答應過Yuki呢個冬天帶佢去過一個玩雪之旅～ 目的地嚮北海道同韓國之間選擇咗韓國～
Daddy自從２００５年曾經出差去過首爾幾日，今次都算係第一次去韓國旅行～
出發前搵資料，都諗緊１２月首爾可能都未落雪，不過滑雪場都應該有雪～ 估唔到出發前兩個禮拜，首爾落咗３２年以嚟最大嘅雪～ 氣溫仲跌到零下１５度（－１５Ｃ）～
今次全個行程總共七日～ 頭兩晚首爾，跟住兩晚去滑雪場酒店，最後兩晚返首爾～
第一晚唔使俾酒店錢！ 哈哈！ 因為喺飛機上面瞓～
零時五十五分起飛嘅班機，機場大部份舖頭都關咗門～
雖然已經係零晨１２點半，但係Yuki小朋友仲係好精神喎～ 有得去旅行同去玩真係唔會眼瞓㗎～
話咁快三個半鐘嘅機程就過咗喇～ Yuki亦係機上瞓足三個鐘以上～ Daddy好記得因為開始派兒童餐之前Yuki同Mommy都已經瞓咗～
落機嘅時候都ＯＫ精神喎～
雖然首爾快香港一個鐘～ 但係落機呢刻都袛係韓國朝早五點幾，天都仲未光！
未出到室外，不過透過自動門開合時偷走入嚟嘅寒風，已經感受到零下溫度嘅威力～ 即刻開喼拎返啲頸巾同帽出嚟先！
出到機場巴士站，可能俾寒風驅走埋剩餘嘅睡意～ Yuki已經完全醒哂～ 仲好興奮添～
我哋喺首爾會住Ibis明洞酒店～ 剛剛喺機場巴士６０１５號路線有一個站喺正門口～
成人一程KRW10000 小童KRW8000
車程約一個半鐘去到酒店～
行李方面，本來諗住淨係帶兩個大喼～ 但係始終冬天衫比較大件，最後發覺都係塞唔哂入兩個大喼，唯有帶多一個細喼啦～
到達ibis酒店～ 地下大堂袛係information counter同concierge～ Front-desk喺１９樓～
不過咁早當然未有得check-in喇～
所以我哋袛係放低行李就再出發嘞～
Yuki呢朝好似做緊帽嘅時裝表演咁～ 落機場一頂黑色，宜家又轉一頂粉紅色～
唔止帽添喎～ 仲有Hello Kitty毛毛護耳罩～
趁Mommy喺lobby用緊電腦，Yuki偷偷地出去試下踩地下啲積雪～
哎呀！俾Daddy發現咗添～
等埋Mommy，先係酒店附近明洞搵間coffee shop食個早餐～
跟住隨意喺附近行下～ 影下～
做乜Yuki咁開心呢？ 梗係喇～ Daddy借左部大單鏡相機俾佢同隻公仔一樣吖嘛～
咁Daddy用乜呢？ 等Yuki影返俾大家睇下喇～ 哈哈！
行到嚟化粧品舖頭林立嘅大街，舖頭陸續開門～
好多間都裝修得好靚，好吸引呀～
有無留意到Yuki又換咗帽喇～
忽然間，Daddy覺得有啲嘢喺鏡頭前飄過～
放下相機，細心啲睇清楚…. 原來係落雪呀！
我哋好好彩呀！ 一落機幾個鐘頭就遇到落雪～
呢次係Yuki第一次見到落雪～ 上一次喺日本中部白川鄉都袛係見到積雪～ 今次真係俾Yuki見到啲雪由天上面好似落雨咁飄落嚟～
落咗一陣間就見到有啲雪喺Yuki嘅頭髮度喇～
然後我哋再往南大門方向出發～ 因為Mommy想去幫Yuki再買多少少厚衣物即刻可以著～
喺地鐵站嘅商場居然見識到韓國舖頭開張～ 原來都係好似香港咁有花籃㗎～
買左衫褲，仲要買埋鞋～
買完一輪嘢出返嚟，啲雪比剛剛更大～ 地面已開始有少少積雪～
落到地鐵，小model即刻要show下對新boot～
酒店１１點可以check-in～ 我哋先返去check-in，順便抖一抖～
再出發時，Yuki已經換哂剛剛新買嘅衫、褲、鞋喇～
下午第一個行程係去high tea～ 先要搭地鐵～
去到狎鷗亭站～
再轉的士～ 約幾分鐘車程～
呢度就係Mommy介紹嚟high tea嘅queens park喇～ 少女時代好鍾意嚟呢度食pan cake㗎～
嗱！ 就係呢啲喇～ 呢件係藍莓pan cake～ 真係超好味呀！
著咗一身新衫嘅Yuki當然要俾Daddy影多啲相喇～ 順便俾Yuki出去踩下雪嘛～
下面呢個甫士真係唔知應該點形容～
Yuki轉住身好似西部牛仔開槍咁，所以對腳拗到。。哈哈！
唔止一張㗎～ 如是者影咗好多張都keep住呢個甫士～ 不過Yuki鍾意被影相同擺甫士絕對係Daddy嘅福份喇～
鏡頭一轉，去到今晚食飯嘅地方～
今晚Daddy約咗個舊同事一家人一齊食飯～
食飯地點係鷺梁津海鮮市場～ 搭地鐵直頭去到一個叫鷺梁津站～ 出站行過天橋約五分鐘左右就到～
好似香港嘅鯉魚門，有好多海鮮檔～
買咗海鮮就可以搵啲食肆幫你煮～
今次Daddy終於都試到八爪魚剌身喇～
仲有大大隻嘅長腳蟹～
多謝Ivan叔叔安排呢個又美味又特別嘅重聚呀～
Yuki亦第一次見到Ivan叔叔、Karen姨姨、Kanak同Kamini～
唔知我哋下次碰面會喺咩國家呢？ 嘻嘻～
