商場內的背影～

宜家Yuki係商場已經開始進入唔鐘意俾我地拖住行既階段喇～

呢日去到個商場，好快就要落地自己行，好! 又睇下你行去邊先?


咦? 左邊好似有野食喎～　仲好似好香添～ 係ＫＦＣ呀～ 哎呀, 伸哂脷又流口水添!
Mommy你有冇帶銀包呀? 無呀? 八達通呢?



你地睇食飽飽既Yuki行得幾精神爽利～


仲有原來Yuki真係好似Mommy架～
點解? 睇下Yuki同Mommy既步伐同目光既方向幾一致?

不在香港的日子 (番外編)

爭D唔記得將Yuki第一次同Daddy網上聊天話俾大家知添～

事緣重陽節假期果日，Yuki同Mommy好早已經番到屋企，Daddy就係印度用Skype同Mommy chat緊之際，見到Yuki打起電腦BB文喇～


以下內容，全無刪改，保證係Yuki親手提keyboard架～

[10/19/2007 8:02:09 PM] Mommy says: back （呢句Mommy打既）
[10/19/2007 8:02:35 PM] Mommy says: hIHHDEHMN CC
[10/19/2007 8:02:47 PM] Mommy says: Z CXCX


[10/19/2007 8:02:49 PM] Daddy says: 乖女... JJDKFIEJF
[10/19/2007 8:02:52 PM] Daddy says: KDJDIWKNB
[10/19/2007 8:02:58 PM] Daddy says: CXCX?


[10/19/2007 8:03:19 PM] Mommy says: JRHJFNKJ NB \
[10/19/2007 8:03:29 PM] Mommy says: MLO;Q2;;;;;;L0O,;pppppppppppppppppppppppp'
[10/19/2007 8:03:34 PM] Mommy says: pzA:
[10/19/2007 8:33:10 PM] Mommy says: dAJFKJD C;';
[10/19/2007 8:33:34 PM] Mommy says: fffffffffffffffffffffcvvfj
[10/19/2007 8:33:48 PM] Mommy says: zah ygjiuiuu
[10/19/2007 8:33:59 PM] Mommy says: gazyHWzv\
[10/19/2007 8:34:18 PM] Mommy says: xXXXXX'''''''''''''''''''''''''''''''''''''

Yuki～　你既BB文好深呀，Daddy研究到番左香港都仲未明你果日講乜喎！

自己除襪襪~

小yuki識得自己除襪襪，不過可能佢對腳仔太多肉，成日除唔到，咁daddy就幫下佢手囉~

不在香港的日子 (最終回)

Yuki～　Daddy今次呢個blog係第一次o係機場候機室寫架～

點解呢? 因為Daddy搭班機delay左呀～　原本２３：３０，宜家要００：０５～　所以宜家o係孟買機場候機室無所事事下，就為Yuki你個blog寫篇‘不在香港的日子（最終回）’喇～

估唔到第一次搭馬航來回孟買就要delay，下次真係要好好考慮下搭邊間先得啦～

順便介紹下孟買機場，其實係一個好細既機場，４個登機閘口共用一個候機室，無商品，無野行，得個細細個既檔仔賣汽水～

另外你地估下呢個人企係度做乜呢？　佢係度叉緊手提電話既電呀，Airtel係一間網絡商，特登整個有唔同電話牌子既叉電插頭俾人用，又幾好喎～

好啦～　上機喇，瞓番陣先～

呢篇blog橫跨兩日，daddy宜家已經係吉隆坡返香港既途中喇～　剛剛係吉隆坡機場好緊張呀～我地本來有成兩個鐘轉機，但係因為delay成個鐘有多，所以得番一個鐘左右，仲要今次馬航要我地係吉隆坡先可以出到番香港既登機證～　嘩！乜咁多人架！

本來諗住可以坐低食個早餐先上機，最後唯有兵分兩路，我去BurgerKing買野，我同事去拎登機證喇～　拎左登機證，急步走去登機閘口，用左五至十分鐘食左個Whopper餐（因為有汽水，宜家唔可以帶上機）～　好飽～

返香港呢程機好少少，起碼有私人電視，Daddy睇左套虎膽龍威（四）～　第日同Yuki你搭飛機可以開個兒童台俾你睇架～

好啦，開始要降落啦，Daddy要收埋電腦喇，一陣見啦，Yuki～

不在香港的日子 (四)

今日終於黎到倒數番香港尾二既一日喇～




今朝架車失約，所以我地幾個人決定行番公司，其實都係十五分鐘左右～　因為咁所以有機會影下我地住既apartment俾你睇下啦～　都幾靚架～







呢間就係我地上次同今次都食左好多餐既KFC喇～　唔知點解覺得印度KFC既雞好似好味過香港～　Ｄ雞肉好似嫰Ｄ同多汁Ｄ～





跟住食晏呢邊既同事請我地食飯～　行去餐廳果條路都幾爛，你睇Ｄ相同早幾日影Levi's果條街真係爭好遠架～　





沿路仲見到有小販賣果汁，不過我地梗係唔敢飲啦～　咪搞～




我地食野間餐廳樓下仲有間Pizza Hut，不過今次過黎一次都未食過，之前黎果次就食過，但係得齋pizza同有雞肉既pizza咋～　反而daddy今次係公司就食左好幾餐pizza，因為上個weekend大家都無時間出去食野，唯有叫pizza外賣～


最後終於記得影下我地係呢邊個工作環境俾你睇下喇～　我地三個人黎，一人一部電腦，眨下眼就過左八日喇～　Yuki～　Daddy 聽晚搭飛機番黎啦，你星期六就會見到Daddy架喇～

不在香港的日子 (三)

Yuki～ Daddy今日終於都最早一日收工啦～　不過都成八點至走咋～

今晚番apartment姜姐又已經預備好美味既晚餐俾我地喇～　姜姐係一個大連人，大連係一個有好多韓國公司開廠既地方，所以佢o係大連練得一口流利既韓文～

而我地宜家住既apartment，係一Ｄ韓國人因為愈黎愈多韓國公司亦都黎印度開公司，而印度又真係好難搵亞洲野食，所以就成為一個生意機會，佢地索性o係一個apartment裏面租幾個單位，每個單位有三間套房，然後其中一個單位個廳就兼做飯堂～

講番野食～　姜姐一般都係煮Ｄ韓國菜或者中國菜～　雖然唔係太似香港食開既中國菜，但係比起Daddy上年o係你出世之前黎果次住酒店，日日都係食炒飯，炒麵，食足成個月～　姜姐煮既有食住家飯既感覺～　就好似麻麻煮既飯咁～　好味～

今晚姜姐詢眾要求煮左個蟹湯佢我地～　個湯真係好好味既，我另外三個香港同事飲到一滴都無剩，不過Daddy唔食得辣，飲左一D跟住就開始開左個標汗水喉閂唔到掣，係咁滴汗～　不過D蟹好好味呀～～～　（有圖為證架～）

親子智能部落 (14-Oct)

星期日，我去左一個由香港保護兒童會舉辦既親子智能部落活動，呢個活動一年先攪一次，仲要撲飛架～ 　媽咪撲左３張飛返黎比我地一家三口，可惜daddy出左trip，最後就由媽咪同siti姐姐帶我去玩！

一去到媽咪就幫我預約左４個活動：親親大自然，拯救海洋（圖工美勞），故事樂園同埋動感彩虹傘，等我一陣一一介紹下啦！

未夠鐘去親親大自然之前，我地去左自由玩樂天地度玩，可能因為時間尚早，得我同埋我朋友仔係度玩咋，唔記得講本來有好多朋友仔一齊去，但唔知點解全部無晒影，好彩仲有肇言仔同我一齊玩，仲有佢daddy mommy幫我影相相，謝謝～

你地睇下，我玩波波玩得幾開心！

親親大自然其實係將間房佈置成大自然一樣，比小朋友親眼看，親耳聽同親手摸～

拯救海洋其實係做勞作，係大海入面搵Ｄ廢物出黎，發揮創意去做小手工。我咁細個，當然係媽咪做啦！不過唔知點解，我好怕果個用紙碎做出黎既海洋～

故事樂園當然係有故事聽啦，係一個關於環保既故事，仲有我既好朋友winnie the pooh做主角呀！ 我同肇言仔都好專心聽架~

最後既動感彩虹傘，我由好開心玩到喊呀，又係唔知有乜好驚。玩完之後我又好開心咁幫手清理現場，哈哈～

同媽咪兩個人去返PG~

第二堂PG得我同媽咪兩個人去返咋，媽咪帶住我搭ＭＴＲ去返學，仲揹住我行左十五分鐘先去到，本來媽咪想搭的士，但條的士龍好長，我地又去咁近，媽咪有Ｄ唔好意思就無搭到～

返學果陣，我好似Ｄ荷里活明星咁打手印呀，不過我仲犀利過Ｄ明星，因為我打埋腳印！但係媽咪未有時間影相，遲Ｄ先post出黎比大家睇~

外面天朗氣清，所以仲有戶外活動添呀，就係玩車車啦～　你地睇下，我同媽咪去shopping呀~

Daddy 出trip日子~

１４個半月大既小yuki原來已經識得掛住daddy，星期六既早上，六點鐘已經起身要食奶奶，本來以為yuki食完奶奶會再訓覺，點知佢一食完奶，就”dad dad dad”咁叫，係度搵daddy，mommy唯有同佢講daddy返左工～　小yuki都係唔肯罷休，一定要mommy抱佢通屋搵daddy，最後搵唔到都唔訓，要mommy陪佢玩到八點先再訓！

呢個weekend yuki都有斷斷續續咁搵daddy，唔知daddy睇到係咪好心甜呢？

不在香港的日子 (二)

Daddy上次都唔記開番個account先post上黎添～　咁至易D分到邊D係Daddy用番Daddy呢個身份寫架嘛，係咪～

經過四日艱苦抗戰，（尋晚結果都係要成十一點幾至收工），終於今日正式上線～

Yuki～　Daddy見到你尋日玩得好開心喎～　你記得擺上blog同大家分享下喇～

今日Daddy落街食晏影左D相相，呢個係一個新開既寫字樓，樓下有幾間舖頭～　有Addias、Levi’s、Bread Talk，我地就係o係Bread Talk食晏啦。　唔好諗住條街咁濶咁乾淨就以為成個孟買都係咁呀! 其實孟買大部分地方都仲幾舊同幾落後架～　唔信? 睇埋下面幅相相先啦!

呢D就係印度既的士喇～　近呢部係四個轆既的士，似唔似香港粵語殘片果D車呀? 不過，又唔係全部的士都係咁既，宜家都有一部份係冷氣的士架喇～　遠果部就係同泰國果D Tuk Tuk一樣既的士～

不在香港的日子～

Daddy第一次係Yuki個blog用番Daddy既身份親自提筆，今次又因為工作關係，要黎印度九日。

好耐未試過要出黎超過一個禮拜啦～

今次我地選擇搭馬航，經吉隆波轉機，不過要轉機要等成五個鐘。

我同另外兩個同事就諗住既然咁多個鐘就出KL行下喇，之前上網搵過佢既機場快線可以出去市中心，一心諗住係去到KLCC̣̣̣̣(即雙子塔)。　點知到落車果陣先發覺原來祗係去到一個叫KL Sentral既站。　無辦法喇，再轉車去KLCC可能又要成半個鐘，計落唔係好夠時間，所以就咁搵左個Food Court草草食左餐晏就搭番快線番機場～　繼續剩低既五個鐘機程往孟買～

機程途中望出窗外，見到有Ｄ好靚既島，即刻拎架相機出黎影低先～　我諗Ｄ島都無人會去到，島中間都仲好似有Ｄ水添～

今日已經黎到第三日，之前兩晚分別都做到成11PM同1AM，希望今晚唔使咁晏啦～

Yuki～　你今個weekend開心嘛？　上堂同去街街記得要聽Mommy話呀～

參觀退役消防船~

Hi，各位朋友，你地好，呢隻就係葛量洪號啦～












等我替大家介紹一下啦～　呢度就係。。。　果度就有。。。　呢個就係用黎。。。









好啦，介紹完等我擺返個post影返張靚相先~











媽咪，我個post掂唔掂呀？

T1T？～

今日除左番學之外，Daddy Mommy仲帶左我去食下午茶自助餐～　佢地話係去Ｔ１Ｔ喎～　（Yuki～　係Tea一Tea呀! ）

Ｄ食物好似好吸引咁喎!



我都有食到蛋撻，粥粥，飽飽，水果～











好唔好味? 你地睇下我個樣咪知囉～　嘻嘻～











食飽飽就梗係要玩番陣喇～　同班朋友仔玩得好開心呀！

Yuki乜你玩到叉哂腰既?














哎呀， Mommy Daddy救我呀，我俾佢地圍攻呀～～～














好啦～好啦～　大家正正經經咁影下大合照先喇～

（為左令大家肯坐定定影相，我地要出動一樣令佢地個個一望到就會好專心想要既野，就係星星餅囉）

又開學喇～

今次又同番我班老友記一齊上Playgroup喇～

呢度係一間幼稚園開既playgroup，係我第一次踏足幼稚園咋～　
個門口都已經好靚呀～


不過今次又係無得daddy mommy同我一齊上堂呀，祗可以其中一個，咁就梗係mommy陪我上堂，daddy負責影相相喇～

上堂既活動幾接近番幼稚園架～　有做運動，唱歌仔，做勞作喇～

大家睇下我個勞作先啦！











除此之外，仲有茶點時間添喎～Mommy幫我帶左Ｄ餅餅去食～　咦？隔離auntie盒餅餅都好似好好食咁喎～





Daddy! 你做乜o係出面隔左玻璃影我地呀? 我係咪坐得好正經呢?

不過最令我開心又興奮既，就係學校有好多車車呀～　我一小息就即刻搶左其中一架騎出去俾Daddy睇～　



之後小息完仲要唔捨得架車車，你地睇下Miss已經企左係側邊我都仲掛左玩架車呀～

Yummy Yummy~

為食Yuki今日又試新野啦，你地睇下佢食得幾滋味：



大家知唔知Yuki食緊乜呢？就係雞蛋仔啦，Yummy Yummy~