Daddy今日不得不要出番篇post等Yuki將來自己睇番先!
話說今日朝早Yuki如常陪Daddy刷牙兼剃鬚，Yuki就坐係側邊刷牙仔～
正當Daddy剃鬚剃到一半之際，Yuki刷牙刷到D泡泡就黎滴落件衫度，Daddy於是一手繼續剃，一手伸去幫Yuki抹，說時遲那時快～ 哎呀～ Daddy俾剃刀界損左，仲流血添！
如是者，Daddy抹一抹D血，呢個晨早親子時間暫告一段落～
好喇～ 戲肉黎啦!
今晚Daddy Mommy帶Yuki返爺爺麻麻屋企喇～ 到Daddy Mommy要臨走返屋企同Yuki講Bye Bye果陣～ Yuki捉住Daddy隻手細細聲講左句野～
Yuki:「Daddy...剃鬚..小心D...」
Daddy:「知道喇～ Yuki～」
原來Yuki過左成日都仲記得Daddy陪佢既時候剃鬚整親呀！嘻嘻！
數碼港今年聖誕節又有個嘉年華喇～
不過我都仲係細個，有部份既遊戲設施都未係好岩我玩～
例如我後面呢個成層樓高有多既滑雪人滑梯～
無得玩～ 影下相都好喇～
我玩左既有呢個吹氣跳跳射籃～
仲有就係玩左呢個好似爬山咁既〔登陸大包山〕～ 好好玩架～
好攰喇～ 無力行，要踎番陣先～
溫馨提示：呢個嘉年華會開到元旦2009年1月1日!
每年除左生日，收得最多禮物一定係聖誕節！
尋晚返到屋企，就收到一大個包裹，係由加拿大寄出，一定係契爺啦！ Mommy 打開個箱，拎完一樣又一樣，攪到我不停問：仲有咩呀？仲有咩呀？
原來入面有靚衫衫一件，聖誕襪一隻，會唱歌跳舞既雪人公仔一個，仲有好好用既 cream cream 三支！
你地睇下我同雪人影相時幾咁開心, 肉緊又擺晒 pose 就知我好喜歡佢啦！契爺，Thank You!
至於呢隻鴨仔，就係同 Ellen 姨姨，蚊姨姨，恩舅母交換禮物得返黎架，我都好鍾意架！
仲有其他禮物，好似 Linda 姨姨送既 Melody 玩具, 我日日都叫 Daddy Mommy 俾我拆開佢，但佢地話要聖誕節先可以拆！除左禮物，我仲收左幾封利是，係嫲嫲，姨婆同太婆俾我架，多謝晒咁多位！
今個星期開始海洋公園有聖誕主題喇～
因為黎緊兩個週末都可能唔得閒入去，所以趁今日空閒少少，入去睇下有乜玩先！
估唔到今日居然唔係好多人喎～ 最近入口既停車場都仲有得泊！
係門口度仲有個職員哥哥可以幫人影相，當然佢會先用佢部機幫我地影埋啦～跟住用我地部機再幫我地影～
原來宜家科技可以先進到咁！ 睇左呢幅相先～
話說果個哥哥用部單鏡相機幫我地影左一幅同呢幅一樣位置既相之後，就俾左個號碼紙俾我地，仲話即刻可以去入口左邊個COUNTER睇相～
我地影完就慢慢向入口進發喇～ 前後肯定無五分鐘，最多兩三分鐘，一去到果個COUNTER，見到我地幅相已經印好左！嘩，犀利呀！
就係呢幅喇～ 仲有一幅係有特別效果添呀～
你地睇下我地手上面有乜野動物？
講得係聖誕主題，當然有聖誕老人喇～ 呢度係Ho Ho Ho列車入面～ 今日真係少人呀，排左十分鐘左右就入到黎喇～
Mommy仲幫Yuki買左個聖誕鹿既帽連披肩，用黎俾Yuki呢個星期學校既時裝表演著～ 嘻嘻～
Yuki～ 你好似係度唱緊聖詩咁播～
呢度有好多好多聖誕樹呀！
係呀，有成200棵呀～
宜家Yuki有時除左識得主動話好辛苦要抱之外，仲識得主動話要「騎膊馬」添架～
宜家香港既商場競爭實在激烈! 繼MEGA BOX見過有免費五小時(消費$500)之後，原來另一個名牌商場「圓方」居然要做到有六小時免費泊車，仲要衹係消費$180就有！
我地都有一陣子無去過呢個場，襯今日有Ｄ時間，又想去尖沙咀走走～ 好！圓方我地黎喇～
呢度有好多佈置都唔知算唔算係聖誕佈置～ 不過大家都係咁影，我梗係唔好執輸喇！
例如大象同聖誕有乜關係呢？
「Yuki! 你呢幅相對手仔咁樣合埋，好似人地Ｄ外景新聞報導員咁既？」
呢！ 最似聖誕既佈置都算係呢Ｄ「聖誕樹」，不過紅色既？
隨意搵左間餐廳食個Lunch～
等野食之際，等我教下Mommy做Ｖ字手勢喇！
「Mommy，你都唔使攝入鏡架～」
「哎呀～
我跌喇～」
食飽飽，伸展下先喇～
結果...我地當然用唔哂果六小時免費泊車啦！ 拜拜～
今日係學校既聖誕聯歡會～
係我第一次上台表現呀！ 好喇！ 要排隊準備上台喇～
後面果位同學，我件背心就黎甩喇～
明明前面兩幅排隊上台之際大家都好地地～ 點知上到後台等候出場果短短一兩分鐘之內，好多小朋友係台上個幕打開之際，個個喊到眼仔都紅哂～ （相中包括 左一:小朋友，右一:小朋友，右二：Yuki)
睇下Yuki喊到鼻仔都有Ｄ紅～ 不過起碼無繼續喊～ 嘻嘻～
好啦，開始表演喇～ 老師好努力咁帶領小朋友做動作同唱歌～
從相中所見，粉紅衫組最叻，大部份小朋友都真係有做下動作～ 至於綠衫組，可以見到大家望緊唔同既方向，至於黃衫組（即係Yuki果組）佢地係坐係地下既～ 有一兩個仲喊緊，其餘果Ｄ好似坐係度睇Ｄ家長們多Ｄ～ 可能佢地諗緊點解今日咁多相機影我地既？
表演完落左台同Mommy影幅合照先喇～
之後三班幼兒班都表演完喇，全部人上台影大合照，Yuki好叻呀～ 自己一個企上台同好多好多既同學同家長一齊影合照呀～
係禮堂表演完就返課室繼續聯歡會，唱歌，同今個月生日既同學仔慶祝～
咦～ Yuki～ 你既聖誕樹勞作呀！
最後仲有個小丑哥哥整Ｄ吹氣公仔俾我地呀～
佢整左一隻bear bear俾我～ 不過係學校唔記得影相，返到屋企樓下見到聖誕樹同雪人影相果陣就有埋bear bear 上鏡喇～
希望明年K1既聖誕表演我地會淡定Ｄ喇～
