繼續美食月

Mommy飛咗去韓國玩～　

Yuki同Daddy唯有兩個自己出下街搵嘢食喇～

今日再嚟銅鑼灣試另一間Mommy食過，但係Yuki同Daddy未食過嘅新嘢～

過咗食晏高峰期，兩點幾嚟到袛係等一兩個字啫～

呢間餐廳英文縮寫係ＴＷ～　　

即係荃灣？唔係！

咁台灣嘞？都唔係！　不過似嘞～

正確答案係茶木－Tea Wood　

個餐牌好多嘢都好想食～　不過我哋得果一大一小～　食唔到咁多嘢喎！

但係鎮店之寶點都唔可以錯過㗎～

等嘢食嘅時候，幫Yuki影張相先～

Mommy去親旅行，Daddy就有機會同Yuki撐下枱腳～　

有嘢食喇！　茶木名物－士多啤梨蜜糖黃金磚塊～

真係幾好味喎～　啲麵包仲外脆內軟～　搭埋啲士多啤梨、蜜糖同雪糕，好夾好味～

另一個Yuki揀嘅豬扒肉燥飯～　不過豬扒無哂～　唯有轉雞扒喇～

Yuki問啲咩菜嚟㗎～　咪係酸菜囉～　

跟住好純熟地撈勻啲肉燥同飯～　可能佢喺學校食飯都習慣咗係咁樣～

有幾鍾意食呢？　食每一啖都大大啖！一粒飯都唔嘥㗎～

最後。。。完食！　

一大一小食到飽飽抱住個肚埋單呀～