早來的生日禮物

今日Yuki提早收到生日禮物～　因為我哋聽日出發去旅行喇～　而Yuki生日會喺旅途中，所以Daddy Mommy特登安排先喺香港送咗禮物俾Yuki先喇～

今日Yuki收到呢份禮物，其實Yuki想要咗好耐～　　最近呢幾年每次去Sogo，Yuki都會喺個專櫃玩返一陣先捨得走～

Daddy Mommy見Yuki今年成績咁好，希望趁呢個機會好好獎勵兼鼓勵一下Yuki～　所以今日去銅鑼灣同Daddy食完慶生午飯就喺Yuki唔知情嘅情況下，我哋又行去Sogo嘞～

Yuki如常玩呀玩～　Mommy負責引開Yuki注意，Daddy就拉開售貨員哥哥靜雞雞俾錢買咗呢盒玩具嘞～

而Yuki如常玩咗十零廿分鐘後，叫Yuki離開果陣，Daddy俾咗個袋Yuki拎住～　第一時間Yuki並未意會到，順手接過個袋～　到Daddy叫佢望下袋裏面…. 嘩！Yuki即時開心到彈起～　真係彈起～　個袋都跌埋落地～　哈哈！

返到屋企，即刻開嚟再玩返陣先～　

呢個遊戲其中一個好處係訓練小朋友３Ｄ層面思考點樣駁埋一舊一舊嘅積木，令到粒波子可以行唔同嘅路線出返嚟～　

玩完一輪都要有節制地收返先嘞，因為要準備埋旅行出發嘅嘢～

收埋果陣都好有心機地排得好靚喎～

睇見Yuki收到呢份禮物咁開心，真係貴啲都值得嘅～　加上益智嘅玩具對呢個年代嘅小朋友更加重要～　Daddy Mommy寧願見到Yuki花時間去諗點樣玩好呢種遊戲，好過花時間去對住手機／平板電腦打機！

同場加映，今日其實係Daddy嘅生日正日～　Daddy都有份佢好鍾意嘅生日禮物呀～　就係Yuki捉住隻手果隻錶喇～　

愉景灣夏日大放送

星期五果晚，Yuki拎住一張愉景灣嘅宣傳暑假推廣單張，叫Daddy睇喎～

原來係愉景灣嘅商場搞嘅活動～　有啲３Ｄ地畫同埋有個歷奇樂園～

見我哋都好似有成六年無踏足過愉景灣喇～　

趁游水堂暑假開始改咗時間，今個星期六得閒啲～　即刻實現Yuki嘅夢想喇～

去愉景灣，始終都係覺得搭船去先有feel~

一落船就感受返愉景灣悠閒嘅感覺～　呢個廣場無乜點變喎～

Yuki喺樹下執到啲草話要嚟做頭飾喎～　靚嘛？

Yuki比起六年前嚟愉景灣（即係歲幾未夠兩歲）真係大個咗好多呀！　（大家有興趣可以時光倒流返去…呢篇）

今日我哋要去玩嘅地方原來係愉景灣北商場～　唔怪之得我哋落咗船週圍行都搵唔到果啲３Ｄ地畫喇～　好彩Yuki去問咗個詢問處姐姐話我哋知咋～　

呢度有個免費穿梭巴士站去果邊嘅商場㗎～

有約五至十分鐘車程就到愉景灣北商場喇～　呢邊商場無碼頭果邊個大～　不過環境都一樣咁靚㗎～　

呢邊仲就近有間愉景灣酒店添～　表姑姐佢哋好鍾意入去玩㗎～

３Ｄ地畫嚟喇～　呢幅好似唔算好驚險嘅樣喎～

嗱！呢幅就驚險好多嘞～　地面爛咗～　果架車衝落去喇！

哎呀！好多鱷魚呀～　Mommy等Yuki救你吖～

幣喇～　連Daddy都跌埋落隻木筏度，就嚟沖落瀑布喇～

呢幅畫好長～　成兩個舖位，影唔哂呀～　

Yuki你行條繩要小心啲呀～

最後一幅喇，我哋發現好多金寶藏呀～　

愉景灣嘅超市好特別～　除咗入面好多專門為愉景灣住客群而賣嘅貨品，例如：好多貓貓狗狗用品同食品～　

連超市門口都專登整咗個狗隻等候專區～　嘩哈哈！　唔知如果幾隻鄰居狗狗一齊喺度等主人嘅時候會唔會傾到唔捨得走呢？

玩完啲免費嘅嘢～　跟住玩啲要錢嘅喇～　

呢度就係歷奇樂園喇～　好似市區果間Playhouse~

宣傳單張有coupon可以免費玩３０分鐘～　

可惜袛係周一至周五先用得～　

咁一場嚟到無理由就咁走㗎～　都俾Yuki入去玩返陣喇～

呢個小型攀石之前Yuki喺官塘玩過～

宜家大個咗咁多就更加輕鬆喇～

Abseiling式落地～

咁耐無打Golf～　拎起支putter都有姿勢喎～

頭尾喺愉景灣玩咗三四個鐘，要搭船返中環喇～　

希望下次唔會又等六年先再嚟喇～　

才藝匯演2014

明明尋日話開始放暑假，做乜今日又返學校呢？

今日其實係學校所舉行嘅才藝匯演～　其中一個目標係籌款用嚟等學校請多一位英語外籍老師，等每班每星期可以有英語外籍老師嘅課堂可以多啲～

今年嘅才藝表演分兩場舉行～　Yuki有幸地兩場都有份參與團體演出～　第一場係表演英語朗誦～　係上一次佢哋代表學校參加校際比賽得冠軍～　　第二場係表演古箏～

先嚟第一場，三位小司儀都係二三年級嘅同學～　男司儀仲係Yuki一年級嘅同學仔嚟㗎～

首先出場係樂隊演奏～　演奏曲目係：In the hall of the mountain king

Yuki聽完呢個表演就好鍾意呢首歌～　返屋企都要喺Youtube再搵出嚟聽～

跟住就到佢哋嘅英語朗誦喇～　嘩!好多人舉機～　Yuki喺邊呢？

終於喺人叢同機叢中搵到Yuki喇！

‘Polar bear in the garden!  yelled Ozzie..’ 　

‘Mountain lion in the garden! yelled Ozzie’

‘But a man-eating tiger escaped from the zoo!’  七情上面，皺哂眉！

順利表演完畢，排隊落台～　

仲有咩表演呢? 咦! 學校原來又有國術班喎～

教國術班嘅師父有啲熟口面喎～　　呀！　記得喇～　喺電視見過介紹佢㗎喇～　佢係黃飛鴻嘅契仔李燦窩師父呀～

佢哋表演嘅有洪拳，同埋唔記得邊幾套拳～ 嘻嘻～

舞蹈方面有東方舞同西方舞～　下面呢班同學跳嘅係烏克蘭舞～

個半鐘嘅表演，八項表演項目～　最後校長連同所有表演同學一齊出嚟多謝大家～

距離下一場雖然有個半鐘～　但係Yuki因為有表演，所以第一場未完佢已經要去綵排下一場嘅古箏喇～

第二場仲有爺爺嫲嫲嚟捧場添～

呢場嘅司儀係另外三位同學～　佢哋好叻呀～　完全唔使貓紙可以記到哂啲稿～

第一個表演項目就係古箏喇～　見唔見到Yuki喺邊呢？

Yuki話佢有哋緊張，所以無乜笑容咁～　

開始彈喇～　總共八個古箏班同學～　Yuki係唯一一個二年級生～　

Yuki一臉認真地彈～　表演唔錯吖～　Yuki上年一年級時自己話想報名學古箏班～　呢兩年雖然袛係每星期得一日課後學嘅古箏～　但係Yuki嘅表現得到古箏老師嘅肯定～　睇嚟都要考慮下喺屋企買返個古箏俾Yuki再多啲時間彈～

表演完畢～　起立～　鞠躬～

下面呢班跳縄隊好勁㗎～　兩場都有份表演！

不過最估唔到嘅係居然連粵劇都有呀！　由二年級到六年級嘅同學演出～

呢個花旦啲做手真係似模似樣㗎～

經過各個項目嘅表演同學努力表演之後又到講拜拜嘅時候喇～　

今次Yuki有份出嚟謝幕喇～　嗱～　就喺左手邊果度呀～　

希望你哋好似方校長所講，今次嘅表演袛係開始～　繼續發掘同發揮你哋嘅潛能～　加油！