印象中對上一次去迪欣湖已經係兩年幾前既事～ 果陣仲係坐ＢＢ車去，剛剛識識地行架咋～
今次就自己踏單車喇～
不過今日唔知係唔係個個都見天氣好好，成個停車場爆滿，有個警衛哥哥叫Daddy放低Yuki同Mommy，再泊過去樂園果邊既停車場，再搭巴士返過黎～
一場黎到，唯有係咁喇～
好曬呀~ 太陽眼鏡都未夠，用埋塊樹葉遮一遮先！
記唔記得上一次我係呢度做過乜野呢？ 唔記得睇返右邊下面既迪欣湖相簿喇～
呢度踏單車感覺仲舒服過科學園單車徑，始終呢度無咁多大單車，危險性相對較低～
一片紫色花海，有Ｄ似北海道架～
Yuki做乜踎係塊石上面呀？人地唔知以為你係度做乜添呀～
迪欣湖慢慢咁行一圈，差唔多兩個鐘，唔長唔短岩岩好～ 下次可以考慮玩埋水上單車～ 今次因為Ｄ四座位出哂去，有排等所以無得玩～
咁去入口旁既公園玩下先走喇～
宜家愈跳愈叻喇～ 係度等搖搖板都要跳返幾下～ 嘻嘻～
Yuki自己嚷住要上既芭蕾舞堂，期待左足足一個星期既試堂終於都到喇～
上堂前十五分鐘去到，有一Ｄ小朋友已經換好衫同鞋係課室門口玩緊～ Yuki因為衹係試堂關係，著番自己普通既衫除左鞋就可以～
一如所料，Yuki唔多肯行埋去其他小朋友度一齊排隊，始終陌生環境，同埋其他小朋友都係未見過既～
好勒，上一堂既小朋友上完喇～ 同Yuki試堂同一班既小朋友魚貫入課室，Yuki都好乖咁排住隊入去～
為確保Yuki萬一中途唔制要出黎搵Mommy，所以Daddy Mommy未敢離開週圍去行街街～ （有過台灣Baby Boss既經驗麻～）
上左應該有五至十分鐘度～ 見到Miss開門，拖住一個喊住既小朋友出黎～ 咦～ 個小朋友無著芭蕾舞裙架喎～
咁咪即係Yuki囉！
出到黎都再喊左陣先收到聲～
跟住Daddy Mommy加埋果度既姨姨等Yuki收聲冷靜後經過一番唇舌，終於肯再入去課室試下～
五分鐘過去，十分鐘過去～ 今次無再出黎喇喎～ 就係咁，去到落堂時間喇～ Miss拖住Yuki出黎～ 同Daddy Mommy講番Yuki第二次入去後主要都係坐係度好專心咁睇其他小朋友上堂跳舞，但就無跟住一齊跳～ 佢話好多小朋友頭幾堂都係咁既情形～
咁Daddy Mommy再問Yuki意願喇：
Mommy:下個星期仲上唔上芭蕾舞班呀？
Yuki: （搖頭）
Mommy: 咁想唔想著芭蕾舞裙同其他小朋友一齊跳舞呀？
Yuki: （點頭）
Mommy: 咁我地下個星期黎想唔可以喊架喎？
Yuki: 我會喊架～
Mommy: 咁我地仲報唔報名黎學芭蕾舞呀？
Yuki: （搖頭）
既然係咁，以Yuki咁飄忽既答案，都係搏唔過喇～ Yuki～暫時唔諗芭蕾舞住喇～
過隔離太古城中心行下，今年農曆新年既主題係懷舊上海～ Yuki即刻回復開心～
好靚既桃花呀～
呢架叫做人力車呀！宜家街度見唔到架喇～
成條懷舊街有好多有特式既店舖，有戲院售票處，理髮店，洋服店～
一期果邊仲有個仿舊歌廳既舞台添呀～
祝你生日快樂! 爺爺!
嘻嘻～ 我地三堂姊兄妹一齊祝爺爺身體健康～
今年辛苦哂伯娘，佢地親手整左個士多啤梨生日蛋糕俾爺爺呀～
難得既正正經經坐定定～ 咁影出黎咩幾靚囉～
唱喇，唱喇～
Happy birthday to you, happy birthday to you, happy birthday to 爺爺, happy birthday to you!!
為左滿足我地一家三口對煲仔飯既狂熱，Daddy對於上個星期食唔到上環名店耿耿於懷，所以今個星期一早打電話落去訂定位先～
呢間煲仔飯名店就係近期報紙都有介紹既坤記煲仔飯～
佢位於上環皇后大道西上既一條橫街內（桂香街），街口係一間麥當奴黎架～ 呢間舖頭仲係用炭黎做煲仔飯架，所以Ｄ煲仔飯煮出黎會特別香～
我地叫左兩個煲仔飯：白鱔排骨飯，鴛鴦腸滑雞飯～
先此聲明，如果大家想去呢間舖頭食煲仔飯，請有心理準備落左單都要等三十分鐘，所以最好叫Ｄ非煲仔食品 食住等～ 聽講佢地既豬骨煲都幾出名架～ 我地等緊既時候仲見到有個哥哥拎住個屋企既湯煲黎買豬骨煲外賣添呀～
講下講下，Ｄ煲仔飯黎喇～
先黎呢個鴛鴦腸滑雞飯～ 一落豉油即刻吱吱聲，好開心呀！
跟住係一齊黎既白鱔排骨飯～
的確係名不虛傳，好味，好味～ 尤其要讚佢既飯焦～ 唔會太厚，唔會太燶，脆卜卜，好好味～
其他地方好多時為左要做到有飯焦，結果個底燶得滯，連Daddy鍾意食燶燶地既都嫌太燶～
呢度既飯焦就非常好勒～大家留意上面幅相，Ｄ飯焦仲係有禾蟲狀架，好耐無見過架喇～
話咁快兩煲都食哂喇～ 煲底可以照鏡添～
Thank you Daddy! 我地幾時再食過呀？
