尋日復活節假期，我哋去咗火炭一個工廠大廈裏面嘅呢間叫Steak Workshop～
上面有個超大、設備超齊全嘅煮食場地～
主菜由場地提供，同時歡迎大家自携材料自己一展身手！
Yuki同Mommy就負責整最耍家嘅日式芝士蛋糕～
Yuki小廚師喺屋企都有幫開Mommy~ 嚟到咁靚廚房梗係要露兩手喇～
兩母女夾手夾腳～ 今日有好多觀眾睇住佢哋整㗎～
由於朋友人數眾多，所以要預備兩個蛋糕呀～ 倒好材料，準備入爐！
蛋糕喺焗爐焗緊，Yuki同Mommy兩人坐一凳～ Yuki宜家幾大個，坐喺Mommy大髀同Mommy一樣高喇～
話咁快，蛋糕出爐喇～ 賣相好好喎！
呢兩個日式芝士蛋糕，大獲好評！ 好嘢！
同場加映：Ｙuki學整cup cake~ 所謂學，主要係學下點樣唧cup cake上面啲花～
唧完當然仲要修飾一下喇～ Yuki好細心咁逐粒裝飾慢慢放上個cup cake度～
裝飾完成喇～
呢個場地真係好好呀～ 有得食，有得玩！ 希望好快又可以再嚟喇～
住咗喺炮台山咁耐，睇住油街呢座古老建築物荒廢棄置多年，仲諗住會唔會隨著物料供應處塊地賣咗一齊被重建呢？
呢座建築物就係１９０８年建成嘅前身香港皇家遊艇會會所～ 不過其實呢個會所用咗三十幾年，遊艇會喺１９４６年就搬咗去銅鑼灣奇力島喇～ 之後油街呢度就斷斷續續荒廢到２０１０年～
估唔到佢可以逃過俾拆嘅厄運！ 仲可以被活化成為一個展現藝術嘅空間添！
變身後叫咗做「油街實現」，今日終於入嚟行返轉！
入到嚟呢個有過百年歷史嘅建築物，感覺好特別～
香港比起其他國家，保護呢啲古老建築物其實做得好少～ 真係拆一座就無一座～
睇下呢啲木樑、格仔階磚地，木造玻璃門～ 真係好似置身於另一個空間呀～
Yuki都開心到跳起呀！
今日Yuki好好心情影相！ 係咁捉住我哋要幫佢影相～
希望呢座建築物可以繼續保留多下個一百年，等Yuki第日大個可以再嚟影多啲相！
香港嘅大排檔已經買少見少～
今日趁假期開始，我哋去咗大坑搵下呢間網上評分唔錯嘅「炳記茶檔」～
一到假日就好多人揸車嚟大坑，所以唔容易搵位～ 我哋都係兜咗幾個圈先搵到一個位泊車～
離遠已經見到一條排隊嘅人龍～ 就係呢檔嘞！
「請在此排隊」
我哋大概排喺第七八左右喇～
排得悶悶哋～ Yuki喺行人路來回跑步！
未食早餐都咁有氣有力跑嘅？
等咗兩三個字就到我哋喇～ 話明大排檔，當然係週街坐喇～ 我哋張枱就係馬路上面，Yuki後面果啲就係後巷嘞～
嘢食到！ 炳記必食推介：豬扒麵／奶油蜜多士
豬扒醃得好入味～ 另外食落唔係果種肉質鬆散哂，而係仲有啲咬口嘅豬扒！
至於個奶油蜜多士，好似唔係普通方包～ 因為我哋食到有啲提子乾粒喎！
簡單嚟講：好味！
最近Yuki喜愛上呢樣新玩意～ 叫做Rainbow Loom~
成盒嘢充滿色彩繽紛嘅橡筋～
不過個盒冚得唔係太實，有啲顏色嘅橡筋撈亂咗～
簡單嚟講，係一個編織嘅玩意～
盒嘢裏面有跟埋兩個座方便用嚟鈎啲橡筋～ 然後用呢隻鈎針，逐條逐條咁鈎啲橡筋編織出一條條嘅橡筋縄～
Yuki好有興趣咁係咁織，係咁織～
好快就識咗一條彩虹色嘅，另一條黃綠色嘅～
有無人想要呢？
今日同Yuki去變髮～ 原來Yuki上次剪髮已經半年前喇～
今次自己主動話要剪短啲喎～ 就等Eric哥哥幫幫你喇～
話都無咁快～ 變髮完畢！ 睇Yuki個樣都知佢好滿意喇～
加多幅食嘢時補影嘅～ 叉住條腰擺pose添！
剪完髮～ 見剪頭髮隔離就係「鼎泰豐」，開咗咁耐都未去食過，諗住過去試吓喇～
嘩！人山人海！超多人呀！ 原來咁好生意喎～ 我哋仲見有好多外籍人士都識得嚟幫襯添～
Yuki好似好想食埋門口呢隻公仔拎住果籠小籠包咁喎～
鼎泰豐由台灣元祖店開始嘅一個特式就係好開放啲俾大家睇到佢哋嘅師傅喺度整小籠包嘅過程～
要咁多個師傅一齊做先做得切俾咁多人食㗎！
雖然好多人等位，但係都輪到算快，幾個字就到我哋喇～
今日我哋試咗必食嘅小籠包喇、另外有假期限定嘅小籠湯包，再加多個豬扒蛋炒飯～ 全部都好味呀！ 第日一定會再幫襯！
