今年暑假接近尾聲嘞，不過我哋嘅暑假之旅正要開始喎～
聽朝就出發呢個六天之旅喇～
呢次唔係再去日本喇～ 我哋開拓新地點呀！
睇吓bear bear嘅裝束，估唔估到我哋今次主題係咩呢？
吓？！估唔到？ 放大啲睇下喇～
咁樣估到喇掛！ 係呀！ bear bear戴緊泳鏡同攞定太陽油囉～
無錯呀～ 今次主題係又有陽光、又有海灘嘅－－泰國布吉島～
我哋精心細選咗兩間酒店住～ 頭一間住三晚～ 有七個泳池、又有滑水梯～
之後兩晚住下面呢間～ 有滑水梯之餘仲有條Lazy River添喎～ 淨係睇相都已經好興奮呀！
除咗陽光與游水，我哋仲預備咗下面幾樣精彩嘅day tour～ 大家記住留意我哋之後嘅布吉食玩玩遊記喇～
等到暑假三十幾度都嚟海洋公園～ 無非都係想玩下一年一度嘅夏水禮～
不過有啲失望嘅係夏水禮嘅面積一年比一年細～
之不過啱小朋友玩嘅泡泡都仲係有得玩嘅～
剛開始玩，身上都仲算無乜泡泡～
玩得幾玩～ 同其他小朋友撥泡泡，再加埋自己撥自己～
哈哈！ 搞到變成好似洗頭咁囉～
嗱～ 有連環相為証㗎！
另一樣仲啱Yuki玩嘅係呢個童玩水戰區～
啲英文字母積木有啲似反斗奇兵喎！
呢兩個小朋友玩水區袛准身高１３０ｃｍ以下嘅小朋友玩～ Yuki宜家１２２ｃｍ～ 唔知仲可以玩多幾多年呢？
揸起支水槍裝滿水四圍搵人射～
Daddy喺出面影Yuki都爭少少被波及呀！
另外我哋仲玩咗兩樣嘢㗎～ 一個係Neon Splash-螢戰～ 入面係黑掹掹嘅室內水戰區，呢個Daddy就可以同Yuki一齊入去玩嘞～ 因為１３０以下嘅小朋友要有一個大人陪玩㗎～ 玩呢個保証入頭濕到落腳～ 所以有準備好全套後備衫可以換先好玩呀！
另外都有玩咗滑梯～ 不過今年呢個好似矮啲呀～ 無以前果個咁好玩囉～
希望第日再開嘅水上樂園大啲好玩啲喇～
今年嘅生日會約埋班好朋友一齊慶祝～ 有阿豆、Evan、Arthur同埋Yuki~
今次唔該Lilian姨姨幫我哋安排生日會場地呀～
就係銅鑼灣海底隧道旁邊嘅警官會所～
入到去有個好大廳～ 啲裝修仲保存有啲英式嘅味道～
當然唔少得有好多同警察有關嘅紀念品喇～
Arthur弟弟Elliot本來嚟到係瞓咗～ 不過俾一班小朋友嘅歡笑聲好快就吵醒咗～
落地玩得幾開心咁播～
那邊廂，四個小朋友連成一線準備起跑咁喎～
到底比賽乜嘢呢？
由另一角度睇得清楚啲喇～ Elliot喺正賽道中間喎～
其實係玩爬行讓賽呀～ 四個小朋友同Elliot鬥快～ Elliot喺中後段起步～ 結果，Elliot應該都唔知班哥哥姐姐做緊乜～ 哈！
有嘢食喇！ 啱哂口味嘅雞亦、煙肉腸仔、燒賣、春卷、仲有啫喱㗎～
食下嘢，玩下遊戲～
下面啲相到底係玩緊乜嘢遊戲呢？
無錯嘞～ 咪就係抛手巾（吖！係抛膠羹）
好喇，好喇！ 係時候要準備生日蛋糕喇～
今次嘅生日蛋糕非常好呀～ 一個蛋糕可以俾哂四個小朋友，而每人都可以有各自嘅風格～
先由一個雪白嘅蛋糕開始～
Yuki係第一個佈置嘅～
Yuki事先已經講咗想要Jewel Pet蛋糕～ Daddy行遍太古城中心Apita、Toys R Us，Mommy又去咗Sogo，最後Daddy喺Aeon先搵到呢個路比嘅行李牌～
Yuki! Hope you like your cake!
Yuki～ Daddy Mommy祝你七歲生日快樂～
希望你快高長大、身體健健康康、讀書繼續努力、做個乖乖小朋友！
跟住睇下幾個朋友仔將個生日蛋糕繼續變身後嘅造型喇～
最後一個一個代表英文字母再張一次生日歌！
哈哈！一次過唱五次生日歌呀！
最後一人一把刀！ 一齊切蛋糕～
祝四位踏入七歲嘅小朋友全部都快高長大～ 聽教聽話～ 孝順父母喇！
