呢個星期日我哋一早就上到山頂食早餐～
今朝呢間餐廳俾出席今日呢個慈善步行嘅人差不多包起間餐廳咁滯～ 門口源源不絕嘅人排隊等入座～
山頂嘅凌霄閣～ 我哋都有一段時間無嚟過喇～ 今日天氣乾爽，好舒服～
逐漸長大嘅Yuki愈嚟愈唔接受影相指示嘞～
或者影得嚟會有自己鍾意嘅甫士或者表情！
下面呢幅唔知點形容好囉～
呢個為兒童心臟基金會籌款嘅一年一度慈善步行喺山頂舉行～
有警察銀樂隊吹風笛表演～
有攤位遊戲玩～
又有畫面或者畫手～
Yuki隻手有幾多粒星呀？
路程係沿著山頂夏力道同盧吉道行一個圈約三四公里度喇～
我哋出發喇！Yeah!
呢條路線都幾好行～ 其實好平坦～ 無乜斜路～
中途仲見到有個小瀑布添～
幾個小朋友行埋一齊自得其樂～
一時玩新聞報導～ 記者訪問～ 一時又變成廣告時間～
中途有幾個Checkpoint同３個兒童加油站～
兒童加油站就係幫佢哋吸印仔嘞～
行到尾段望到成個維港～ IFC同ICC齊入眼簾～
行完嘞～ 多謝大家支持呢個咁有意義慈善步行～
今年嘅重陽節假期我哋參加咗一個南丫島一日遊～
自己包船由中環９號碼頭出發去南丫島～
船程雖然短短地，不過既然咁多小朋友，都玩下ＩＱ題喇～
Yuki同Charlotte姐姐輪流揸咪發問ＩＱ題～ Yuki開始唔怯場喎～ 對住咁多人揸咪都唔驚～
唔駛四十五分鐘就去到索罟灣嘞～
先喺索罟灣週圍行下～ 睇下天后廟～ 又行咗去一個叫黑風洞～
午飯就喺碼頭旁邊果堆海鮮酒家～
之後我哋再搭船幾分鐘去咗海中間呢個「南丫島漁民文化村」
今次旅行仲有埋Ivan Evan兩兄弟同Hillary Hannah兩姊妹添～
呢個喺海中間以漁排組成嘅旅遊點，會有導賞員講解香港漁業嘅知識～
導賞員哥哥宜家示範用魚仔餵佢腳下嘅芝蔴班，龍躉～
Yuki聽聽下書做乜伸隻手出嚟呢？
原來哥哥拎咗隻海星俾大家睇呀～
去到另一邊有啲其他海洋生物～ 呢對係馬蹄蟹～ 好細隻呀！
聽完一輪書～ 仲有咩睇呢？
有架迷你版帆船喎～
仲有兩隻實物原大嘅龍舟添～
Yuki加油！Yuki加油！
做完撐果個～ 又做下打鼓果個先～
一排排嘅舢舨～
三妹嘜坐埋一個韆鞦，會唔會爛㗎～
今日雖則話已經係重陽節～ 但係都仲好熱呀～ 又熱又曬～
有咩消下暑呢？ Yuki揸住果塊冰菠蘿囉～ 話咁快賣哂呀～
最後自由活動時間可以俾大家喺漁排上餵魚或者釣魚～
Yuki拎住桶魚去搵返啲芝蔴班餵佢哋～
唔好以為餵魚啲魚仔好細條～ Yuki拎上手都有手掌長度有多㗎～
到最後嘅無鈎釣魚嘞～ 係呀～ 無錯，係無鈎！
佢哋會將啲魚仔做餌用條縄綁住～ 跟住就可以釣魚㗎喇～
啲魚好犀利～ 一啖好快就食咗條魚～
最接近釣到就喺下面呢下嘞！ 條魚已經離開咗水面喇～
可惜未完全上到嚟條魚就食咗條魚跌返落水喇～
原來啲魚有成十幾斤重㗎～ 真係唔易釣㗎～
玩到三點幾係時候走喇～
多謝Mommy朋友安排呢個咁好玩嘅旅行呀～
