關西京阪紀伊半島８天遊：七至八日目(8/28-29)

喺蒲島酒店朝早起身～　望向窗外天色好好～　

一早起身～　食早餐之前先去浸個晨早溫泉先喇～　
呢朝我哋搭酒店嘅超長上山自動電梯～　去山上館果邊嘅溫泉～

呢個叫天海之湯～　喺山上望向海嘅感覺同前一晚喺海邊浸頗唔同～　因為呢個係大浴場～　唔可以拎相機出嚟影呀～　俾唔到大家睇～

晨早浸過溫泉～　好醒晨～　跟住返落嚟食早餐喇～　
早晨都係自助餐式～　

好喇～　我哋要Check-out離開蒲島喇～　上船喇～　

當架船逐漸駛離碼頭～　碼頭上嘅職員一直向住我哋揮手拜拜～　Yuki亦回應佢哋講拜拜～

呢架就係載我哋來往蒲島酒店果架船喇～

蒲島酒店確係一個幾特別嘅酒店～　希望有機會第日再嚟過喇～

之後拎返架車我哋由伊紀勝浦向返和歌山方向出發～

中途經過呢條好長嘅河－熊野川～

行下行下另外又見到啲日本風力發電機一排咁喺山上面～

Daddy做司機～　Yuki同Mommy就喺後座玩Selfie～


睇下Yuki越影越高興～　小女孩長大了！

去和歌山車程超過百幾公里～　中間都係要搵啲嘢食下先～　喺呢個大SA有幾多嘢食呀～

和歌山拉麵～　雞軟骨丸丼～　牛肉丼～

開飯喇～　いただきます！

今日可以話係返香港前最後一日活動喇～　所以我哋留返半日時間Shopping～
Shopping去邊度好？　梗係outlet喇～

呢個叫Rinku Premium Outlet其實好近關西機場～

呢度有穿梭巴士來回關西機場㗎～　我哋嚟咗一陣已經有收獲喇～

行到攰攰哋～　有Yuki好鍾意嘅crepe喎～

一個人食得哂咩？　等Daddy幫吓你喇～

又一女兒長大了的例證～　睇下Yuki呢幅相倚欄甫士～　變成少女了～

呢個Outlet都真係幾大下～　行極都行唔完～

行過天橋又有另一邊～

行到天黑喇～

快啲食埋嘢，仲要揸車去和歌山酒店check-in呢～

Yuki今次旅行好似第一次食兒童餐呀～

Daddy Mommy嘅沙津、牛肉、韓式石頭飯～

揸返半個鐘左右嚟到和歌山站嘞～

呢間Dormy Inn Premium原來每晚九點後仲有免費宵夜供應～　就係拉麵嘞～

仲係一啲都唔馬虎～　即叫即煮㗎～　好味～　

話咁快又到今次旅程最後一天～　
瞓醒望出窗外～　原來見到和歌山城喎～　

十點幾嘅機返香港～　所以一早就趕住揸住架車去機場還車～　
Check-in埋行李先食嘢～

呢間西餐有呢個幾得意嘅咸Pancake～

今次關西京阪紀伊半島８天遊嘅最後一餐喇～　

臨上機～　同喺香港嘅爺爺嫲嫲通個電話～　今晚見喇～

香港到着～　今次嘅旅行雖然喺無乜準備之下出發～　但係袛要一家人一齊～　去邊度～　玩乜嘢～　任何天氣都影嚮唔到我哋嘅心情嘅～

期待下一次旅行喇～　再會～　またね～

關西京阪紀伊半島８天遊：六日目(8/27)

白濱館嘅早餐係傳統日式早餐～　都係去個餐廳度食～　

通常呢類溫泉旅館都係每間房俾你坐一張枱～　所謂一張枱其實都已經係兩張枱拍埋一齊～　所以我哋三個人坐超級濶落～

早餐亦係和式早餐～　

即係有煎魚、有飯、有納豆～　另外特別少少嘅有豆腐湯～

喺白濱館Check-out後，我哋再向南下去另一白濱景點「三段壁」～

三段壁係一個高５０－６０公尺嘅懸崖峭壁～　

喺海邊非常壯觀～

呢朝天氣非常好～　太陽非常猛烈～　我哋泊停架車果陣Yuki唔記得拎太陽眼鏡～　所以影相果陣Daddy袛好借副太陽眼鏡俾Yuki戴住先喇～

三段壁另一觀賞點就係搭電梯落去洞窟～　呢度曾經係一千三百幾年前熊野水軍用嚟藏身嘅地方～

喺海邊近距離感受巨浪拍打埋嚟～

之後我哋再向紀伊半島東南端出發去Mommy一早預約咗嘅親親海豚活動～

呢度叫Dolphin Base～　要預先預約～　喺預定時間前十分鐘左右到達～

有呢啲類似潛水衣供應俾大家著～　自己著泳衣喺裏面～

跟住步行幾分鐘到海邊就見到啲海豚喇～

導師會分幾個小組～　每組四至六個人坐嚮水邊～　跟住佢哋就會叫啲海豚游埋嚟講解海豚嘅生理構造、習性～　

仲會俾海豚同我哋近距離接解摸下佢哋添～

原來海豚條尾好硬㗎～

跟住仲有同每個人Kiss kiss面珠添噃～

跟住最精彩同好玩嘅環節喇～　就係有十分鐘自由時間俾大家落水裏面同海豚一齊游水呀～

海豚嘅背鰭好強壯～　可以帶住我哋喺水度游～

Yuki由本來驚驚哋～　到後來同海豚玩得超開心呀～

呢個真係好難得嘅與海豚近距離接觸體驗～　非常值得去！

玩到好肚餓～　但係海豚果度無嘢食～　唯有揸住架車沿路搵嘢食喇～

經過呢個唔算大嘅休息站～　唔理咁多～　停低架車醫肚先喇～

基本嘅日本拉麵、吉列豬扒、鮪魚丼～

再往另一那智著名景點－－那智瀑布～

先要行經好多級樓梯～

見到那智瀑布喇～　真係好宏偉又壯觀呀！

那智瀑布高１３３米～　即係有成四十層樓高架～　可想而知啲水沖落嚟有幾震撼～

睇完哂～　臨開車Yuki梗係要整返支軟雪糕喇～　宜家啲軟雪糕真係多味道～　黑糖味、櫻花味～

呢支好似係桃味加雲呢拿～　

趕時間～　走喇～　

今晚入住嘅酒店好特別～　要泊低架車喺岸上～　然後坐船先去到嘅酒店～　架船都細細哋～　我哋拎住喼袛可以就咁放喺座位側邊咋～

嗱～　離遠岸邊就係我哋今晚住嘅－－浦島酒店喇～

上到房剛剛趕得切睇日落～　好靚呀～

Yuki小姐倚窗睇日落睇得幾寫意～

哈哈！其實扮㗎咋～　影到背後～　笑到見牙唔見眼呀～

食晚飯前～　我哋book咗個貨切風呂自己一家三口浸～　

呢個露天貨切風呂望住個海，好近海邊～　一邊浸一邊聽住啲海浪聲～　然後一邊天色漸暗～　

俾大家感受下有幾近喇～

好喇～　浸完溫泉係時候食飯喇～　

經過酒店正門～　原來有個牌喺度俾人影相留念喎～　平成２７年８月２７日～

呢間酒店嘅晚餐係食自助餐嘅～　可以自己鍾意食乜就食乜～

Mommy好鍾意食呢款紅豆湯丸甜品～　Yuki幫Mommy拎咗一碗～　Mommy就食到咀lam lam~ 因乜事Yuki咁嘅樣呢？

食飽飯～　仲有多個節目呀～　就係check-in果陣每個有小朋友嘅房間都會送一包小煙花㗎～

雖然呢包小型啲～　但係Yuki一樣玩得咁開心㗎～