無錯！雖然我哋暑假先去過澳門一次，事隔兩個月，我哋又去澳門喇～
中秋節翌日假期，我哋又去咗次澳門喇！
今次係因為要再去睇一次水舞間～ 上次未能睇哂成套完整嘅水舞間，獲得補償再睇一次～
但係當然船飛要自己搞掂喇～
因為咁，我哋今次約咗伯伯佢哋一家去睇水舞間～ 順便喺澳門過一晚夜～ 即係玩兩日一夜喇～
兩日一夜嘅行程，唔使好似上次咁趕～ 搭十點嘅船～ 所以去到港澳碼頭先喺蘭芳園食返個早餐先～
話咁快，去到澳門喇～ 不過今次同上次真係爭好遠～ 今次喺正中秋節假期，落咗船要排哂長龍過關呀～
排咗都有成四十五分鐘，終於都出到嚟喇～ 今次我哋直接去酒店Check-in先～ 所以搵酒店嘅財神車搭去金沙城中心喇～
我哋會入住金沙城嘅喜來登酒店～
嘩！未到Checkin時間，先中午十二點，原來都已經咁多年人排哂隊等check-in喎～
不過又真係有房喎～ 我哋三間房喺哂同一層～
好嘢！有個大浴缸可以浸呀～
浴缸隔鄰又有個花灑淋浴間～
當然仲有瞓覺嘅King size大床喇～
放低啲嘢即刻落去搵嘢食喇～ 行落商場，好似去咗個森林咁～ 有成兩三層樓高嘅樹，又有啲瀑布～ 非常宏偉！
搵到金沙城嘅food court～ 有好多唔同嘅嘢食～ 相信應該有二十檔以上～ 如果每檔食一餐都要食廿餐呀！
我啲就食咗韓式石頭鍋飯同日式拉麵～ 消費都唔平呀～ 平均要七八十蚊一樣嘢～
醫飽個肚就再喺商場逛下先～
咦！終於見到呢間旅遊書都有介紹嘅超大玩具店喇～
入門口唔到五秒就唔見咗Yuki喇～ 因為佢已經被啲玩具吸引到唔記得咗我哋lu～
嚟到Lego Friends嘅角落，終於搵到雙眼發光嘅Yuki呀～ 佢見到兩盒話係香港未見過嘅，好想要！
好喇～ 上次大舅父話咗俾Yuki自己揀樣生日禮物，等Mommy影低幅相send俾大舅父喇～
多謝大舅父！ 拎住禮物嘅Yuki幾開心！
沿住呢條接駁住金沙城同威尼斯人嘅天橋中間有好多明星手印～ Yuki又扮下明星先～
天橋中間仲有幾個出室外嘅影相位～ 可以影到宜家氹仔呢堆賭場酒店建築群～
Daddy同Yuki嘅背景就係金沙城中心嘞～ 左後方圓形果座就係新濠天地嘅Hard Rock Hotel～
三堂兄姊妹隨著Yuki漸漸長大，宜家一齊影相已經唔會咁大距離，唔再好似同個BB影相喇～
企喺中間影仲會叉哂腰扮哂主角添喎～ 嘻嘻！
金沙城呢個暑假另一個賣點就係有夢工場嘅巨星們每日喺商場嘅巡遊～
我哋見到史力加喇，又有功夫熊貓～ 我哋由商場嘅東門一路追住佢哋巡遊，追咗幾個位，終於都影到同功夫Panda嘅合照喇！
然後預早少少時間，行過去新濠天地準備去再睇水舞間喇～
今次睇呢場其實都唔太順利，中途又因為技術故障停咗兩次超過十分鐘以上～ 中間好似打韆鞦果幕空中飛人無咗～ 好彩！最後完場果一幕今次終於睇得到喇～ 不過可惜都係無得睇謝幕！
女主角好犀利呀！ 可以控制啲水升起身㗎！
呢日嘅晚餐本來諗住再去山度士，但係應Mommy要求，轉去另一間出名食火鍋嘅舖頭－台山水佬榮！
我哋搭新濠去關閘嘅財神車，由關閘行過去巴波沙大馬路，大約十分鐘左右喇～
去到唔算多人～ 本來我哋訂咗八點半嘅枱，早咗佢都俾到枱我哋～
呢間嘢最出名嘅就係呢煲花甲蟹鍋～ 花甲－我哋香港叫蜆～ 至於蟹有兩款俾你揀～ 可以揀肉蟹或者膏蟹！ 湯底就可以揀唔辣、少辣、中辣、大辣！
隻蟹鉗幾大隻！有Yuki大半塊面咁長呀！
去哂殻嘅蟹鉗，啖啖肉呀！ Yuki! 你就好喇！
食到好飽！ 慢慢行返過去關閘果邊搵返啲搭返酒店嘅車～ 關閘果度真係仲保留住呢個以前嘅「關閘」喎！
返到酒店，好攰喇！ 鏡頭一轉，已經第二朝喇～
落酒店餐廳食早餐，居然俾到張大圓枱俾我哋喎！ 坐得好舒服呢～
食到中途見到外面排隊等位嘅人龍嗎？ 好彩我哋落得嚟早咋～
我哋咁早食早餐，因為要趕住食完早餐落去泳池游水呀！
不過落到水先發覺原來啲水都幾凍呀！個泳池又曬唔到太陽，所以零舍覺得凍囉！
震～ 震～
喜來登呢個泳池因為起喺兩間酒店中間，所以唔係咁曬到太陽，可能要太陽喺正頭頂果啲鐘數先曬到！
我哋玩咗唔夠一個鐘就要走喇～ 因為要趕住十一點check-out吖嗎～
Check-out咗我哋諗住去官也街果邊行下～ 原先諗住搭酒店車，但係超多人等呀～
問咗車站個叔叔，佢話行過去都好近之嘛～ 好！一於行下喇～
先經過銀河渡假城！ 真係好靚呀！ 本來想住呢度㗎，因為佢有個人造浪沙灘～ 但係中秋假期實在太貴喇～ 一間房居然要成四千幾蚊晚呀！
行五分鐘左右已經嚟到大利豬扒飽附近喇～
真人咁高嘅可口可樂同芬達橙汁～
本來無特登諗住嚟食㗎，但係一場經過，無理由唔幫襯下㗎嗎～
大利來記豬扒飽！ 好味～
行多幾分鐘，就嚟到官也街尾嘞～ 咦！芸芸舊區嘅建築物中有一座黃色搶眼建築！
噢！係STARBUCKS呀～ 全幢三層都係STARBUCKS包哂～
嚟官也街有兩個目的～ 一、要買手信；二、要再食山度士餐廳囉！
因為Yuki指定今次嚟澳門要再食一次山度士囉～
除咗上次食過好好味要再食一次嘅燒乳豬、焗鴨飯、蜆之外，今次再試咗串燒牛柳～
食到好飽呀！
由於我哋今日搭五點船返香港～ 趁仲有啲時間，可以去多一個行程點！
搭的士離開氹仔喇～
最後一站亦係上次想去但無機會去嘅！ 就係澳門科學館喇～
呢度嘅設施都算Yuki同家姐哥哥都啱玩嘅～
呢個玩水嘅佢哋玩咗好耐呀～
Yuki唔通諗起自己好似水舞間個女主角？
下面呢架模擬澳門興建中嘅輕軌車，預計２０１５年完成～
個車廂裏面可以坐喺度扮乘客，然後投影住架車開車同停車～ 好像真呀！
另外玩呢架電子足球機～ Yuki隊2:1嬴咗Mommy隊！
四點前離開科學館搭的士返去氹仔碼頭喇～
愉快嘅兩日一夜澳門遊話咁快就完喇～
希望快啲又可以同家姐同哥哥一齊再去旅行喇！
