由USS搭Sentosa Express返出Vivo City轉ＭＲＴ去今日第二個景點～
喺Vivo City商場發現原來有亞坤喺呢個商場喎～
好嘢！今次嚟到新加坡都仲未食到過亞坤嘅咖央多士呀～
啱啱好下午茶時間，唔好講咁多～ 叫返幾份嚟大家食下先～ 我哋食咗兩朝吐司工房嘅咖央多士早餐，始終都係覺得亞坤嘅好味啲～
下午茶完畢再搭ＭＲＴ出發去第二個景點－Gardens by the Bay
喺Bay Front站落車～ 好彩嚟到呢邊已經停哂雨咋～
離遠見到啲超級大樹(Supertree) 好靚好宏偉呀！
我哋選擇咗行入去～ 其實門口都有架要俾錢嘅穿梭巴士可以坐入去Gardens by the Bay門口，S$2一位～ 不過淨係開到五點鐘咋～
呢度仲可以近距離啲影到Marina Bay Sands Hotel添～
Mommy一手篤停隻船呀！ 大家估下呢張相係邊個影嘅呢？
等我為大家揭曉攝影師係邊個喇～ 就係呢位好認真踎喺地下取景嘅Yuki Lam嘞～
攝影師幫人影完，自己都要影返張金沙酒店做背景嘅相呀～
我哋慢慢行下影下，都行咗可能有廿分鐘先嚟到Gardens by the Bay真正個入口～
呢度主要係有兩個展館：Cloud Forest同Flower Dome
先去Cloud Forest參觀下先～ 成個館係一個大溫室？（定係應該叫冷室呢？）入面～
一入門口就俾呢個有十幾層樓高嘅瀑布吸引住喇～
呢度有好多生長得好獨特植物～ Yuki後面其實係一架車表面生哂好多好似青苔咁嘅植物～ 包住哂成架車呀～
點解呢度要叫做Cloud Forest呢？ 原來定時定候喺中段位置會放出水霧～ 即時將成個環境變成好似進入咗雲層中嘅仙境咁～ 咁又真係幾似喺雲中嘅森林喎～
但係喺呢度發生咗件小意外～ 正當我哋要由其中一層搭電梯去另一層之際，因為Yuki行開咗去睇其他嘢～ 咁電梯到佢就跑返嚟喇～ 可能因為呢度多霧水，地面有少少滑～ 就喺最後一個彎要轉入電梯嘅時候就跣低咗～
之但係跌還跌～ 果陣拎住塊波板糖嘅Yuki居然保護得住塊波板糖無跌落地下呀！
不過跟住就慘咯～ 爆喊咗成十分鐘～ 氹又唔得！ 又唔掂得！ 總之咩都唔得～ 淨係話好痛呀！損咗呀！
最後好彩我哋有膠布幫Yuki手踭一塊、膝頭哥一塊，終於唔再喊喇～ 可以繼續！
上到去呢條空中凸出嚟行嘅步道～ 仲好快就變返一貫古靈精怪添～
行完Cloud Forest～ 又行埋隔離嘅Flower Dome喇～ 呢邊樓底無咁高～
但係就種咗好多好靚嘅花～ 真係啱哂嫲嫲呀～ 嫲嫲好鍾意花㗎～
咁Yuki有咩咁古靈精怪呢？ 好似要影下面呢幅合照～
叫Daddy Mommy都伸一隻手指出嚟～ 然後要Daddy Mommy手指篤住手指～
Yuki又唔知同時做個乜嘢動作～
到影完呢張相返酒店睇果陣先知原來Yuki指導我哋做個大心同佢自己做個細心嚟影相呀～ 真係估佢唔到呀～
離開Gardens by the Bay，開始接近日落時間～ 幾棵Supertree著埋燈真係好靚呀～
呢個日與夜交接嘅時間係最靚嘅～
回復天晴加埋風平浪靜～ 呢度嘅景色真係非常正～
呢晚嘅晚餐我哋去咗金沙酒店商場一間叫Todai嘅餐廳食自助餐慶祝Yuki嘅生日～
不過食下食下～到食完之後先發覺原來我哋全晚都唔記得影相喎～ 哈哈！
唔緊要！ 因為今晚仲有啲驚喜安排俾Yuki嘅～
返到酒店後一陣～ 門鐘嚮起～
係酒店送嚟俾Yuki嘅生日蛋糕呀！
Happy birthday to you!
Happy birthday to you!
Happy birthday to Yuki!
Happy birthday to you!
Happy 8 year-old birthday to Yuki!
祝Yuki八歳生日快樂～ 希望你繼續健健康康地長大～ 成日都開開心心快快樂樂～
雖然袛係簡簡單單地一家人同你慶祝生日吹爉燭同切蛋糕～ 希望Yuki你感受到即使唔係一個大型生日會，但係大家都同你過一個充滿溫暖嘅生日！
沒有留言:
發佈留言