賣旗籌款

剛剛上一篇先講完進入小學生活有好多第一次～

今朝又有一樣第一次參與嘅活動－就係賣旗喇～

Yuki嘅學校今日係幫香港學生輔助會籌款～

經過早一陣子Yuki知道家姐有賣旗之後，就已經話遲啲學校賣旗都要參加！

如是者，今朝一早起身～ 八點半出發去屋企附近開始賣旗喇～

最捧場嘅爺爺嫲嫲好快聞風而至喇～

多謝爺爺嫲嫲呀！

過無幾耐，Mommy都嚟到喇～ Daddy可以開始放心盡情影相喇～

從一開始仲有少少怕羞，同埋唔係好夠大聲～ 漸漸練出膽量來了～

「早晨！唔該可唔可以幫我哋買支旗呀？」

 

賣旗連環睇！ 有啲係本來已經諗住要買旗，行埋嚟已經拎住錢喺手！

Daddy Mommy叫Yuki講嘅時候要加埋對眼要望住人講先有禮貎㗎！ 睇下Yuki幾快學到嘢！

對住咁高大行過嘅大人都一樣舉高個頭同人講早晨㗎～

好快就賣咗兩張喇～ 每個學生都會派六張旗紙，加埋有三百支旗㗎～

 

主動出擊嘅Yuki，成功令到人哋停歩嚟幫佢買旗～

連UPS哥哥都好幫手呀！ 多謝！

愈賣愈有信心嘅Yuki，笑容都自然啲呀！

「姐姐，唔該可唔可以幫我買支旗呀？」 「多謝！」

話咁快，爺爺嫲嫲已經買完餸返嚟～ 爺爺再俾錢買多一次添～

唔止吸引到爺爺㗎～ 睇吓下面呢張相！ 本來左邊個叔叔停歩睇下Yuki賣乜嘢機構嘅旗～ 然後右邊另一個叔叔主動走埋Yuki度要買旗呀～ 跟住原本停歩嘅叔叔當然都有買喇～

睇相唔係好夠喉，睇下片更可以清楚睇到Yuki點樣主動出擊呀！

經過一輪熱身，Yuki都熱到要除校褸嘞～ 換上運動服外套再繼續！

   

Yuki已經識得離遠留意住同埋用講「早晨」吸引對方嘅注意力～

睇吓下面呢張連環拍～ 離遠見到有位伯伯，當同Yuki距離逐漸拉近，Yuki成功吸引到伯伯嘅注意，幫Yuki買咗支旗呀！ 多謝伯伯！

剩返最後唔夠一個鐘～ 仲有最後一張旗紙！ 改變陣地，過對面馬路先～ 同Mommy密密傾，睇下有乜嘢可以改善～

 

好快地，用多唔夠廿分鐘就賣到最後呢一支旗俾呢位叔叔喇！

恭喜你呀，Yuki! 成功賣哂所有嘅旗！

        

今次嘅賣旗，捐最多錢嘅大家估下係幾錢～ 就係下面呢幅啦～ 紅色嘅紙幣，大家知係幾錢喇！ 多謝呢位買最後呢支旗嘅人士！

最後都要再向今日幫Yuki買過旗嘅呢約三百位善長人翁講多一聲多謝！ 下面送上一幅精心剪裁嘅相片「Yuki貼旗的一刻」～