～

地下一層就好似一般街市，賣濕貨、海鮮～樓上二樓就係熟食市場～可以自己買左海鮮上二樓俾佢地煮～

我地就選擇直接叫間餐廳幫我地叫落下既海鮮上黎～仲揀左間好面熟既舖頭～

唔知有冇朋友睇開亞視既「日語大放送」？前果排Rie同Jam去沖繩就係幫襯左呢間喇～

佢地都有食既就係下面呢隻「夜光貝」，一半做剌身，一半用牛油炒～

非常爽口～價錢為２５００円～

另外叫左個雜錦魚生～

再黎一個沖繩名物：海葡萄～

海葡萄其實佢係一種水藻類植物，食落口感好得意，一粒粒水珠咬開有汁爆出黎～食起黎有一陣特別既香氣～

飽餐後漫步再經國際通步回酒店～第一天完結前送上Yuki單單於第一日所拍下沿途不同既公仔合照～

不是游泳天～寫游泳～

2011-08-22T00:11:00.001+08:00

因為Daddy想記下這刻Yuki可愛的沙灘跑姿～

獨個兒的跑到遠遠去收拾玩具，雙手也不夠用，沒有發脾氣或扭計～讚！

冰之驕女－第六十四課

2011-08-21T23:24:00.001+08:00

今朝唔知係唔係未瞓醒，居然無發覺Yuki著左條短褲仔～有咩問題？去學溜冰喎，居然著短褲～

之不過Yuki自己又無乜野喎，如常好開心高興，同埋最緊要。。無起雞皮～即係唔覺凍喇～

今朝姐姐幫Yuki紮左個孖辮頭，睇返Ｄ相原來Yuki應該好耐未試過紮孖辮頭學溜冰～

再續飄浮轉圈～

嘻嘻～好鍾意呢幅咪眼得戚樣～

上完堂琳琳都有留低繼續練一陣～其實應該係話兩個想鬥快既小朋友～

下個星期因為去旅行所以要skip一堂唔上呀～