酷熱天氣警告下的迎月日～

Daddy Mommy為左獎勵Yuki呢個星期得返自己返學都算乖乖，所以決定帶Yuki再去海洋公園玩下喇～

估唔到聽日都已經係中秋喇，今日都仲係酷熱天氣警告，夜晚都仲有３１度～

可能今日係星期六，兼且過左暑假，所以今日唔係好多人，多數野都唔使點等，最可惜既係諗住今日少想坐下大氣球，但係因為排左一陣隊個哥哥話大風既關係，所以要暫停～ 唯有下次再排過喇～

無得坐都影番幾幅相先～

另外熊貓館，雖然Yuki一歲生日果次去過，不過果陣實在太細喇，所以今次見少人就帶Yuki去探下安安，佳佳，盈盈，樂樂先！

可以坐埋一齊既就係盈盈同樂樂喇～ 安安同佳佳係分開兩格架～

最近Yuki開始見到Ｄ自己鍾意既公仔就會主動叫Daddy Mommy影相，好似今日行去兒童王國門口果幾隻公仔就即刻叫影相～

你地睇Yuki同河馬先生好似好老友咁喎，仲搭哂膊頭叫佢一齊去睇野添！

Yuki係度最鍾意坐既～ 除左木馬就應該係纜車喇～

宜家坐既時候鍾意左睇右睇～

 

今日志在玩下D平時多人玩既野，所以我地連大摩天輪都玩埋添呀！