五一西北遊

五一假期我哋跟住家姐佢哋一齊參加佢哋教會嘅五一大旅行～

本來天氣預報都係話會落雨，到五一呢日朝早出發竟然有陽光呀～　真係天公造美！

今日總共有四個景點～　全部都係香港嘅西北部~

第一個景點係最遠嘅沙頭角！

不過我哋並唔係去邊境嘅中英街～　因為果度都仲係禁區～

我哋今日係去最近開放唔再屬於禁區嘅沙頭角六村～

我哋落車嘅位置係担水坑村～　呢度有個溫氏宗祠～　話說沙頭角呢度好多姓溫㗎～

不過宜家開放咗嘅六村，已經唔再係偏遠寧靜嘅村落喇～　一到假期，一車接一車嘅旅遊巴源源不絕咁送我哋呢啲遊客入嚟～　真係人頭湧湧呀～

沿落行入村，有好多村民開檔擺賣各種特色食品～　好似呢檔就有Yuki同Mommy都好鍾意食嘅砵仔糕～

呢檔仲係由一個Daddy同一個大約七八歲左右嘅姐姐兩父女開檔㗎～　個姐姐好純熟咁幫手賣砵仔糕，用支簽由個碗整個缽仔糕出嚟，仲可以幫我哋分一半添～

呢度嘅砵仔糕都幾特別㗎～　有蕃薯紅豆味㗎～

行前啲見到另一檔仲勁！　即場用柴火蒸嘅茶果～

呢啲就係茶果喇～　五蚊一個～

睇下另外呢檔又賣咩先？　有冰菠蘿、紫薯餅、茶葉蛋～

仲有好多檔都有賣嘅洛神花～

呢邊就有炒米餅、蕃薯乾～

行到差不多最入有間學校㗎～

就喺呢個時候Yuki居然扭計喎～　係都要喺呢度果檔食豆腐花～　但係Daddy Mommy之前都已經講咗出返去上車果度先食～

經Daddy Mommy一輪教訓，同爺爺嫲嫲影張合照喇～　影果陣個樣都仲有少少嬲㗎～

嗱！出返嚟落口呢度呢間喇～　幾多位任坐喇～

有豆腐花食嘅Yuki笑容即刻返哂嚟喇～

準備等我哋嘅旅遊巴返嚟接我哋～　俾大家睇下呢個六村旅遊團上落車指定地點～　

一到假期就警察叔叔嚟維持秩序～　辛苦哂！

上車後去第二站食午飯地點－流浮山～　

好靚好大個嘅天后寶誕牌坊～　因為五月二號就係天后誕喇～

嚟到流浮山人潮依然！　因為大部份嚟到沙頭角呢邊旅行嘅團，都會喺呢幾度食午飯～

食完晏仲有啲時間，入去巷內行下街喇～

嘩！原來海星都可以曬乾嚟食㗎～　仲有藥用價值～

Daddy俾Yuki買咗件小玩具，上車即刻同哥哥姐姐玩呀！

第三站係參觀恒香餅家～　

要自備口罩先入得嚟㗎～　

一入門口就見到個工場～　有啲工友喺度整緊餅～

一車又一車嘅蛋卷罐～

嚴格嚟講呢個所謂參觀袛係喺工場快速行一細圈～　五分鐘都無～

臨離開每人派一個迷你老婆餅～

最開心就係有新鮮出爐老婆餅食～

最後一站返出荃灣參觀鴻福堂廠～

唔嚟都唔知原來鴻福堂歷史唔算好耐～　１９８６年先創立～　三十年都唔夠～　都算犀利！

最後拎住每人派一支嘅鴻福堂飲品同呢隻Hello Kitty cross-over合照！

多謝伯伯帶我哋嚟呢日咁豐富嘅旅行呀～