農曆年初三，我哋又出發去深圳旅行喇～
今次嘅兩日一夜之旅係同爺爺嫲嫲加埋伯伯佢哋一家人一齊去～
我哋第一次搭火車去落馬洲再轉深圳地鐵㗎～
好似地鐵電視廣告咁講呢～
「小明經落馬洲，去深圳，歡樂遊。。。 龍華全線開通哂。。。 」
由落馬洲過關，人唔係太多喎～ 由紅磡出發，個零鐘多啲就過埋關～
深圳地鐵都好乾淨，整潔喎～
我哋住嘅酒店喺羅寶線世界之窗站，所以先要喺會展中心站轉車～
轉車站要行嘅路程都唔算遠～
Yuki做乜返到大陸即刻扮祖國人用踎呢？
我哋今次入住嘅呢間威尼斯酒店，非常擬似澳門威尼斯人～ 一樣有果隻有翼獅子logo，同埋門口都有兩隻港多拉（Gondola）～
不過個名其實唔係完全一樣喎～ 澳門係威尼斯人，呢間係威尼斯～ 澳門果間英文係Venetian，呢間係Venice~
點都好！呢間都係五星級酒店嚟㗎～
等緊伯伯辦Check-in手續，同爺爺嫲嫲坐下影下相先喇～
放低行李，就出發去我哋今日主力景點－－歡樂谷～
上一次嚟深圳旅行已經係十年前嘅事～ 當時Yuki都未出世～ 果陣好似淨係去咗世界之窗同文族文化村～
今次再嚟，感覺變化唔算太大～ 係多咗啲新酒店，同埋多咗地鐵～ 不過幾個大景點都分別唔大～
新正頭，連入口個樓梯都有大大個福字～ 離遠望埋去又整得幾靚喎～
瘋摩全球嘅江南style吹到祖國，變成歡樂style!
Yuki亦做返個騎馬舞姿勢配合一下～
歡樂谷都幾大㗎～ 要行哂玩哂應該都要兩日～
嘩！有雙層旋轉木馬呀～
但係好多人排隊呀～
排左大半個鐘，終於到我哋喇～ 不過坐唔到上層呀！ 因為每一輪入去係無得俾人自己揀上層或者下層，職員俾人先坐滿上層，跟住就到坐下層～
不過有得玩旋轉木馬Yuki就開心㗎喇～
午飯隨便於一間餐廳搞掂～ 叉燒飯。。。都係香港嘅好食～
至於Yuki呢個肉醬意粉，基本上睇唔到肉醬喺邊～ 不過Yuki都食得津津有味喎～
食完晏又玩下第二啲嘢先～ 呢個迷你單軌車，每架可以坐四個人～
排隊係必然㗎喇～ 今次發現宜家大陸呢啲樂園每逄排隊嘅地方都會安排職員維持秩序，同時全程要講嘢，好似棟篤笑咁～ 唔係機械式咁不停重覆講同一句嘢喎～ 勁！
隨著Yuki漸漸長大，宜家好多嘢可以自己同家姐哥哥一齊玩喇～ 好似坐呢架車咁，三個自己坐一架～
Yuki最開心喇！ 可以撇開Daddy Mommy同家姐哥哥一齊玩～
呢啲咪叫做笑到合不攏嘴囉～
爺爺無一齊坐呀，所以喺下面不停幫啲孫仔、孫女影相～
之後伯伯、家姐、Daddy、Mommy玩咗呢個剌激又濕身嘅激流～ 本來Yuki都有份玩㗎～ 但係原來呢個遊戲要身高夠１３０cm先玩得㗎～ 所以袛好出返去陪爺爺佢哋睇我哋玩喇～
呢個遊戲真係唔講得笑，我哋都已經有買咗雨褸㗎喇，但係都成頭兼條褲同鞋都濕哂呀～
因為太狼狽喇，都顧唔到影相添～
講到剌激，下面呢個真係睇到都腳軟呀！ 好似就咁坐喺塊板上面，袛係張椅個椅背頂實個尾龍骨位㗎咋～ 我哋當然係唔敢玩喇～ 哈哈！
另一個本來想坐嘅小火車，就係下面呢架喇～ 但係居然要另外收費喎～ 仲要成３０蚊人民幣一個人呀～ 搶錢咩！？ 我哋九個人，淨係坐下呢架火車仔要成二三百蚊，太貴喇～
爺爺嫲嫲最鍾意孫仔孫女合照㗎喇～ 影多幾張遲啲曬俾佢哋喇～
正值春節，有新年花車巡遊添喎～
再玩埋另一樣比較平靜安全嘅～ 坐船仔～
呢隻船仔包保唔會濕身㗎～
出外遊行，小朋友最鍾意就係可以食好多零食～
呢個比Yuki個頭大幾倍嘅棉花糖！
Yuki要食幾耐先食得哂呢？
仲有聞到都好香嘅燒烤BBQ!
為咗証實Yuki唔夠１３０cm，臨走喺門口身高尺影低做証～ Yuki宜家１２３cm左右喇～
離開歡樂谷，我哋返酒店休息一陣，就出動搵嘢食～
行咗一個車站路程去到華僑城站，以前住過嘅海景酒店旁食街～
不過因為仲係初三，好多食店都未開，所以開咗果幾間都好多人～ 我哋終於搵到一間要分開兩張枱坐～ 呢間其實都唔知算係中國邊度嘅菜式，有松子黃魚，有啲似上海菜喎？ 但又有餃子喎。。。 最後食咗個超好味嘅鍋巴豆腐，好香豆味！ 超正！
今晚呢餐飯呢。。。Yuki又走過去同家姐佢哋一枱一齊食喇～
為哋有好好嘅表現俾大家睇，Yuki食得好乖喎～
食飽返酒店隔離個商場行下～ 地庫有間高級超市，仲high過香港啲City Super, ThreeSixty呀～
遠拍我哋酒店嘅外觀～
轉眼就到第二朝喇～
點解會影住間酒店醫務室呢？
因為Yuki瞓到快天光凌晨五點幾嘅時候發燒呀！ 即刻幫佢沖暖水涼散熱～ 因為無帶Yuki嘅藥，所以要諗住天光再去搵下邊度有藥賣喇～ 去酒店lobby問過，原來五星級酒店都會有個駐醫院醫務室，不過原來要晏啲先開～
所以我哋食完早餐就去酒店醫療室俾個醫生檢查一下～ 不過佢話佢哋無小朋友哋藥，但係都幫Yuki探下熱先～ 呢度無紅外線耳探機㗎，係要用以前水銀式果種，放革勒底探熱～ 宜家無燒喇～ 醫生話飲多啲水喇～
臨離開酒店影張全團合照先～
呢三姐弟妹，宜家各有各嘅風格喇～ Boy哥哥宜家變成最高果個喇～ 家姐愈黎愈有少女氣色～ Yuki身高開始要追近家姐喇～
比較一下四年半前中秋節（當時Yuki剛滿兩歲），大家都仲一臉稚氣～
行程最後一個項目，坐歡樂幹線單軌火車～
呢架火車全程半個鐘，穿梭於歡樂谷、世界之窗、文族文化村、華僑城一帶～
不過又係超多人排隊呀～ 排下排下，Yuki開始吽吽哋～
然後要挨住Mommy等～
Daddy叫Yuki影相，又可以強擠出笑容喎～
坐上車之後Yuki同Mommy都瞓著咗大半程車～
見Yuki唔多舒服，我哋匆匆食埋個午餐就啟程回港喇～
