Yuki期待已久嘅家教會旅行終於來臨喇～ 旅行地點係錦田鄉村俱樂部～
今年我哋仲報名同埋爺爺嫲嫲一齊去添～
一早八點半就先要喺學校集合～
總共有超過一千人參加呀～ 旅遊巴士都要成廿幾架～
未到我哋上車之際，Yuki同啲同學仔喺操場玩得幾開心～
車程唔使一個鐘，好快就到咗錦田喇～
落車先逐架旅遊巴嘅乘客影幅團體相先～
一入咗門口，有檔小食檔，又有新鮮豆腐花同魚蛋燒賣～
今朝凍凍哋，食返碗熱豆花，暖入心呀！
黃糖落豆花，我們的至愛～
魚肉燒賣～ Yuki更愛！
Yuki食嘢忙到唔得閒影相呀～
呢度其實係個極大燒烤場，兼且有農場同片超大草地～
喺啲大草地上面仲有吹氣遊玩設施～
大片草地兼有啲風～ 所以都有好多人喺度放風箏～
家教會悉心安排，每個報名嘅小朋友都會派一隻風箏～
今次係Yuki咁大個女第一次放風箏咋～
睇佢揸住隻風箏喺度跑，幾開心！
愈跑愈熱～ 要除咗件外套再繼續跑～ 哈哈！
得喇！得喇！ 升起有兩三個Yuki嘅高度喇～
因為今日啲風唔係好持續～ 所以有時陣風放得高一陣間，忽然又無哂風，跟住就跌返落嚟～
所以Yuki唯有靠不斷咁跑嚟令隻風箏飛上天～
嘩！ 好勁呀！ 跑住放都可以飛到咁高喎！
呢日放風箏好開心嘅唔止Yuki㗎～ 仲有… 嘻嘻～
好喇～俾Mommy跑住先～ Yuki抖下飲下水先～
下一個項目係男女子大人小朋友混合足球賽～
先由兩邊隊長猜包剪揼揀隊員～
球賽開始～
大家好認真咁跑呀～ 追呀～
睇嚟戰情一啲都唔緊張喎～ 睇下Yuki玩得幾投入！
仲笑得好開心添～
大家都踢得好認真㗎～ 有啲摌波摌到瞓地添～
玩完兩樣體力勞動嘅活動～ 跟住玩樣無咁攰㗎喇～
摘士多啤梨～
呢個農場啲士多啤梨都幾靚喎～
Yuki對上果次摘士多啤梨都已經成三年前喇～
同Mommy一齊揀啲靚嘅先！
摘下摘下，原來都摘咗唔少㗎喇～
賣價係１００蚊一磅～ 呢度咁樣一籃仔要９０蚊～
玩到十二點幾開始有得燒烤喇～
啲燒烤爐已經起好哂爐～ 一埋去就燒得～ 好方便㗎～
燒到咁上下～ 開始抽獎喇～ 有好多獎品喎～ 不過，我哋今次抽唔中呀～
抽唔到獎唔緊要～ Daddy請食雪條甜筒補數～
仲請埋爺爺…… 一齊合照添～
個場仲有啲碰碰車～ 動物造型電動車之類俾小朋友玩～
另外有個角落有得親親小動物～ 可以餵兔仔或者羊咩咩食嘢～
到三點幾左右就要離開喇～
喺回程嘅車上，導遊姨姨仲有娛樂俾大家～ 同我哋玩bingo～
Yuki都有份中獎～ 係一個沙樽嚟㗎～
多謝哂同辛苦哂啲老師同家教會嘅家長搞咗呢個咁好玩嘅旅行呀～
