新居出場

估唔到新居要入伙三星期後先可以出場同大家見面～

因為…因為大屋搬細屋，唔止唔見一籮榖，仲唔見哂啲收藏嘅空間～ 結果一直仲有幾箱嘢無開箱就咁喺廳中間過咗一個禮拜又一個禮拜～

最後決定要將佢哋趕出呢間屋～ 咁趕去邊呢？ 我哋搵咗一種好似迷你倉嘅服務，不過唔使自己拎去倉度，而係佢會上門收送～

好喇～ 所以直到今個星期終於個廳終於都似返個廳喇～

宜家個客廳有梳化、有電視、有鋼琴～

當然仲有用嚟上網寫blog嘅筆電喇～

至於飯廳方面，餐枱同餐椅喺呢個角落陪我哋食每朝嘅早餐～

飯廳嘅後面就係開放式廚房～ 同之前嘅廚房相比，呢個真係細咗一截，所以一定要向高空發展搵返多啲空間出黎～ 見到成幅牆都係層架同掛通就大概感受到喇～

咁洗手間呢？就同之前差唔多大細～ 好在都係有個大枱面，可以放好多Mommy嘅扮靚用品～

另一邊就係花灑淋浴間～ 用趟門，唔怕啲水飛哂出嚟～

不過淋浴間又係原本無乜擺嘢嘅位置，所以Daddy都自行加設咗一啲置物架～

咁睡房又如何呢？ Daddy Mommy嘅房除咗應有嘅雙人床，仲有Yuki之前嚮舊屋個廳放玩具嘅組合架～ 因為宜家呢度嘅廳同Yuki房都實在搵唔到地方安置，所以唯有放入Daddy Mommy房囉～

登登登登～ 最後到Yuki嘅房間嘞～

一入門口有張學校式小書枱及椅～ 貪佢細得嚟啱啱放得落果個位置，兼且呢張枱椅都可以調較高低，應該可以用好幾年～

另外呢邊係一張大人size嘅單人床～ 係用返之前Yuki喺舊屋瞓地台果張床褥～

咁點解仲有個ＢＢ用嘅床邊圍欄呢？

因為Yuki雖然唔係ＢＢ嘞～ 但係都仲係太反瞓喇～ 一晚之間可以由床頭到床尾再返床頭，其間再加頭腳位置作多個高難度轉體變換位置～ 所以Daddy Mommy深信如果無嘢圍住張床，Yuki應該一晚會跌落地無限咁多次～

由床上嘅角度望返過嚟～ 就有Yuki自選顏色配搭嘅衣柜～ 雖然比起之前間房細咗，但係總算最重要嘅幾樣嘢都有喇～

搬咗嚟呢度三個星期，最開心係可以坐幾層電梯就去到爺爺嫲嫲屋企嘞～

期待喺呢間新居留下一啲美好嘅生活點滴同回憶啦～

再見了幼稚園～謝謝～

剛過去呢個星期二～ 係Yuki幼稚園生涯嘅最後一日喇～

喺蘇浙幼兒園加幼稚園足足度過咗四年～

呢日係最後一日上課日～ 老師特別批准小朋友可以叫埋父母一齊～

Daddy拎唔到假，好彩仲有Mommy啫～ 所以Yuki都好開心呀！

老師亦已預先講好咗叫小朋友可以帶啲嘢食返去一齊分享～

所以。。。所以就搞到成幾張枱加埋先放得哂嘅零食～

今日除左食嘢之外，另一重要環節就係自由發揮嘅表演嘞～

老師俾每個小朋友自己選擇表演一樣自己鍾意嘅嘢～ 可以係唱歌、彈琴、跳舞、之類～

咁Yuki表演乜嘢呢？ 就係近來嘅得意之作－－魔術嘞～

大家都知道魔術師通常都要有個助手㗎啦～ 咁呢個情形之下，好明顯助手就係Mommy喇～

亦因為咁，無人得閒影Yuki表演魔術囉～

全部同學表演過後就到大合照時間～ 大家搵到Yuki嘛？

然後各自再同好友合照～ 呢幾位都係上次生日會有Yuki特別安排小禮物嘅幾位好朋友～

除咗同學之外，最重要當然係老師喇～

Ms. Sharon~ （英文老師）Thank you very much! 

李老師～ 謝謝你教Yuki口風琴呀～

陸老師～ 謝謝你！ 從Yuki K1開始的班主任，見證著Yuki從幼童到現在小童階段～ 你令Yuki長大變成了一個又乖又成熟的小孩子～

陸老師更見證咗Yuki同Hillary由敵(K1)變友(K2)呢個大轉變～

係時候講再見喇～ 所有同學都唔捨得老師～

一擁而上將老師抱住～

當然仲有李老師喇～

課室門外留影～ K3A再見～

（帶大家坐返時光機去四年前，Yuki兩歲時同Daddy於學校門口合照～）

＜２００８年９月１日：開學喇！＞

摩天大樓

香港第一高嘅摩天大樓係邊度？

隨著年代不同，由以前嘅康樂大廈，到合和中心，到中環廣場，到IFC，到最近期嘅係ICC：環球貿易廣場～

 

前排Daddy見到團購有天際１００觀景台門票平到５８蚊一張～ 即時買定三張準備天氣好啲嘅時候就去喇～

對上呢個週末見天色都幾清，雖然間有驟雨，但係好在啲雨水沖走空氣中嘅塵埃～ 所以果幾晚都覺得個夜景好靚下～

嚟到入口～ 有四部電梯直接由地面上到１００樓～ 全程袛需６０秒咋～

我哋選擇咗傍晚時份嚟到，希望可以睇哂日頭同夜晚～

由咁高望落去維港同以前見開嘅角度真係幾唔同～

Yuki無畏高～ 所以坐埋窗邊影都唔驚～ 嘻嘻！

後面嘅係海運大廈同中港城～ 由咁高望落去，見到啲船行過水面嘅痕跡，好得意～ 好似睇住啲模型船咁～

為咗要令Yuki笑得自然啲～ Mommy同Yuki兩個互相唧對方～ 睇嚟Yuki輸俾Mommy喇～

Yuki手上揸住乜嘢呢？ 其實宜家好多遊覽景點都會專門為小朋友搞啲小意思～ 好似天際１００就有本簿俾小朋友蓋印～ 成層觀景層有８個主題蓋印～ 另外本簿嘅底又有另一樣嘢玩架喎～ 睇落啲就知係咩㗎喇～

由另一個角度遠望港島中環至上環～

觀景層有幾個收費望遠鏡～ 好似要１０蚊一次～ 睇嚟唔係好受歡迎啦～ 都無乜人真係入錢睇嘅！

由７月１１到９月２，仲有增設一個展覽：「罐設精神」香港景物展(“Yes We CAN!”Exhibition)

利用罐黎砌出香港五大景物～ 例如尖沙咀鐘樓～

叮叮電車～

向西端海邊遠望～ 望得好遠，啲船變得好細隻，好似可以見到大嶼山添～

七點鐘過後～ 開始有一絲絲日落夕陽染紅啲雲～ 天際１００並唔阻止人用腳架影相～ 所以到日落時份就會有啲攝影發燒友帶齊裝備嚟影相㗎喇～

好嘞～ 頭先講到果本簿背面有乜嘢呢？

見到一堆小朋友好努力咁喺張枱度寫乜嘢呢？

Yuki, 你講解下喇～

「我哋畫畫填顏色呀！」

完成～ 個背面其實係一張俾小朋友填顏色加畫畫嘅明信片～

張枱側邊就有個假郵筒俾你可以寄出張明信片～ 仲要唔使你貼郵票都幫你寄㗎～ 說時遲那時快，今日已經收到Yuki寄俾Yuki嘅明信片喇～

再過半小時，七點三十分～ 太陽已落得七七八八～ 入夜嘅城市開始亮起燈來～ 親身感受著香港的日與夜之間～

成層樓最多人排隊影相位就係下面呢個喇～ sky100模型～ 好多自由行都會影呢個模型㗎～

如果大家有興趣去參觀就要留意有兩個香港居民嘅優惠喇：１）暑假期間成人＄１００，小孩／長者／全日制學校學生＄５０； ２）龍年人士於出生月份可以免費入場～

＜天際１００香港觀景台＞

回饋回饋

回饋乜嘢呢?

就係回饋我哋嘅台灣朋友喇～ 上次我哋嘅台東之旅，多得CPU阿姨一家嘅熱情招待～

今次終於到佢哋嚟香港俾我哋一盡地主之誼喇～

先到酒店會合佢哋先～ 我哋都係第一次嚟四季酒店咋～

大家都未食午餐，所以第一站就先去佢哋好鍾意食嘅翠華餐廳喇～

CPU阿姨同Wii叔叔好想食嘅菠蘿油結果都係賣哂無得食～ 好可惜啊～ 不過好彩都食到奶油豬仔包，凍檸茶，凍奶茶～

至於Yuki，上次離開台灣時Wii叔叔已經同佢約好下次見面要再表演魔術～

所以Yuki好努力咁練習一個新魔術～ 就係將支叉變成隻匙羮～ Yuki變得好成功，無穿崩呀～

食飽嘢先去附近shopping一下～

Yuki三個月無見虎虎，並無生保到，一見面就玩得好開心喎～

大人購物，小朋友玩波?!

睇真啲～ 唔係波喎～ 係柑嚟㗎！

睇下虎虎抛呢個無影球～

下一站係香港名勝：山頂～

我哋都好一段時間無嚟過山頂～ 原來宜家好多舖頭都唔同咗～

今次CPU阿姨佢哋四代同堂一齊嚟香港㗎～ 除咗上次去台灣都見過嘅虎虎婆婆之外，今次仲有虎虎婆婆嘅媽媽，即係虎虎太婆囉～

歡迎你哋呀～

兩個小朋友揸住即影即有相片係咁fing fing fing~

虎虎踎喺Yuki姐姐側邊，Yuki即時變得好大個啊～

虎虎仲攬住Yuki姐姐一齊合照添～

 

既然咁耐無嚟過山頂～ 趁今日有朋友幫手揸機，麻煩佢哋幫我哋影張一家三口嘅合照先～

 

晚上我哋喺銅鑼灣食飯～

虎虎居然肯俾Yuki姐姐餵佢食喎～ Yuki亦餵得好開心呀～

快樂時間過得特別快～ 好快又到要講掰掰既時候～

希望好快可以同你哋再見喇～