新髮型~

差D唔記話比大家知，我又剪左頭髮啦，不過今次係daddy幫我剪架，靚唔靚呀？

我就梗係好滿意啦，等我攬住bear bear一齊影返張靚相先～

水痘針

今日朝早又去打針喇～　今次係去打水痘針，水痘針唔係打大脾，係打ＰＡＴ　ＰＡＴ架～
Yuki應該開始意識到去醫生度，一擺佢扒o係度佢就即刻喊哂喇～


下奏我地同Yuki去左MegaBox 同D朋友食晏，Yuki第一次去呢間餐廳，好似覺得好新奇咁～










連Ｄ吊燈都好吸引佢呀！

















之後我地行九樓其他舖頭同玩下個滑梯同有個音樂台，不過今日唔知點解唔著～　之但係Yuki都企係台度好開心咁～


另外有間舖有張好靚既化粧枱，上面仲有個電話添～　喂喂，我係Yuki～你搵邊位呀?

　　

追月日～

今日朝早都仲有落少少雨，好彩中午左右已經好好天喇～

我地趁呢個追月假期去左西九龍海濱長廊～

果度有幾多咪錶停車位，有單車租俾人踩架，我地主要去睇燈，同埋當然要影相啦～

今日其實都幾曬，好彩有Ｄ位有瓦遮頭兼有Ｄ海風，所以其實都幾舒服架。









我仲o係果度食左餐奶，又曬到面珠仔有少少紅紅地添呀～　今日呢度有幾多同我差唔多大既哥哥姐姐，我係咁跟住佢地又撩佢地打招呼，好主動架～

一年容易又中秋～

今年中秋節我終於都有得去維多利亞公園賞燈喇～　


我地食完晚飯就出發去維園，嘩，好多人呀～

有好多好大既綵燈，但係好多人影相，我地要離遠影咋～

 

另外我隻兔仔燈籠好多人讚呀，我將佢掛係架車仔上面，一路行，一路有人讚個燈籠好得意呀，好閃呀～

嘩~ 個燈籠好靚呀~

仲有幾日就係中秋節啦！

呢個係我出世之後既第二個中秋節，上年我仲係一舊飯咁，食飽就訓，訓飽就食～ 今年就唔同啦，我已經好百厭！媽咪買左個燈籠比我，等我中秋節果日有得拎住玩，好靚架，係個會發光既兔仔燈籠～（唔知卡樂媽有冇買比卡樂Ｂ呢。。。）

不過今日落雨呀，希望唔好再落啦，我仲未去維園睇大燈籠架！　嗚。。。嗚。。。嗚。。。

自己著襪仔~

十三個月大既Yuki已經識好多野, 知道去街街要著襪同鞋仔, 就算無人話同佢去街, 佢自己想去果陣, 都識得去拎對襪仔出黎試下著:

又去海洋公園~

無錯～ 短短兩個月之內，我再次踏足海洋公園，因為今次係媽咪公司包場，唔使錢架！

上一次，排隊入水母館既時候，我訓左覺，今次我終於睇到水母啦～　水母好靚，好得意，媽咪抱住我睇，我仲四圍手指指，點佢帶我不停向左走，向右走～　水母館入面有一幅牆好得意架，有Ｄ水母係度游黎游去，我一掂到Ｄ水母，水母就會即刻彈開，我玩到唔肯走添呀。。。呵呵呵，唔知幾時再有得黎過呢～　（水母館太黑，ｄａｄｄｙ無幫我影相，所以無相比大家睇添～）

除左水母館，我仲去左海洋館，入面有好多魚魚架，我睇魚睇到連有人影相都唔知，不過連媽咪都係喎，比人影左都唔知～

今次我都有坐火車同旋轉木馬，Ｄ相同上次差不多，唔貼出黎啦～

話比大家知呀，我覺得自己已經大個女啦，你地睇下呢張相，係咪好有少女味道呢～

新寵～

要代Yuki再一次多謝Cherry姨姨喇～

Cherry姨姨送既一套三隻Bear Bear熊宜家成為Yuki既新寵～　臨瞓要攬住，玩既時候又帶住，又會錫錫Bear Bear～　所以宜家三隻Bear Bear分別駐守o係麻麻屋企，Mommy屋企，同Daddy架車度～

行公園~

今日媽咪話同我去香港公園呀！靜靜話比你地知丫，今次係第二次黎呢度架啦，上次我訓左覺，媽咪費事嘈醒我，所以黎到都走左咋～

媽咪教緊我呢Ｄ係乜野花花呀。。。

我地掛住睇海豚，唔見左Daddy呀！咦。。。原來係果度呀！

等我同Daddy影返張合照先，點少得我既招牌笑笑眼呀。。。係咪好可愛呢～

新行程～

今日朝早如常上完playgroup，跟住去醫生度打左支肺炎鏈球菌預防針，呢支針係打大脾，唔係打pat pat架。

我o係屋企食完中午果餐粥粥，Daddy就提議左個新行程，去一個我出世之後都未再去過既地方～　
就係－－西貢喇～

本來Mommy仲諗住我入去果程車會瞓一覺啦，點知我又唔係好眼瞓喎，半個鐘多少少我地就到左西貢喇～

嘩～　呢度好多魚魚、蝦蝦、蟹蟹，仲有好多我都唔知係咩既野添呀！

我地行左出去碼頭影相，大家睇下我宜家唔鍾意俾Daddy Mommy拖住行架。





個碼頭邊仲有好多艇仔賣Ｄ魚魚俾岸上面既人，Daddy話第日等我識食海鮮就買番屋企煮黎食喎～





到我開餐既時間喇～　原來o係Ｄ長凳度吹住海風咁食奶好舒服架～

之後我地行左去碼頭公園入面既餐聽食個TEA，當然係Daddy Mommy食，我無份啦～

呢個水牛城雞亦都幾特別喎！













至於我－－咪玩下個’留座’牌囉～

悠閒星期六～

今日無乜特別節目～　都係出下街，行下吉之島～

傍晚希表哥黎左我樓下個公園玩叫埋我落去～

我見到舅母吹D泡泡波好得意呀！開到我淨係望住唔敢郁，玩多一陣就開始係咁追住D波波，仲想捉住D波波添～　






但係唔知點解次次捉到果陣粒波波就忽然間唔見左呀！　
好奇怪呵～


後尾我仲問希表哥借佢架單車俾我玩，我咁細個梗係要媽咪扶住啦～　
不過我都坐得好開心喇！　
仲衝埋去Daddy度添～




夜晚我地返左婆婆屋企食飯，今日係我表弟（焯衡表哥既弟弟）滿月呀，祝表弟滿月快樂！快高長大，肥肥白白，遲Ｄ大個同我玩～　嘻嘻～

仲有～仲有～　我要多謝大舅夫同大舅母送俾我既日本手信呀，好靚既口水肩呀！(Hysteric Mini黎架～）