1600熊貓@PMQ

 

上次熊貓喺維園快閃得Yuki有去睇到，Daddy Mommy無份睇，所以等熊貓今次喺尾站PMQ展覽，Daddy Mommy一於帶埋Yuki再嚟搵下熊貓喇～

今次做展覽呢個地點ＰＭＱ元創坊，以前係警察宿舍～　記得我哋２０１０年＜農曆新年行大運＞果陣都有行過呢區附近～　

宜家經過活化之後完全唔同哂～

嘩！啲熊貓好似蟻咁細粒呀～

近距離再影下先～

千六隻熊貓做背景，Yeah!

今日其實仲約埋啲朋友仔一齊去睇熊貓㗎～

呢千六隻熊貓展覽完畢之後仲可以俾大家領養添～

近距離大家睇下邊隻得意啲？

除咗廣場上淨係睇得嘅熊貓之外，另外有一個抱抱熊貓區～　袛要捐錢就可以抱啲熊貓影相㗎喇～　之不過果條隊太長喇，我哋都係選擇唔排喇～

睇完地下嘅熊貓，上樓睇下ＰＭＱ有咩其他嘢睇先～

原來樓上幾層已經全部改裝成為一間一間細細嘅舖頭，俾好多本地創作嘅品牌～

各式各樣嘅嘢都有～　呢個眼鏡框同Yuki襯嗎？

大家有時間都嚟行下，支持一下本地創作嘅品牌喇～

父親節Go!Japan?

一年一度父親節又到喇～

Yuki忍咗幾日唔同Daddy講買咗乜嘢禮物，今日仲於可以送俾Daddy喇～　就係一副太陽眼鏡嘞～

咁點解今日父親節要Go Japan呢？　一陣再講～　

我哋先喺會展中心食個晏先～　今日就係因為呢幅親子selfie令Daddy喺facebook得到四十幾個like呀！多謝大家～　呢副相一定要喺blog度留個記錄喇～　Yuki又真係笑得幾甜嘅～

我哋嚟會展中心其實係睇旅遊展～　

呢個Disney攤位有兩幅好靚嘅佈景～　一幅係眾公主喺公主城堡前面～

另一幅係和服Mickey & Minnie～

好嘞！　重點嚟喇～　睇到後面呢幅牆，應該會估到我哋嚟搵邊個啦掛？

無錯喇！就係搵「日語大放送」嘅主持人Rie同Jam囉～

睇咗佢哋節目好多年～　原來２００５年就開始播㗎喇～　真係Yuki未出世就喺Mommy個肚裏面就開始睇～　嘻嘻！

Jam同喺節目入面一樣都係咁鬼馬～　Rieさん都係一樣咁親切～

希望JP Time長做長有喇～　

2014夏水了

試終於考完了～　

之前端午節無游龍舟水，今個週末可以落水喇～

大浪灣今日雖然袛係星期六，都係依然多人～　一片太陽傘海！

可能今日呢個時候有啲水退，個沙灘好長！　行好遠先去到啲水度～

另外今日好大浪下～　有好多滑浪嘅哥哥呀～

啲浪算係我哋嚟大浪灣最勁嘅一次～　有成個人咁高㗎～

今年我哋再買多一塊大啲嘅滑浪板，可以Daddy或者Mommy同Yuki一齊玩～　不過今日浪太大，我哋袛係拎一塊出去咋～　安全第一，拎兩塊大浪起上嚟都唔知顧得邊塊？

第一日「夏」水，玩住咁多先～　到正式放暑假可以星期六早啲入嚟玩耐啲！

Mommy快啲康復呀!

這個端午節假期，我哋都喺醫院中渡過～　因為Mommy剛剛要入院幾日，為咗可以爭取儘量多時間陪伴喺Mommy身邊，所以Daddy同Yuki每朝八點幾九點就去到醫院送早餐俾Mommy，一路陪到夜晚九點幾十點～

因為Yuki仲有一個星期就要考試嘞～　但係Yuki又唔肯留喺屋企，係都要同Daddy一齊去醫院陪伴在Mommy側邊～　

所以袛好將溫習考試呢個活動移師到病房進行喇～　

每當有護士出入嘅時候，啲姑娘就會讚Yuki咁乖喺度溫習陪Mommy!

其實要咁樣喺間病房裏面一日十幾個鐘真係唔容易㗎～　所以Daddy Mommy都覺得Yuki嘅表現真係幾值得讚嘅～

其中一張溫溫下開始坐唔定嘅甫士～　

Mommy希望果啲令你身體唔舒服嘅嘢俾醫生拎走哂～　祝你身體健康，快啲復原呀！