發掘單車徑

見Yuki開始踩得唔錯，趁呢個週末Mommy外遊，Daddy就同Yuki自己去發掘下新地點喇～

要搵一個附近可以泊車，然後又有得租單車等Daddy都有得踩吖嘛～

將軍澳寶盈花園得喎！好似有得泊車又有單車租！

車租二十蚊一個鐘，俾一百蚊按金～

戴好頭盔、護踭、護膝呢啲安全措施先～

搞掂！　出發！


將軍澳呢條單車徑唔使踩好遠就有海景睇㗎喇！

比起科學園同大尾篤，呢邊少車啲～ 對於Yuki嚟講，可以踩得輕鬆啲～

今日天氣真係好正！  我哋仲見到一大班練習緊跑馬拉松嘅視障運動員同佢哋嘅陪跑員添～

經過一輪練習，Yuki都開始越踩越定喇！ 可以踩到成十分鐘都唔使落地呀！ Yeah!

踩咗個零鐘～ 差不多喇～ 下次等埋Mommy再踩過～ 還車先知原來有半個鐘計添！ 個半鐘～ 三十蚊搞掂！ 抵！

下面就係我哋今日踩嘅路程喇！