馬年新春大佛遊

踏入馬年第一篇blog～　先恭祝大家馬年「龍馬精神！馬到功成！」

今日年初三，Mommy約咗一班朋友一齊上寶蓮寺食齋同行下大運～　

我哋一早九點未到就去到東涌喇～

喺地鐵站口等齊人就上預先已經安排好嘅旅遊巴士向昂平出發！

車程唔使一個鐘～　沿途我哋仲有得玩遊戲，猜謎同ＩＱ題～　Yuki又有份出題又有份估㗎～

玩下估下，好快就嚟到昂平囉～

今日天氣好好呀～　非常和暖～　除淨一件衫都夠喇～

下面呢個甫士裏面Yuki揹個袋係反地心吸力㗎～　因為Yuki小朋友用溜冰式嘅轉身fing個袋囉～

昂平市集有啲不同國家嘅纜車模型展出～

呢架西班牙嘅纜車十足個咸蛋超人呀！

本來見啲花好靚，諗住叫Yuki埋去影返幅相啦～　點知Yuki埋位即刻「楝」起咗隻腳！　無嚟斯文啦～

行去大雄寶殿嘅時候，中途有嘢俾Yuki shopping喎～　啲風車十蚊個，好扺買！

今日個天非常清～　影出嚟個天好藍呀！

行到埋大雄寶殿對出發現煙霧離漫喎～　

始終都係新正頭，好多人嚟拜神～　所以香火鼎盛呀！

我哋見唔少係好粗嘅大香！　

行過啲舖頭，原來仲有呢啲仲高過Yuki嘅香呀！　

位於大雄寶殿正後方，就有呢座新起嘅萬佛寶殿～　無論遠觀或者近望都非常咁宏偉呀～

午餐就喺大雄寶殿呢個多功能廳用餐～　成十幾圍枱嘅人呀～

呢餐齋菜質數甚高喎～　啲芧頭魚，春卷都係新鮮炸好～　好好味！

食飽飽就開始上山參拜大佛喇～

一口氣唔使停就上到頂～　獎勵就係雪糕甜筒一支！

「Yuki! 影完相請我食啖甜筒吖？」

行返落嚟當然比行上去更加輕鬆～　Yuki好合作咁影埋另外呢個「寶蓮襌寺」牌坊～

又搵咗間茶座，追尋一下香滑嘅山水荳腐花先！　　

話我哋為食都好！　但係我哋真係好鍾意食吖嘛～

呢間嘅荳腐花算ＯＫ喇～　唔算超級滑，但係都算唔錯嘅～

起碼我哋Yuki小朋友都食到lam lam脷～　嘻嘻！

以為咁就食夠？！　梗係未喇～　　

跟住我哋再去Starbucks歎咖啡呀～　　下面呢幅Starbucks歡Frappuccino真係想唔post都唔得～　睇住Yuki享受食物個樣真係好幸福㗎！

跟住到今日行程最後一個景點：心經簡林～

由大佛底下行去心經簡林都要１５分鐘～　都唔算太近㗎～

沿途Yuki一路留意著地下兩邊嘅植物～　

原來Yuki想搵怕羞草呀～　所以一見到啲似似哋嘅就伸手去摸下～　可惜我哋一棵怕羞草都無見到呀～

終於行到嚟喇～　今次係我哋，包括Daddy Mommy都係第一次行到嚟心經簡林咋～　

成個山頭滿佈呢啲幾層樓高嘅木～　非常宏偉！

加埋刻住嘅「般若心經」經文，令到呢片地方多一份佛門嘅清靜～

睇經文之外，亦欣賞下對面山頭嘅影色先！　見到有人沿住山頭小路向山頂進發～

行完心經簡林，我哋就行返出去集合點上車喇～

今日嘅呢個新春大佛遊亦告完滿結束～