幼稚園都有謝師宴?

Yuki讀嘅幼稚園已有五十九年歷史，但係原來今年先至第一次舉辦謝師活動～

多得一班家長教師會嘅媽媽們努力籌備，為蘇浙幼稚園開創歷史的一頁～

嚴格嚟講，呢個唔算得係謝師「宴」～ 因為佢係上午9:30至11:30舉行，都係叫謝師聯歡會啱啲～

每個小朋友可以有一個大人陪同參與呢個聯歡會～ Daddy猜嬴咗Mommy所以有得嚟～

節目有唱校歌，校長致詞，畢業班級老師代表致詞，家長教師會會長致詞～

然後就有每一班嘅影相時間～ 同時，有義工媽媽派發畫紙顏色筆俾小朋友畫畫送俾老師～

K3A班合照～

 

Yuki所畫黎送俾老師嘅圖畫～

到五班都各自影過相後，司儀話嚟一張全級大合照～

成一百五十個小朋友一齊合照，有難度啊～

不過原來K3嘅哥哥姐姐真係唔同啲，頗合作哋完成呢幅合照喎～

呢個時候到咗全日嘅感動位！ 全級畢業同學一齊再唱一次「師恩難忘」，送俾咁多位老師，多謝佢哋陪伴咗呢班小朋友渡過生命中可以話係最開心嘅三年求學時期～

(用最高像素同全屏幕睇會比較清楚)

Daddy聽住佢哋一路唱，一路對眼唔知點解熱熱哋…

唱完歌有嘢食!

雖然唔算係「宴」，不過都有啲點心食嘅～ 大人一盒，小朋友一盒～

兼且每個畢業同學都有一袋紀念品頒發～

裡面有畢業紀念冊、畢業熊、筆袋～

自由時間，大家去搵啲同學仔影下相～ 呢個係Claris~

跟住有康妮～ Yuki同康妮都好有緣份～ 佢哋相識於兩歲時一次住醫院嘅經歷<首次入廠>，當時大家連ＢＢ班都未讀，不過啱啱係隔離床～ 點知後來入讀蘇浙又撞返，連喺校外去上課餘興趣班都撞到～

仲有呀，上面嘅師恩難忘片段都係多得康妮媽咪唔介意地俾我哋同大家分享咋～ 因為Daddy影完果段返屋企睇先發覺原來對唔中焦，矇咗呀～

而紀念品入面嘅畢業熊唔知邊個小朋友發起學似啲大學生畢業拋四方帽咁～ 呢班小朋友喺禮堂個台度拋熊呀～

好喇～ 最後Yuki要多謝幾位老師～

先有唔介意扮鬼臉俾我哋影嘅英文老師－Miss Sharon

下面呢張連Mommy第一眼睇都唔知原來有Yuki喺幅相入面～ 哈哈～

嘻嘻！ 正正經經再同Miss Sharon影一張～ Thank you, Miss Sharon!

跟住係李老師～ 佢彈琴好叻㗎～ Yuki所屬嘅口風琴隊就係李老師教㗎喇～ 謝謝李老師！

最後… 係Yuki由K1到宜家K3嘅班主任陸老師～

陸老師真係好鍾意小朋友，好有耐性～ 好想借用「師恩難忘」嘅一句：『如果沒有您辛苦的教導，童年回憶那有這麼好！』

謝謝陸老師！

小一準備

幼稚園老師為咗令呢班K3小朋友盡早開始習慣小學一年級後嘅生活，尋日開始一連七個星期，要佢哋自己根據老師嘅指示寫低每日有乜嘢功課要做～

最特別係每個小朋友自己設計一本屬於自己嘅家課冊～

呢本就係Yuki獨一無二嘅「學生家課冊」嘞～

老師仲要求家長配合每日檢查小朋友嘅家課冊，並且要家長簽名㗎～

幼稚園畢業了－後記

學校嘅畢業禮完結後，我哋K3A一班再往銅鑼灣一間樓上餐廳同陸老師聚餐～ 好多謝兩個同學嘅媽咪負責安排呢個場地，仲幫我哋安排埋旅遊巴士由學校載我哋去銅鑼灣添～

呢間餐廳有好多凡高嘅作品，因為餐廳就係名叫「凡高餐廳」囉～

為咗令陸老師可以同家長盡情傾計，仲有個魔術師嘅表演添～

真係所有小朋友都聚哂埋去個魔術師哥哥度呀～

呢個魔術師哥哥啲普通話都好好喎～ 睇真啲原來佢四年前蘇浙幼兒園嘅聖誕派對就見過佢㗎喇～ 當時仲有扮小丑去班房扭氣球㗎～ 原來佢叫做Sunday哥哥呀～

宜家佢啲魔術好犀利呀～ 大人小朋友都睇得好開心！

佢仲為在場所有同學仔逐一即時扭氣球俾大家呀～ 終於到Yuki喇～ 到底Yuki要Sunday哥哥扭乜嘢呢？

開估～ 係花花手飾～

三個好朋友齊齊戴住氣球手飾～ 過咗暑假就要各散東西喇～

臨走影返一個全體同學家長同老師大合照喇～

政熹媽咪同睿之媽咪真係好有心思㗎～ 佢哋仲為全班做咗呢兩張A3大小嘅過膠相片～

每個同學都一人一張～ 多謝哂呀～

幼稚園畢業了(咁快?)

雖然距離K3學期完畢尚有兩個月，但係Yuki既學校今日已經舉辦畢業典禮喇～

記唔記得Yuki獲選取為口風琴隊，將會喺畢業禮上表演哩～ 經過幾個月嘅訓練，宜家都吹彈得有板有眼喇～

因為要為表演預備，所以我哋要早十五分鐘返到學校，先行練習一下～ 老師仲幫有份表演嘅小朋友扣上襟花一朵添～

Yuki練不怠慢～ 開始聚精會神地練習緊喎～

 

原來佢哋嘅練習好認真㗎～ 除左練習吹奏之外，連坐喇，站立喇，躬鞠喇～ 全部都有練㗎～

最後練習完畢，老師帶小朋友去洗手間然後準備要進場～

點知喺呢個緊急關頭… 出事了～

Yuki被後面嘅男仔踩到佢嘅皮鞋～ 個鞋帶扣斷了～

個扣爛左就無辦法著住黎行～ 點算呢？

Daddy即刻問老師借左一個釘書機～ 孤注一擲地往斷開位置釘兩釘～

啲皮好厚，釘左第一次穿唔過～ 換過位置再試～

咦～ 今次ＯＫ喎～ 就咁喇！  希望可以捱到表演完喇～

非常慶幸地對鞋無辜負Daddy嘅緊急維修，返到屋企都無爛呀～

Yuki~ 放鬆啲，好似喺屋企彈得㗎喇～

畢業典禮正式開始～ 先由王校長致詞～

然後有學生家長代表致詞～ 呢個學生家長係一個外籍人士，但係佢居然識用中文同英文致詞，好犀利呀～

Yuki留意台上之餘亦有留意Daddy坐喺邊喎～

然後全場所有畢業K3小朋友為老師唱出一曲「師恩難忘」～

『親愛的老師，我向您行個禮，您可知道我們都愛您，

如果沒有您辛苦的教導，童年回憶哪有這麼好。

您是爸媽敬愛的好朋友，教我成為聰明好寶寶，

親愛的老師，您的恩情似海，我永遠都會記得您。

Good-bye, Good-bye, Good-bye!』

好感動嘅歌詞，有啲眼濕濕添～

然後到畢業典禮第二部份～ 由同學做司儀與及表演俾師長們欣賞～

英文唱遊：「Going to the zoo」

到口風琴隊出場喇～

Yuki記得面帶笑容噃～ 好嘢！

李老師前奏音樂嚮起～ （呢幾個月要多得李老師教導口風琴隊呀）

端坐表演中～

 

下面有視像轉播～ 記得睇哂呀～ 第二首歌會close up架～

謝謝大家～

完成於禮堂內嘅畢業典禮，返到班房繼續班內畢業活動～ 壁佈版上老師好有心機咁佈置左有小朋友照片嘅主題牆～

老師仲為每個同學造左畢業四方帽添喎～

手持剛剛派發嘅畢業證書！ 禮成！

多謝由N1至K3教過Yuki嘅所有老師～ 我哋睇住Yuki真係一年一年地進步，多得佢地嘅教導！ 謝謝～

雪雪週記：五月二十日

爸爸星期日帶

我去太空館，太空

館裏有很多關於太

空東西，有太空船，

太空人，木星，水

星，土星，海王星，

月球，地球。然後

去文化中心，看我

的火箭在外星人展

覽。