日本新潟苗場七天滑雪之旅(12月24日)

呢次對我哋嚟講絕對新嘅挑戰！

除咗出發同返嚟香港果兩日用喺交通上，其餘五日全日就係滑雪、滑雪同滑雪！　嘿嘿！

經過上年同Yuki去韓國學咗一日之後，第二日又因為朝早已經太攰而放棄咗，今年打心一橫…

Daddy一於掹車邊跟同事Joyce姨姨報名發燒級滑雪團～　務求不止Yuki，連Daddy同Mommy都必須嚮今次旅程學識滑雪～

呢七日我哋嘅目的地就係下面呢個位於新潟苗場嘅滑雪場同所屬嘅王子酒店嘞～

出發日一早七點幾就機場集合～　

我哋唔係「三個小生去旅行」，而係「三個小朋友去滑雪」～　三個年齡加埋都未夠廿歲嘅小朋友，旅程中有歡笑、有口角、有冷戰、有眼淚！

準備入閘喇～　去到東京再見！

到達東京成田機場，上埋旅遊巴士向苗場進發～　日本宜家好早就開始天黑～　四點左右已經開始日落喇～

本來應該三至四個鐘可以由東京去到苗場！　點知…

東京大塞車！上咗車兩個鐘我哋都仲喺東京市區！　本來兩個鐘左右我哋應該去到中途休息站食嘢…

慢慢塞… 慢慢行… 　終於用咗三個幾鐘成七點幾先嚟到一個最近嘅休息站咋！　

呢個休息站唔算大，不過都有啲嘢食醫吓我哋個肚～　

嚟到日本第一杯嘅軟雪糕！　又滑又好味～

大家快手快腳唔使一個鐘上返車再繼續向苗場進發～

再經過咗兩個鐘嘅車程，最後晚上十點終於嚟到苗場滑雪場酒店喇～　大家快快搬好自己行李同滑雪用品上房，準備聽日開始嘅五日全天候滑雪喇～

聖誕派對中獎了

又到咗屋苑一年一度嘅聖誕派對喇~

今日本來天氣都唔錯，但係到咗開始時間下午兩點左右，居然落起雨嚟～　搞到啲戶外攤位遊戲要即刻搬返入有瓦遮頭嘅地方～

但係無損大家嘅心情㗎～

照樣排隊拎棉花糖食～

至於玩嘅項目有咩呢？　

小丑大板牙！

俾Yuki打甩牙！

呢個射箭都幾考小朋友手指靈活度～　Yuki都射咗幾次先成功！

非常認真地瞄準～　結果係…  總之有嘢送喇～

跟住呢樣犀利囉～　玩完一次再一次再一次再一次到唔知幾多次～

用個鎚打低啲咕臣～　連環鏡到睇到Yuki真係咬緊牙根咁打㗎～

再落嚟呢樣係咩呢？　用係咬牙切齒咁抛嘢嘅？

哦～　原來係用豆袋抛跌啲罐呀！

好嗱！　最後玩返啲文靜少少嘅嘢喇～　十秒內佈置聖誕樹～

戲肉到喇～　抽獎時間！　大家即刻圍哂埋嚟～

呢啲就係頭五獎～　頭獎係iPad Air一部～

嘩！　Yuki同爺爺中獎呀！　咁中咩獎先？！

嘿！　原來係惠康＄５０禮券～　都好！　起碼有獎～　比上年有進步！

喺度預祝大家今年有個開心愉快嘅聖誕節！

舞蹈賽(第二回)

繼今年年頭一月時Yuki參加第一次舞蹈比賽，差不多十一個月後Yuki同朋友仔又參賽喇～

今次場地依然係伊利莎伯體育館～　

未到佢哋出場住，先跟Miss再排下舞先～

有請跳MacDonna嘅５２、５３、５４、５５、５６號參賽選手～　今次佢哋都係團體同個人都有比賽㗎～

開始喇～　先嚟個一字馬預備姿勢～

音樂！

Yuki同幾個朋友仔都好落力咁跳喎～　後面見到啲腳嘅就係評判嘞～

Yuki跳得非常投入～　Daddy影佢都唔知呀～

跳完舞～　Take a bow!

比賽完，等成績～

好嘢！有獎呀！

最後人人都有獎！　好嘢～

Yuki～　你又多個獎盃放屋企喇～

I am ‘Elumi’

 

最近身邊多了個叫Elumi的小朋友！　（發音為：El Lu Mi)

呢為小朋友一有少少唔開心就會兩手叉腰，皺起眉頭，Ｄｏ起咀巴～

咁但係呢個表情同Ｅｌｕｍｉ小朋友有乜關係呢？

睇咗下面呢幅close-up相就知點解㗎喇～　果條眉一皺～即刻出現兩條「Ｌ眉」囉！　

所以佢咪叫Ｅｌｕｍｉ囉！　哈哈！

四百度高溫

食開唔好停～　今日Yuki又去食新嘢喇～

早前Daddy買咗個團購優惠去食Stonegrill－石頭燒～　

原價三百幾嘅餐，變成百四蚊～　Daddy買咗兩個餐～　

咁Yuki食乜呢？　梗係唔會無得食喇～　

有個專為小朋友而設嘅Kids Menu㗎～

呢個就係兒童餐嘅煙肉磨菇意粉(Carbonara)嘞～ 

質數好好喎～　非常好味～　Yuki自己食哂成碟呀～

咁Daddy Mommy個set有乜嘢呢？

先嚟餐包同磨菇湯～

個磨菇湯都好得喎～　

主菜嚟喇～　

一個set係西冷牛扒～　塊西冷牛扒喺高達４００度高溫嘅石上面，燒到出哂煙呀～

４００度真係好熱㗎～　Daddy平時用grill pan煎牛扒都係去到三百幾度咋～

另一個係雞扒配珍寶磨菇～　每份都有跟啲配菜：茄子、番茄、薯仔～

侍應知道我哋第一次食stonegrill，仲好細心咁講解應該點樣燒，要注意啲乜！　例如啲汁唔好淋上塊石頭上面喇～

當啲主菜上枱嘅時候，侍應仲會開著超強抽風機～　唔多覺大煙，食完個身都無乜油煙味添～

餐後評分：環境、食物、服務都無因為團購而失色，值得再幫襯！