2008 仲夏關西關東北國走透透之旅 - 準備出發啦～

聽日，將會係我第二次搭飛機，今次既目的地都係日本，打算先到大阪神戶，再搭內陸機到北海道，最後就去東京。

點解一次過去咁多地方？Mommy 話國泰既 Infant Ticket 要回程時都未夠兩歲，而因為就埋 Daddy 既假期，所以買唔到 Infant 要買 Child，價錢當然貴好多。後來 Mommy 發現如果改搭全日空的話，因為全日空只計出發日期，所以就可以以千幾蚊幫我買到四程機票，係咪抵好多呢！反正要轉機，全日空又可以比我地出發同回程都停一停，咁咪變左去咁多地方囉！

行程方面，Mommy 話無定架，仲話咩 No plan is good plan 喎！咁即係點架？會唔會無野玩架？Mommy 叫我唔使驚，佢已經將岩我去既地方，搵齊晒資料，只係未定邊日去，主要睇天氣，怕大阪同東京太熱，要將 outdoor 既活動，儘量改為傍晚或一早去，烈日當空既時間，最好走入去 shopping mall 嘆下冷氣。

行李方面，會有大行李箱兩個，背囊一個，相機袋一個，腰包一個，ＢＢ車一架，基本上同上次去福岡差不多，只係行李箱由一大一少變為兩大個，梗係用黎放戰利品啦！

整個旅程歷時１３天，７月３１日我地就返黎架啦，到時再見！

拍照樂~

今天拍了些溫馨照片呢：

結他手 !?

聽說近來人氣急升既日本小天后係一個結他手，今日我地就黎睇睇呢個結他手既練習情況：

（喂喂，日本小天后係彈結他既，不過人地叫YUI，唔係 YUKI 呀！）

（係咩，唔係 YUKI 咩！=.=" ）

雖然唔係小天后，但都似模似樣呢！

迎京奧

吉之島終於都裝修完重開喇～

我地已經諗住襯星期六上奏，會少Ｄ人喇。點知原來十一點幾去到都已經幾多人～

宜家新果個遊樂場－MooRry Fantasy有個迷你旋轉木馬架，可以坐三個小朋友～ 我離遠見到已經即刻fing甩daddy隻手飛奔埋去喇！

地下果層食野既地方同餐廳都同以前唔同左好多～ 最驚喜既係俾Daddy Mommy見到係北海道既「山頭火」拉麵都係度開左呀！不過十二點未到已經好多人排隊等位喇！Mommy話咁等我地月底去北海道既旭川本店先食喇！

講得話迎京奧，當然係有Ｄ代表北京奧運既野啦！

佢地就係京奧吉祥物－－「青蛙」。。。。。 （提場聲：shh... Yuki... 係福娃呀！） 哦。。。「福娃」。。。

等我熱情地同佢地影番幾幅相先！

 

仲有一隻影漏左！交唔齊功課添～ 嘻嘻！

Daddy農曆生日

今日係Daddy既農曆生日～

Mommy特登幫我揀番呢件上次Daddy出trip買俾我既吊帶露背裝黎同Daddy慶祝農曆生日～

 

 

 

 

 

 

 

 

 

 

 

 

 

係播！順便俾大家睇下我張新既工作枱～ 呢張枱將會係我黎緊用黎做功課，食飯，玩既空間～ 我係度貼緊貼紙～ 又一路張緊歌，所以俾Daddy影到我兩張相都do左咀仔添～

夜晚出街食飯果陣，影生日蛋糕相既時候你地睇我幾專心。。。。。。玩把刀！

到同Daddy吹左爉燭之後要切蛋糕喇～ 我對眼由頭到尾都無離開過把刀～ 梗係喇！因為呢把刀好似我用黎切生果玩具既玩具刀囉，又係膠既刀刀，仲要係透明好靚咁架！

下雨的星期天~

幾天前已約定批姨姨，先來個午餐，再去大拗門放風爭。可惜，天公不造美，難得約定了，午餐如期舉行：

 

Yuki 最愛的 Pizza

 

 

 

 

乖乖的 Iain，自己食意粉，當然食到成面都係既相，我地係唔會刊登出來啦！

 

 

 

Mommy 好喜歡的一張合照～

 

 

 

飯後，本來想去批姨姨家玩下，但 Yuki 在車中睡著了，我們只好打道回府呢！

新形象~

今日 Yuki 又去剪髮啦，唔知點解，Yuki 今日好扭計，點都唔比哥哥幫佢剪，Mommy Daddy 出盡法寶，都攪佢唔掂，最後，由 Mommy 抱住，仲要扮係Mommy 幫佢剪既，先攪得掂。Daddy 話呢D可能係入院後遺症！

仲有仲有，今日 Yuki 第一次出成日街都無著片，成績就好好，無瀨過。雖然中間有Ｄ小插曲，但已經好叻女。

今日去街時，Yuki 好興奮，有相為証架！

等位食飯時係商場跳跳紮：

食飯時全程自己食，邊玩邊食：

好多野~

今日下奏Mommy同我去醫生度覆診～ 醫生話我好番哂喇！ＹＥＡＨ！

夜晚Daddy放工返黎麻麻屋企，Daddy今日終於記得幫我影D相～

大家睇下我有冇瘦到?

因為我好多日無去公園玩啦，所以麻麻仲同我玩SIR滑梯添呀!

我見Daddy影得咁開心，仲拎個相機黎影番張自拍照添！ 咦？！點解都唔似我既？

Daddy Mommy仲話我呢排講多左好多野～ 好似尋日我o係梳化揭緊本故事書，Mommy坐左係隔兩個位度，我突然之間講左兩個字～ Mommy Daddy都唔為意我講乜野～ 到我再講多兩次，佢地終於明啦！ 係呀，我叫Mommy: 「近Ｄ 」我想Mommy坐埋我隔離一齊睇嘛～

又例如今晚我同Daddy係梳化玩水果Puzzle，玩左一陣搞到成堆Puzzle係腳下～ 我又講左三個字喎～ 你地估下我講左邊三個字？ 嘻嘻～ 咪就係話：「好多野」囉！

唔知我幾時會成句句子咁講出黎呢？

多謝大家!

我終於出左院返左出黎喇～

好多謝大家咁多日以黎既關心呀！因為Mommy要每日留係醫院陪我過夜，所以Daddy就要肩負起為大家匯報我每日情況既重任啦～ 「唔該Daddy!」

我出院後Ｄ燒就遠離左我喇～ 仲呢兩日都玩得好開心哩！

可能因為我玩得開心得滯～ Daddy同Mommy都唔記得幫我影番幾幅相俾大家睇下添！

今次入醫院我最驚既一樣野就係姑娘搞我隻手呀！可能因為第一日入去姑娘房種黃豆仔同抽血又無Daddy Mommy陪住既陰影喇～ 之後每次佢地要掂我隻手手我就會大喊，同個身都震哂呀～

不過呢！Daddy Mommy話都有Ｄ野係呢次入院之後我係叻左既～

第一就係宜家我無論要NG NG或者ＶＶ都會識得講喇～ 可能因為係醫院吊鹽水成日要ＶＶ，所以我不經不覺訓練到自己一急就講喇～ 我已經好多日無疴濕片片喇～ （訓覺時間除外）連Daddy都對我投以信心一票呢兩日俾我唔使著片片褲坐車車添呀！

第二樣就係唱歌歌囉～ 係醫院大部份時間我都時時刻刻自己係咁唱歌，或者自己係度作歌唱！ 好多時仲唱到人地熄哂燈要訓覺我仲ＭＡＫ大喉嚨唱，要Mommy係咁叫我細聲Ｄ。。。細聲Ｄ。。。 嘻嘻！

係呢度我想再一次多謝今次我入院好辛苦既Mommy(佢咁多日廿四小時咁照顧我）、Daddy(佢返工日就一日黎三次，放假就朝八晚十咁陪我同Mommy)、仲有爺爺、麻麻同Siti姐姐（佢地都係每日黎幾次，仲要係屋企煮定我既麥皮呀，粥仔呀，通粉呀）