六年後重遊澳門（二）

由漁人碼頭並無巴士去返氹仔～　的士又唔多見～

把心一橫！唯有行返去外港碼頭搭新濠天地嘅發財車喇～

結果連行帶搭車，都用咗成個鐘先由漁人碼頭去到新濠天地～

第一時間將套票封信換咗入場券先～

一行七人～　坐Ｂ區～

五點場，四點半可以開始入場～　有半個鐘先間週圍行下～　咦？！　有Pacific Coffee喎～　

入去一坐就坐咗半個鐘～

開始入場喇～　

成個show全無冷場～　本來仲以為呢日由朝早六點幾出發，到傍晚睇水舞間可能已經攰到瞓著～　但係大家都好勁無瞌眼瞓喎～

雖然唔係完全明白個故事內容～　但係淨係欣賞個場景，啲水同舞台變嚟變去～　表演者果啲合作無間～　

好睇！

睇完出嚟都仲未天黑～　出發去氹仔市區食埋晚飯先返香港～

新濠天地有穿梭巴士來往氹仔市區～　　

沿途經過氹仔好多酒店～

六年前嚟果陣氹仔仲係初初發展～　袛係得威尼斯人～　

今次嚟多好多又大又靚嘅新酒店呀～

下次搵機會過夜咁玩一次先！

到達氹仔官也街～　我哋晚餐訂咗位去山度士葡國菜～　不過未夠鐘未有枱俾我哋～

剩機喺官也街買定啲手信先喇～

呢間晃記餅家都好耐歷史，又好出名㗎～　呢排最出名嘅肉切酥已經賣哂～　我哋都買咗啲杏仁餅同金桃酥～

呢間山度士葡式餐廳都好旺場㗎～　所以我哋一個星期前已經嚮香港打定電話過嚟訂位～

間餐廳唔算好大間～　如果人少都可能可以試下walk-in～　人多就最好預早訂位喇～

我哋叫咗幾樣招牌菜～　

焗鴨飯～　燒乳豬～　燒春雞～　炒硯～　個乳豬同個鴨飯最正～

我哋坐最入果張枱，影返出門口～　一眼睇哂～　　老細就係門口左邊收銀機果位叔叔嘞～

食完呢餐好味又滿足嘅葡國菜～　再嚮官也街買多少少手信～

呢個一日遊行程已近尾聲～　去的士站搭的士去氹仔碼頭喇～

特長嘅十六小時一日遊告一段落～　

去到碼頭等唔到候補位上早一班船～　唯有等返十點半班船～　Yuki攰到要坐欄杆呀，陰功～

不過點都好～　呢日好多謝爺爺嫲嫲公公婆婆賞面一齊去澳門玩一日～　希望佢哋玩得開心喇～

六年後重遊澳門（一）

呢個踏入暑假第一旅，我哋約埋爺爺麻麻同埋公公婆婆一齊去睇「水舞間」，兼且嚟個澳門一日遊〜

估唔到宜家去澳門嘅船飛都幾緊張〜

我哋早一個星期出船飛已經得返朝早七點半或者下午兩點半先有位〜  我哋一日游無理由下奏兩點船先過去㗎嘛〜 所以最後決定嚟一個十五小時澳門一日游〜 朝七點半到晚十點半船！

我哋買嘅套票包金光飛航嘅船飛〜 喺港澳碼頭上船，氹仔碼頭落船〜

氹仔呢個碼頭仲係一個臨時碼頭，所以比較細〜 兼且無乜舖頭〜

唯一同外港碼頭一樣嘅就係一出碼頭都有好多賭場嘅發財車！ 但係我哋嘅第一站呢啲發財車去唔到〜 我哋要自己搭巴士去嘅〜

坐咗幾個字巴士終於到內港碼頭落車嘞〜 啱啱就係十六浦酒店門口~

向十月初五街行多幾分鐘就到我哋諗住食早餐嘅地方-- 南屏雅敘〜

呢間餐室又係保持古老裝修〜  細格紙皮石～　分地下同二樓～　

Openrice食評對佢嘅超厚蛋三文治評價甚高〜 睇下個腿蛋治同叉蛋治，真係成吋厚㗎〜

行程嘅下一站係澳門嘅標誌建築－－大三巴～

由南屏雅敘行過去袛需要十分鐘左右～　印象中六年前嚟嘅時候唔多覺右邊呢座建築物～

先喺大三巴牌坊底交功課影返幾張團體照～

難得Yuki可以同爺爺嫲嫲、公公婆婆一同出遊～　梗係要一齊影下合照喇～

喺牌坊底下影完，我哋梗係唔夠喉喇～

但係爺爺嫲嫲、公公婆婆Pass！　唔行喇～

唔緊要～　我哋自己一路上，一路影！

望見嚟條樓梯，不其然腦海中出現返六年前Yuki一歲時拖住手行樓梯嘅情境～

（重溫：My first trip (8/19-20) の 最終回)

大三巴隔離有個「澳門博物館」～　當時Yuki太細無去過～

宜家就啱行喇～

館內有好多嘢介紹澳門嘅歷史，有齊仿故舊中式建築，同仿葡式建築～

故老郵筒，Yuki呢一輩未見過～

 

博物館內另一個吸引處係啲縮影模型～

做得好細緻，好靚～

Yuki睇得好開心呀！

有以前啲人結婚抬轎出門、以前內港碼頭擺賣嘅熱鬧環境～

博物館直通到炮台公園～

Yuki指定話要上嚟影相㗎～

離開新馬路區，去漁人碼頭，同埋諗住去澳門科學館俾Yuki玩下～

萊斯酒店幾靚㗎～　Yuki呢幅跳高相，影一次就掂喇！

今次再去漁人碼頭真係幾失望～　啲舖頭十室九空～　比起當年剛剛開幕實在爭太遠喇～

我哋求其搵間酒家飲個茶已經三點～　唔夠時間去科學館喇～　

嗱～　不過Yuki並唔係無得去科學館就擺呢個間出嚟呀！　佢袛係作狀擺pose咋～

既然唔多夠時間，我哋索性早少少去定氹仔新濠天地等睇五點果場水舞間～

留意住下集水舞間同好味葡國菜喇～

下水禮之二

呢篇下水禮之二，係Yuki自己要求要叫呢個名㗎～

今個星期我哋又向大浪灣出發喇～

咁啱今日大浪灣有啲三項鐵人嘅比賽喎～

落水果下幾墟撼～

唔知有無人發現塊滑浪板唔同咗呢？　係呀！因為上次買果塊反斗城嘅質數唔太得～　塊板中間已經有啲裂～　　所以今日即刻喺大浪灣買過塊呢種實淨啲嘅～

開頭都唔係好大浪～　沖得唔係好遠～

食完晏之後就開始大浪喇～　Yeah!　睇下Yuki後面啲浪，同埋Yuki幾定！

大浪灣嘅地形仲唔係成個灣都咁大浪㗎喎～　係中間至右邊先比較大浪～　由其是右邊呀！　好多玩大滑浪板嘅人都係喺哂右邊玩㗎～

我哋見到有個姐姐好叻呀～　都係用Yuki呢種板都可以企起身滑㗎～

睇黎今期夏天會嚟大浪灣好多次lu～