大除夕於年廿九

今年農曆新年早一日來到呀～

因為今年無年三十，年廿九之後就到正月年初一喇～

咁啱呢個大除夕喺星期六，可以有充足嘅時間行下年宵花市呀～

 

由屋企行入維園，唔使十分鐘就到入口喇～

Yuki與Mommy嘅Look of the day~ 嘻嘻～

入口處背後嘅建築物，就係新嘅游泳池喇～ 今年會開㗎喇～

門口每年都有佈置咗新年氣氛嘅裝飾～

六歲半的Yuki，抱起嚟都愈來愈重手喇～ 不過Daddy一啲都唔介意喎～

我哋嚟到已經五點鐘～ 但係都好多人喇～ 由邊條開始行好呢？

 

最先見到呢檔冰糖葫蘆～

除咗山楂，仲有士多啤梨喎～

呢檔賣＄２５蚊一支～ 後來我哋見到入面有啲檔賣十幾蚊咋～

Yuki有得食最鍾意嘅士多啤梨，幾滿足！

來年係蛇年，所以好多同蛇有關嘅嘢賣～

大家喺屋企睇新聞見到嘅年宵花市報導，就係靠呢啲電視台記者同工作人員喇～

呢邊NOW新聞台拍緊～

果邊TVB記者亦都準備緊喇喎～

行年宵，除咗買嘢，當然仲可以有好多嘢食喇～

不過我哋今日唔打算食熱食～

估下呢塊係乜嘢？

係迷你砵仔糕呀～ 十蚊三塊～

味道一般～ 唔係好夠豆味～

 

咁再試下呢一款懷舊小食－糖葱餅～

今次係Yuki第一次食糖葱餅咋～

睇佢揸住唔放手就知佢鍾唔鍾意食喇～ 哈哈！

除咗有蛇年相關產品～ 仲有好多其他嘢㗎～ 例如有One Piece公仔喇～

又有$20嘅iPhone?! 唔係～ 係假iPhone50? 吹氣玩具啫～

 

行下行下～ 開始天黑喇～

我哋轉移過去濕貨攤檔又睇下先～

啲蘭花好似幾靚咁喎～

睇下～ 呢啲一百蚊三盆咋～

 

我哋唔係好識分㗎咋～ 不過睇落呢啲一百蚊三盆嘅質素好似都唔錯吖～

 

咦！ 時候原來唔早喇～ 要趕去食團年飯喇～

Yuki嘅維園年宵直擊報導完畢～