多謝你！ SITI 姐姐！

估唔到呢日咁快嚟到！

陪伴咗我哋六年嘅Siti姐姐要返印尼喇～ 今日係佢last day！

記得六年前Yuki出世前約一個月，Siti姐姐就嚟到我哋屋企，見證住Yuki出世、學行、學講嘢、開始返學、帶Yuki學芭蕾舞、學游水～

我哋屋企以前未請過姐姐，所以初期我哋生活上都要適應～ 漸漸地，姐姐已經變成我哋生活嘅一部分～

有佢喺度呢六年～ 我哋唔需要擔心～ 佢照顧Yuki得好好～ 家務又處理得算唔錯～

所以我哋每過兩年合約期，諗都唔使諗就同姐姐續約～

到咗今年，姐姐決定要返印尼喇～ 佢要返去陪佢嘅仔女同孫喇～

係呀～ 姐姐其實都唔後生，有孫㗎喇～ 佢嚟我哋屋企果陣已經４０歲，所以今年就４６啦～

 

今晚我哋幫姐姐farewell～ 我哋簡簡單單哋叫咗pizza同KFC~ 都係姐姐都鍾意食嘅嘢～

「唔捨得！ 唔捨得姐姐走！」 Yuki雖然漸漸長大，知道姐姐走係不變嘅事實～ 但係呢兩晚都會久不久同Daddy Mommy講唔捨得，唔想姐姐走～

唔捨得姐姐嘅其實又點止係Yuki呢！

爺爺嫲嫲都同姐姐相處咗六年～

Daddy Mommy 亦好唔捨得～

「Siti姐姐，多謝你帶俾Yuki呢六年健康、開心嘅時光！

希望你返去印尼之後生活愉快！」

我哋仲製作咗一隻９０分鐘嘅DVD俾姐姐～ 裏面有由Yuki出世第一日都宜家嘅生活記錄～ 雖然花咗幾個星期嘅時間，搵返呢六年嘅所有video出黎剪輯，辛苦得嚟係值得嘅～ 希望呢份係姐姐最鍾意嘅禮物！

雖然Siti姐姐未必識得睇中文，不過都希望佢得閒嚟睇下Yuki嘅blog! 繼續見證住Yuki成長！

Bye Bye!  Siti姐姐!  We will miss you!

（爭啲唔記得同大家講，新嘅姐姐已經嚟咗喇～ 佢又係叫Siti姐姐㗎！）

端午不游龍舟水

端午節本來係去游龍舟水嘅好時候～ 但係今年實在無辦法同Yuki去游喇～

因為今年我哋要忙於準備搬屋喇～

宜家我哋將會搬去嘅單位無傢俬，所以剛剛呢個星期新買嘅一啲傢俬已經送到新屋～

但係因為啲傢俬係宜家同無印良品嘅，所以Daddy要自己安裝呀～

俾大家睇睇Yuki房嘅衣柜～ 柜桶未裝好，遲啲俾大家睇完成品～

另外呢張係Daddy Mommy嘅床～ 今日要爺爺幫埋Daddy一齊砌㗎～

不過雖然明知呢個端午節好忙，但係我哋都要食餐好嘅嚟慶祝端午節㗎嘛～

所以早兩三個星期我哋就已經預訂咗出名嘅「屏山傳統盆菜」嘞～ 即係上次去大舅父屋企食過果間囉～

傍晚五點左右，Daddy、Yuki同爺爺一齊開車入元朗屏山攞盆菜～ Mommy因為要繼續執嘢，所以就由爺爺陪我哋去攞囉～

車程大約五十分鐘去到屏山～ 睇個招牌都知歷史悠久喇～

嚟到門口，如果唔係個招牌寫住都唔覺係賣盆菜呀～ 似係一間賣古董物品嘅舖頭多啲～

牆上插咗好多相～ 最當眼嘅位置有幾張發哥（周潤發）嘅相～

另外下面右手邊果兩張好壯觀呀～ 係咁易計下起碼都有六七十盆～ 如果現場睇到一定好震撼～

又過咗五十分鐘，返到爺爺嫲嫲屋企喇～

登！登！

唔好睇小呢個細盆菜～ 有雞、蝦、冬菇、魚丸、豬肉、魷魚、枝竹、豬皮、蘿白～

我哋仲諗住個細盆菜未必夠食，（因為話係六至八位用）所以另加咗一隻神仙鴨～

食落先發覺點解食極個盆菜都係咁滿嘅～ 其實個細盆菜十個人食都應該夠呀～

之不過呢間屏山盆菜真係好好味呀～ 啲枝竹豬皮蘿白索哂啲湯汁，又無味精～

另外隻神仙鴨又係用咗秘方炮製，非常入味～

明明已經好飽，但係都繼續食，繼續食～ 價錢一啲唔貴～ 加埋七百蚊左右～

如果大家未試過，又有興趣的話，不妨一試～

《屏山傳統盆菜》

Happy Father’s Day

今日一早起身，Yuki就走埋部琴度自彈自唱咗一首歌送俾Daddy喇～

不過今年嘅父親節我哋過得比較忙呀～ 因為我哋要準備搬屋喇～

之但係Yuki都好乖咁準備啲親手造嘅嘢喎～

就係下面嘅呢張卡同手繪恤衫嘞～

（睇啲顏色同花紋，似係夏威夷恤噃！）

 

除咗呢啲親手製作嘅禮物之外，今日係冰之驕女學溜冰日～ Yuki另一樣送俾Daddy嘅禮物就係做得好好嘅飛機啦～ 隻後腳終於拎得起喇～ Very good!

夜晚我哋會同伯伯一家同爺爺嫲嫲一齊去晚飯慶祝父親節～

今次有伯伯好介紹，去咗西環嘅德記潮州酒家～ 原來呢間食肆好多人㗎～ 我哋食六點第一輪就唔使等～ 我哋食完走嘅時候門口已經企滿哂人等位喇～ 簡單一句，樣樣嘢多幾好食～ 值得一試～

 

Yuki好乖地有夾餸俾Daddy、爺爺同伯伯呀～

Daddy要多謝Yuki帶來第六個好開心嘅父親節俾Daddy～

邁向小學之路

Yuki將會讀嘅小學終於塵埃落定喇～
經過統一派位分配～ 非常幸運地，Yuki派到本區第一志願嘅香港嘉諾撒學校～ 嚟緊嘅九月份就會喺呢度返學～
選擇呢間學校嘅原因係因為佢有一間中學部女校，小學就係男女校～ 兼且中小學校風都幾好㗎～
上星期Mommy就幫Yuki去咗嘉諾撒註冊～

今日就係第一次家長日～ 終於有機會去睇下呢間學校～

中學同小學其實係埋一齊～ 左邊籃球場就係屬於小學（小學用粉紅色），右邊兩個籃球場係屬於中學（中學用藍色）～

呢度將會係Yuki嚟緊六年，甚至可能係嚟緊十二年渡過珍貴童年同青少年回憶嘅地方～

今日嘅家長日其實家長同小朋友分別都有活動～ 小朋友會跟隨老師去課室，作為第一次開始認識一下學校～
家長就會聽下老師講解由幼稚園進入小學要留意嘅事項～ 同埋幫Yuki買書、買校服、交校車費～
Yuki自己坐咗一陣就週圍望，但係居然無發現Daddy影佢喎～

哎呀！發現喇～

小學部嘅範圍，有一個叫「嘉樂園」遊玩地～

脫離幼稚園，學校嘅佈置無哂啲卡通公仔～ 但係都仲不失充滿著小朋友氣息嘅繽紛色彩～
操場旁邊就有個好colorful嘅English Room～

希望Yuki嚟緊嘅日子會繼續開心愉快地學習同成長～

冰河世紀

呢幾個月，香港有一隻從冰河世紀嚟嘅朋友～

今日原來係佢最後一日喺香港喇～ 好彩今日去開尖沙咀，原本諗住無帶全年証都去睇下喇～ 點知原來係免費參觀，仲要剛剛係最後一日添～

佢就係從冰河世紀嚟嘅長毛象ＢＢ～

佢嘅名叫－柳芭(Lyuba) 呢個名係發現佢嘅牧鹿人改㗎～ 其實係個牧鹿人太太嘅名～

柳芭出生於距離宜家四萬年以前嘅大草原～

好可惜，佢袛係出咗世三十二日就離開咗佢嘅媽媽～

根據對佢作出研究嘅科學家指出，柳芭極可能係橫過河流時俾沼澤泥土吸住，因而無法脫險～

就係咁，呢隻長毛象ＢＢ因此漂流過四萬年時空於2007年5月被西伯利亞一個以放牧馴鹿為生嘅人－尤利先生所發現～

 

拜拜喇長毛象ＢＢ柳芭～ 離開香港之後唔知佢會去邊呢？

睇完長毛象ＢＢ，再喺尖沙咀閒逛一下～

嚟到無印良品，又係Yuki嘅試筆時間～

Yuki試筆已經由早前寫自己嘅名，進化到變成畫公仔喇～

當然都會畫佢至愛既公主們喇～

除咗喺無印試筆，行過隔離一間舖頭，有一個姐姐做緊顏色筆推廣～ Yuki毫不客氣就行埋去試畫～

呢隻顏色筆比較特別～ 介乎木顏色筆同水彩之間～

好似唇膏咁擰支顏色出黎～ 唔使用水就油到顏色出嚟～ 神奇在有一支好似入得水嘅毛筆，油落去頭先嘅顏色度就會有水彩畫嘅效果～

Daddy見Yuki愈畫愈起勁～ 畫完一梨花，跟住花外有煙花～ 一於唔騷擾佢，俾佢畫咗廿分鐘都有～

完成作品就係咁喇～ 有埋蝴蝶同蜜峰～ 而個「父親節快樂」係返屋企再加落去嘅，Yuki話當父親節咭送俾Daddy~

呢套顏色筆要三百幾蚊，日本製造～ 宜家推廣送多一套十二色替換芯（價值百五）

Yuki畫果陣唔好意思影套顏色筆～ 返嚟上網搵返俾大家睇睇～

不過我哋無買到呀～ 因為Yuki屋企已經太多顏色筆喇～ 未開嘅都有幾盒～ 更重要嘅原因係唔想Yuki覺得太容易就可以買新嘢喇～ 要珍惜自己已有嘅嘢先得㗎嘛～

靠自己起步了

今日去Ken叔叔屋企探佢哋剛剛出世嘅BB～ 即係Rachel嘅妹妹～

我哋坐左一陣就一齊落去樓下大空地踩單車～

兩個小朋友都好乖，做足安全措施～

Rachel妹妹好叻呀～ 已經唔使用輔助轆喇～

Yuki經過最近兩三星期同Daddy去太古城訓練自己起步…  今日終於有啲成績睇下喇～ 自己識得由停低起步，Daddy宜家唔使跟住Yuki跑喺佢後面喇～ 舒服哂～

Yuki今日條裙內有褲㗎，大家放心～

踩完單車加一個猜包剪揼直擊～

Yuki同Rachel猜～ 兩個都興高采烈地開始～

猜嬴嘅一盤：Yuki揼、Rachel剪～ Yuki偷偷笑～

猜輸嘅一盤：Yuki包、Rachel剪～ Yuki一臉錯愕兼伸脷～ 哈哈～

多謝Ken叔叔嘅招待，下次再玩過！

再遊海防博物館

終於有一個放晴嘅週末可以接觸下陽光喇～

約咗好朋友Arthur一齊去香港海防博物館～

上一次我哋嚟好似唔係太耐之前～

都有影下呢啲裝甲車、坦克車～

不過今晚用搜尋功能搵返yuki個blog～ 原來上次嚟已經係2009年3月～

即係Yuki未滿三歲嘅時候～ 見＜香港海防歷史＞

今日真係非常好天～ 太陽猛到要戴返副太陽眼鏡添～

下面呢個係射程測距器～ 望過對岸就係鯉魚門口三家村～

海防博物館位處嘅鯉魚門炮台～ 建於１８８０年代～

於剛改建前仲見到個炮台遺址有一間間倉庫／房間～

宜家已經變成一間間展館～

今次又俾大家學另一樣香港歷史喇～

原來日治時期，好多香港嘅街名都被冠以日本名稱～

好似「皇后大道東」原來叫「東明治通」，「彌敦道」原來叫咗做「香取通」～

二樓更設有一個兒童角～ 有畫紙同顏色筆俾小朋友隨便畫畫～

Yuki就即睇即用地畫咗一幅海事戰爭打仗嘅圖畫～

 

呢兩塊紙板公仔，今次Yuki夠高影喇～

今年買咗香港博物館全年證～ 希望下一次唔使等另一個三年再黎喇～