尋日Yuki學完跳舞我哋食咗天后嘅臨記格仔餅～ 因為喺屋企附近，所以我哋久不久都會去幫襯一下～
今日下奏喺屋企做完習作，Mommy同Yuki話不如喺屋企整格仔餅（窩夫）喇～
Mommy量好材料份量，然後就交俾Yuki喇～
Yuki小師傅將麵粉逐少逐少加落去～
右手拎篩，左手輕拍～ 落哂麵粉就開始慢慢搞均勻～
小廚師聚精會神地製作中～ 跟得Mommy製嘢食多，啲手勢都似模似樣㗎～
嘻嘻～ 終於發現被拍喇～ 你繼續喇，唔使理我㗎喇～
呢部格仔餅機成幾個月無用過喇～ 今日再出場就有Yuki整嘅格仔餅喇～
約五分鐘後，香噴噴金黃色嘅格仔餅出爐～ 今次做出嚟嘅效果比上次好～ 塊格仔餅夠厚身，啲一格格亦夠深，好嘢！
新鮮出爐嘅Yuki愛心格仔餅～ 我哋一切分享喇～
呢一塊有兩個雪糕球～ 曲奇同士多啤梨味～
另外呢塊就有士多啤梨同新鮮香蕉～
我估唔使問大家都知道Yuki係食邊塊喇～ 先嚟一個含畜地笑～
然後開始控制唔住喇～ 口裏一啖，雙手準備下一啖～
嘩！ 睇下幾大啖～ 吖！點解Yuki食正餐未見過食得咁大啖咁暢快嘅呢～ 如果食正餐都咁就好嘞！
今日係小一開課前嘅家長日～ 小一同學要著校服返去～
登登！著小一校裙嘅Yuki出場～ 今朝可能唔多夠瞓，Yuki有少少眼腫腫～
今日返學其中一個主要目的就係睇下分班～
其實前一排佢地返果兩日就係俾學校做初步評估，因為學校希望盡量將學生平均地分班～ 唔會實施果啲精英班之類～
Yuki分配到入1A班～ 小朋友今日根據自己分配嘅班別排隊喇～
班主任帶同學上課室喇～ Yuki, 一陣見喇～ Daddy Mommy要去禮堂聽校長同老師講嘢呀～
小朋友就去課室認識下班主任同其他同學～ Yuki話每個人都要介紹下自己㗎～
一眨眼兩個半鐘，落返操場接返Yuki～
Yuki同好朋友豆豆分配咗去唔同嘅班～ 豆豆係1E～
都好嘅～ 如果俾佢兩個同一班，一定掛住傾計唔專心上堂～
宜家唔同班都可以喺小息同食午飯嘅時候一齊玩吖！
呢對雙妹嘜幾百厭！ 古靈精怪～ 想叫佢哋正正經經一齊影副相都咁難～
Yuki嘅課室就係一樓最右邊藍色閂咗門果間喇～
希望佢兩個九月開始開開心心迎接佢哋人生另一階段喇！
Yuki從兩歲開始就每年都會去做眼睛檢查。 今年已經第五年喇~
因為mommy 細個果陣無定期驗眼，原來有弱視都唔知！ 到大個咗發覺時已經變成懶惰眼（lazy eye).
為安全起見，以免有遺傳，所以我哋維持每年都返理工眼科視光學診所驗眼㗎。
呢度嘅驗眼服務就算兩歲嘅小朋友都驗到㗎～ Yuki兩歲果年嚟就係去一間專為小朋友驗眼而設嘅房間～ 有好多卡通／公仔～ 驗眼有卡通睇～ 唔使睇同講英文字母，有用形狀嘅驗眼設備（好似正方形、圓形、三角形、萍果、香蕉）～
直到上年五歲都係去小朋友房驗眼嘅～
今年開始，終於唔再用小朋友房喇～ 視光師姐姐帶我哋去咗一間有張大人驗眼椅嘅房間～
進入六歲之後驗眼程序都逐漸接近大人嘅模式～
視光師可以加減唔同度數嘅鏡片然後問Yuki呢個清楚啲定係果個清楚啲呀？
Yuki亦可以分辨得到廿五度分別嘅鏡片邊個清啲或者矇啲～
今次仲有樣新嘢驗，之前咁多年都未試過㗎～
呢樣就係滴眼藥水放大瞳孔睇眼底嘞～
滴完眼藥水要等十至十五分鐘，等眼球嘅肌肉放鬆～
對住咁多機器，Yuki都無緊張或者驚，非常合作！ 可能始終俾呢個視光師姐姐驗眼已經由兩歲睇到宜家喇～ 雖然一年見一次，不過都叫睇住Yuki大～
驗眼結果一切正常，有少少遠視～ 視光師姐姐話小朋友有少少遠視係好現象，因為咁樣無咁易變成有近視～
希望Yuki保持得住良好嘅姿勢睇書同寫字～ 進入小學都唔好有近視喇～
驗完眼視光師送咗副太陽眼鏡俾Yuki呀～ 幾型！
因為放大咗瞳孔驗眼，要幾個鐘頭後先回復正常～ 所以呢幾個鐘會比較怕光，副即棄太陽眼鏡就係俾驗完眼嘅小朋友離開時保護下眼仔囉～
出年暑假再見喇，視光師姐姐！
今日係老友仔Arthur嘅生日派對～ Yuki嘅朋友仔們都陸續踏入六歲喇～
今年Lilian姨姨幫Arthur安排喺銅鑼灣嘅警官俱樂部搞一個池畔生日會～
池畔生日會居然都有得跳生日蛋糕吹氣遊戲～ 犀利！
我哋去到時間倘算早，所以一齊幫下手佈置一下場地先～
知道今日有得游水，Yuki一早準備好新泳衣啦～
以下呢兩個動作，除左喺泳池或海灘之外，正常陸地上應該都做唔到乜滯喇～ 因為Yuki已經愈黎愈大個，愈黎愈重～
第一：騎膊馬～
宜家騎膊馬已經高出Daddy足足兩個頭～
比起兩歲幾果陣（見下圖）係咪爭好遠哩～
第二：抛起Yuki~ 靠住水嘅浮力，先可以將Yuki抛起離手～
今日趁呢個機會同大家報導一下Yuki學游水嘅進度～ 呢個幾星期算係有長足嘅進步～ 宜家可以用自由式抖氣游到五六下～ 仲開始掌握到背泳要放鬆瞓喺度嘅感覺～
好喇，好喇！ 游夠水喇～ 有個小丑姐姐嚟咗幫Arthur慶祝呀～
今日嘅生日蛋糕～ 好大盒呀！
開估！ 係Angry Birds蛋糕嚟㗎～ 呢幾次生日會都見好多人係揀咗Angry Birds！
壽星仔出嚟接受大家嘅祝福先～
Happy birthday to you, Arthur!
Arthur呢張嘅笑容中眉宇間有一絲憂鬱～ 哈哈！
呢度除左個泳池，仲有啱哂小朋友嘅滑梯㗎～
星期日參加咗幼稚園一個同學開嘅生日會～ 相信呢個係幼稚園同學間最後一次咁嘅大型生日會～
呢日嘅主角係佢－Clarice~
Clarice係K3先插班入Yuki讀嘅幼稚園～ 但係Yuki同佢都成為咗好朋友～ 可能其中一個原因係之前Yuki嚮北角學芭蕾舞曾經同Clarice一齊上堂～ 所以算係之前已經識落～
剛去到未係太多小朋友～ Yuki拎自己嘅新相機出黎俾Clarice試影～
幾個女孩子頭頂戴住嘅頭箍係迪士尼公主㗎～
呢個生日會亦有請咗一個哥哥嚟表演魔術～
好喇～ 時間差唔多，要準備唱生日歌同切蛋糕喇～ 至於個生日蛋糕大家睇到嗎？
就係呢個公主裙造型嘅生日蛋糕喇～ 最犀利嘅地方係Clarice媽咪親手整呢個蛋糕㗎～
除咗魔術師，仲有請小丑扭波波添～ 快啲排好隊等小丑哥哥喇～
Yuki宜家對住啲大個啲哥哥姐姐都唔怕羞喇～ 仲識同佢哋玩到好開心添～
Hillary同妹妹Hannah都有出席呀～ 所以三個一如往常全個下午都黐埋一齊～
到Yuki喇～ 小丑哥哥問Yuki想要扭乜嘢～ 到底Yuki想要乜呢？
小丑哥哥扭波嘅時候，難得地捕捉到Yuki呢個過癮表情～ 哈哈！
開估！ 就係貝兒公主喇～ 宜家啲小丑哥哥真係好犀利，乜嘢都要識扭～ 又美人魚，又蜘蛛俠，又反斗奇兵。。。
希望將來有機會再見到呢班同學仔喇～
