上星期日(4/19)同好朋友Hillary同Hannah一齊去咗一個日營玩～
地點係位於上水嘅假日農場～
到達第一樣嘢梗係要影下團體合照喇～ 其實呢個活動係Hannah之前幼稚園同學仔一齊搞嘅活動嚟㗎～ Yuki係掹車邊有得參加～
嚟到農場當然有鳥語花香～
又有好多唔同種類嘅農作物～ 包括士多啤梨～
大樹菠蘿迷你版～
喺門口旁邊有兩個好高嘅韆鞦呀～
三個小妹妹即時衝埋去玩喇～
互相幫助～ 你推我～ 我推你～
Hannah犀利喇～ 一個人推兩個～
跟住到Yuki同Hannah一齊坐～ So Happy!
跟住仲有好多嘢玩㗎～ 呢條獨木橋真係少啲膽色都行唔到呀～ 真係會跌落水㗎～ 雖然唔係好深啫，但係都會濕㗎嗎！
踩呢架水車就一定唔會濕身嘞～
呢度連滑梯都非一般啲㗎～ 下面呢個由兩條膠大水管砌成嘅又真係玩得㗎喎～
氹氹轉玩得多～ 但係可以坐嘅係咪少見先？！
仲有Yuki第一次體驗嘅吊床呀～ 原來瞓上吊床有秘訣㗎～ 就係先坐個pat pat上去～ 跟住將上身挨上床～ 最後先將腳收起，放上吊床～ 咁就唔會碌過龍嘞～
呢張喺仿馬車排排企影相有無啲似罸企呀？ 嘻嘻～
宣揚環保意識～ 用廢棄水管透過敲擊造成高低音都有嘅音樂～
另外仲有教小朋友以前用嚟壓碎同磨碎農作物嘅工具～
跟住仲有個小型石磨俾小朋友親自嘗試用黃豆磨豆漿出嚟呀～
磨完豆漿梗係要飲返下喇～ 不過頭先試磨果啲就唔飲得嘅～ 呢啲係小賣部有得賣～
咁迷你嘅搖搖板大家又有無玩過呢？
玩下玩下～ 原來已經到食午餐時間～ 我哋預先訂咗一隻燒雞～
原來呢啲就係今朝嚟到果陣見到一排排掛住喺度果啲雞呀～
其他食物就要自備～ 我哋帶咗沙律～ Hillary佢哋帶咗壽司～ 好味呀～
食完晏～ 一點鐘開始有得玩更剌激嘅遊戲喇～
呢個坐麻包袋嘅滑梯好好玩㗎～ 大人都可以玩添～
睇Yuki笑得幾咁開心～
玩遊戲大家都好守規矩～ 排好隊坐喺下面等～
當有一個小朋友滑咗落嚟～ 就拎住剛玩完果個麻包袋自己行樓梯上去先再滑落嚟囉～
另外呢個游縄上嚟都幾講手力同腳力㗎～
除咗頭先果個坐喺度嘅氹氹轉～ 下面呢個就變成吊住嚟玩嘅氹氹轉嘞～
我哋嘅group size唔算太大～ 所以大部份排隊玩嘅嘢都唔使好耐～
等Daddy都同三個小朋友影個合照喇～
呢個麻包袋滑梯比頭先果個剌激好多呀～ Yuki都話呢個玩起嚟會有啲驚呢～
有得頭先最短最矮嘅搖搖板～
當然會搵返一條最長最高嘅搖搖板先得喇～
呢個由工作人員控制嘅搖搖板可以上到啲樹葉叢之中呀～
到三點鐘我哋開始今日最後一個項目喇～
用心聽書～ 睇下我哋整咩呢？
先將啲麵粉整平少少～ 同埋開個窿喺中間～
個窿要夠位打隻雞蛋落去㗎～
個麵粉堆漏蛋呀～ Yuki快啲封返好喇～
唔～ 大家都差唔多嘞～ 開始要撈勻啲蛋同麵粉～
撈到咁上下～ 就要開始好似啄豬肉咁啄喇～
進入下一階段～ 當舊麵粉團開始成型，就開始要搓嘞～
用手掌心近手腕位置出力捽向外～ 跟住摺埋，轉個方向，再捽又再搓～
Daddy同Mommy都有幫手搓呀～ 搓到舊麵粉團有啲彈手，表面夠滑就差唔多喇～
有個姐姐幫我哋又呢部機將舊麵粉團壓扁成一片～
重複對摺同重複壓幾次～
就係咁嘞～ 變成一片好長嘅麵粉片～
排第二條隊做最後一個步驟喇～
呢位哥哥幫我哋將麵片切割成一條條嘅麵條呀～
大功告成～ Yuki第一次親手做嘅全蛋麵～ 由麵粉開始做到變麵條～ 好勁呀！
今日行程到此為止～ 離開農場去隔離呢間榮昌茶座食埋個下午茶先出返市區喇～
多謝Hillary同Hannah邀請Yuki參加呢個咁好玩嘅活動呀～ THANK YOU!
