唔覺唔覺，原來已經兩年無去過海灘喇～
上一次嚟原來係１１年暑假～
今次雖然已經星期六朝早嚟，但係都無哂錶位，所以都係要泊喺私人停車場～ 貴啲都無辦法喇～
今日另一個目的就係Daddy想真正咁試下部新防水相機，用熟啲等遲啲去布吉旅行用起嚟得心應手嘛～
用上邊果兩隻爪，Yuki同Daddy掘咗個小水池出嚟～
小朋友玩沙，真係永不言倦～ 呢兩隻蟹整得好唔好呢？ 估下係邊個整嘅呢？
玩下玩下，原來成一點幾喇～ 唔怪得之肚餓喇～
行返上斜路搵間士多食吓嘢喇～
為去布吉島做準備，訓練Yuki飲吓椰青先～
宜家呢啲士多幾犀利呀！ 以前淨係得餐蛋麵、炸雞脾之類～
但係宜家餐牌多好多嘢～ 有泰式嘢食，我哋就叫咗碟「匹泰」～
泰國嘢之外，仲有Pizza添呀～ 呢個係Yuki自己order嘅～
Yuki乜食完嘢都肚仔扁扁咁？ 唔通食唔飽？
食完嘢，繼續玩水～
呢塊就係上次喺反斗城買嘅滑浪板～
今日浪唔係好夠，勉勉強強滑得少少～ 不過Yuki都玩得幾開心呀～
更開心嘅係向Daddy嘅防水相機攻擊呀！
救命呀！ Splasssssh!
第一次玩自己嘅滑浪板：滿意！
第一次實測部防水相機：滿意！
暑假快將來臨～
megaBOX準備好今個暑期嘅主題－Winnie The Pooh and Friends
以為Yuki已經唔記得咗呢班佢ＢＢ時期鍾意嘅公仔～
點知今日溜完冰同Daddy Mommy講話要同Pooh Pooh影相喎！
呢個係Tigger，唔係tiger呀！
（Yuki同我哋影相都無攬得咁實呀～）
睇下！攬Piglet直頭係環抱添㗎～
Eeyore個身肥少少，攬唔到咋！
仲有呢隻袛可遠觀成兩三層樓高嘅Pooh Pooh!
五樓中庭之外，仲有九樓有Ｑ版Tigger同Pooh㗎～
另外話俾大家知～ megaBOX十樓開咗幾間新餐廳呀！ 有Pepper Lunch、一間印度餐應同CoCo壱番屋～
我哋今日第二次幫襯CoCo壱番屋～
日式咖喱實在係啱哂我哋～ 因為日式餐廳必定好照顧小朋友！
Yuki諗都唔使諗，一定係叫兒童餐～ （不過唔記得影添！）
Daddy同Mommy叫嘅就可以揀辣度同飯嘅份量～
呢個奄列飯咖哩個蛋做得好有質素！
靜雞雞話俾大家知，最後呢三張其實係試機相嚟㗎！ Daddy為咗暑假嘅布吉之旅專登入手一部防水全天候相機呀！ Shhhh...
尋日考埋一年級最後一日試～ 終於可以放鬆一下喇～ 今日即刻有得玩！
今日係小學同學仔－凱晴嘅生日派對～
去到生日會場地麥當奴，見到幾個同學仔～
考完試大家玩都玩得零舍開心呀！
呢位係Yuki其中一個小一好朋友－樂童～ 今日特登著公主裙出席生日會～ 今日生日會嘅服飾主題係華麗服～ Yuki加條珠鏈即刻都變咗華麗服？！
玩遊戲時間到喇～ 排好隊先！
先玩呢個兩人一組嘅遊戲～ Yuki捉實樂童做一組～
個遊戲係由麥當奴嘅姐姐講出唔同嘅身體部份，小朋友就要將果個部份貼住～
唔講咁多，睇下就知㗎喇～
背脊對背脊！
肚腩對肚腩！
心口對心口！
手指對手指！
姐姐愈講愈快～ 跟唔切喇～
跟住到另一個遊戲～ 叫「收買佬」！
姐姐會講佢要啲乜嘢，小朋友就要即刻去搵果物件，鬥快拎出去俾姐姐！
為公平起見，所有小朋友先要將手放喺姐姐前面張枱面～
「紙巾」「八達通」「兩蚊銀」「外套」「薯條」「雞翼」 哈哈！
睇下每個小朋友一齊飛奔返埋Daddy Mommy度拎嘢幾緊張！
玩完遊戲，每個小朋友獲贈眼鏡一副～
呢身就係Yuki自選嘅華麗服嘞～
生日會將入最後亦係最重要嘅部份，切蛋糕喇～
吖！唔記得講今日好特別～ 係Yuki個同學同時兩姊妹一齊開生日會，一個７歲，一個９歲～
Happy Birthday to you!
１Ａ班同學陪壽星女合照～ 右三果個就係壽星女喇～
每位出席嘅小朋友都有禮物收㗎！ 多謝凱晴！
呢個星期係Yuki一年級最後期考嘅考試週～
所以即使今日係端午節假期，都要留喺屋企溫習！
溫咗一整個上午，食晏一於搵啲好嘢食下喇～
近近哋有乜新嘢未食過呢？
早排有見過有報導屋企附近開咗間特別嘅日式拉麵店～
距離屋企五分鐘都唔使，據聞平時好多人要排隊㗎～
今日好好彩！ 可能因為端午假期，無咗辦公室果啲人潮～
呢間叫做：俺のつけめん專門店 （譯：我的拈麵專門店）
一入裏面見到牆上好多日文～ 因為呢間舖頭係日本大廚主理～
店面細細～ 十五個座位左右～ 但係已經有兩枱日本人幫襯，所以相信呢度嘅質數應該唔差！可能因為呢個原因，兩位侍應姨姨都講得一口流利日文㗎～
拈麵喺香港未算好流行，所以為防大家唔識點食，牆上貼咗一張進食拈麵五步曲！
幾枝調味用品俾大家使用～ 樽昆布醋據講會令啲湯好味啲㗎～
我哋叫咗兩碗麵～ 劃一價錢，但係可以俾你自己剔麵嘅份量（少／中／多）、叉燒份量～
嚟喇！ 好嘢有得食！
咦！ 點解塊紫菜好似有啲字嘅？ 搵另一碗睇真啲先～
原來塊紫菜上面有印咗間舖頭嘅名呀！ 好得意喎！
Yuki溫書溫到好肚餓～ 但係嘢食嚟到都未食得住，要俾Daddy影埋相先！ 哈哈！
拈麵嘅食法係好似我哋食撈麵咁，夾起一注麵然後浸入湯，等麵條沾滿湯汁就可以『雪雪』聲咁食嘞～
食哂麵之後，侍應姨姨仲會幫你可啲清湯落個碗度俾你飲埋啲湯㗎～
好嘢！ 食飽飽又要繼續返屋企奮鬥喇！
