天陰有雨好去處～

本來今日諗住學完溜冰就去東涌摸蜆架～ 不過中午天氣已經漸漸變暗～ Mommy上網到天文台睇睇個雨量分佈圖，已經見到大嶼山落緊雨～

唔緊要! Mommy佢地已經有應急方案～ 室內又有得玩既地方～ 嘻嘻～ 之唔係西寶城Playtown囉～

sir滑梯sir到黏埋一齊～ 呢兩姐妹玩得幾高興～

去Playtown玩～ 唔單止小朋友攰～ 大人都好攰架～

點解呢? 因為D小朋友捉住D Daddy Mommy一齊爬上去左捐右捐～ 一陣間已經出哂汗喇～

另一個大人同小朋友都玩得咁投入既玩意～ 海綿波大炮呀～

Yuki好乖咁見Daddy射哂D波就落去執波俾Daddy添～

今次見到另一個新玩意～ 地上觸感遊戲～ 跟住D燈光鬥快踩落去～

 

玩完大家一齊食個飯就各自返屋企喇～ 聽日要返學嘛～

冰之驕女－第九課

經過一個星期既暫停一堂，今日又可以上堂喇～

趁仲有幾分鐘先上堂，自己行出少少練習一下先喇～

我無扶住架～

今堂難得俾Daddy影到Yuki上堂唔係得個無表情個樣喇～ 唔知同Hei Tung老師講咩咁開心呢?

今日跌低既時候浩浩都有過黎扶Yuki呀～ 不過變成兩個都要老師扶住起身～ 不過都好多謝浩浩好gentleman～

本週精選：Yuki跌低連環鏡頭～ 大家放心，小朋友跌下唔多痛既～ 睇下Yuki爬返起身都笑笑口架～

下堂開始又少多一個同學仔喇～ 得返我同浩浩兩個人上堂咋～

星光 or 巨聲?

Yuki小妹妹係屋企忽然唱歌癮大起～ 即刻黎一場mini-concert先～

同大家分享下精華片段，先有叮噹主題曲（不過唱第一句時發覺唱錯歌～嘻嘻～），跟住加送姐姐早前教過Yuki一次之後就識唱既印尼話歌～

契爺welcome back～

契爺自從我出世之後大家都未有機會見過面架~

今次契爺再返香港，一早約定契爺落機第二日就見喇～

我地仲順便去埋Rachel妹妹新屋玩下添～

契爺～ 多謝你既禮物呀～

 

因為Daddy係食野既地方唔記得影相～ 所以今日無同Rita姨姨既合照呀～ 下次有機會要補返先～

覓食之旅@勝香園

本來尋日已經想去呢個覓食之旅，不過出發之際收到電話有單車之旅喎～ 所以今日再出發～

渣車去既朋友真係要睇彩數喇～ 因為係歌賦街右手邊可以停得車，但係因為有兩間名店既關係，所以大部份時間都已經泊滿哂車～

其中一間名店係「九記牛腩」，另一間就係我地今次既目標食肆「勝香園」～

去到一點鐘左右，唔算太多人，五六個人排隊喇～

呢度其實係一間大排檔，後面有簷蓬果度就係喇～

我地見仲有Ｄ應該係台灣既遊客都特登搵到黎呢度食野添呀～

呢度比較出名既係番茄牛肉通粉～

另外就係呢Ｄ奶油脆脆同檸蜜脆脆～

仲有Mommy叫左杯咸檸七都好好味～ 佢地既咸檸七係幫你篤好哂Ｄ檸檬架～

下次搵日再造訪下對面既九記牛腩先～

單車之旅＠大尾督

今日正要出發往上環搵好野食既時候～ Mommy收到電話～原來細Ｂ哥哥同希表哥佢地去左踩單車呀～

我地即刻取道紅隧直駒大尾督先食野喇～

去到已經有好多車係停車場等緊位喇～ 好彩我地等果幾個位幾分鐘後就有一架車走～ 可以去食野啦～

快快趣趣食完野即刻租左一架大單車Daddy踩～ 我就踩我架私家單車～ 咁Mommy呢? Mommy因為要傍住我踩所以無租車囉～

上到堤霸上面大家都坐低抖抖先～

想知道咩係Like father like daughter嘛? 睇下呢幅相既兩父女望住同一方向，同一姿勢咁飲野就知道喇～

係堤霸上面仲有其他娛樂節目架～ 千奇百趣～ 你地估下呢兩父女係度做緊乜呢?

睇Daddy既姿勢，左手拎住卷類似魚絲既物體，好似有魚上釣咁～ Yuki又好專注咁望住下面～ 一定係釣魚喇～

Sorry～ 錯左喇～

我地其實係度放紙鳶呀～ 之不過點解唔係向天放既咩? 其實係因為隻紙鳶無風跌返落黎，所以Daddy要好似釣魚咁收返隻紙鳶囉～ 嘻嘻～

最後走既時候因為Mommy要幫舅母還車～ 所以Mommy都踩一架單車～

原來都得喎～ 下次我地可以一人一架車去踩單車喇～

Pick-up Parents Day

之前係Daddy Mommy黎接我放學，今日有機會俾我接Daddy放工喇～

Daddy公司今日搞左個Pick-up Parents Day，爺爺帶我四點半準時去到～

我地先上一層有好多會議室既地方，爺爺幫我影幅相先～

跟住我地仲有得畫圖畫，派貼紙，仲有糖同出奇蛋添～

今日除左我仲有好多哥哥，姐姐，妹妹，弟弟～ 大家都係黎接Daddy或者Mommy架～

呢層仲有一間房有好多小朋友既玩具架～

 

跟住有姐姐帶我地週圍行，去搵下自己既daddy mommy～ 見到喇～ Daddy係呢度呀！

搵到Daddy之後就係pantry開大餐喇～ 有好多開心樂園餐呀～ 我食左杯粟米同一個芝士漢堡包～

Daddy，我幫你打keyboard做下野喇～ 咁我地可以快Ｄ放工喇～

執野走喇～ Daddy～

迪士尼全年證

今年我地選擇左迪士尼既全年證～ 上年用海洋公園全年證，差不多每個月去一次～ 都係時候搞搞新意思～

Yuki有幾開心? 大家自己睇下喇～

今日約埋希表哥一齊入去～ 希表哥做乜你整我牛角呀?

今日仲遇到D朋友仔添～ 不過淨係記得同豆豆影相，唔記得同IE影添～

排排坐睇巡遊～ 咦?唔見左Daddy既?  有喇～ 原來係對面果度呀～

Mickey同Minnie kiss kiss呀～

 

巡遊加小小世界雜影～

呢個咖啡杯原來可以轉得好快架～ Daddy本來想渣實得佢轉得無咁快～ 不過俾我叫佢放手～ 嘻嘻～

拜拜喇～ 今年我會多Ｄ黎架喇～

冰之驕女－第八課

期待左一個星期既溜冰堂又到喇～

先溫習返八字腳劃魚蛋～

跟住大家記唔記得呢個姿勢係做乜架？

係喇～ 就係扭Pat Pat喇～

Hei Tung老師扶住我做咩呢？就係做交叉腳練習囉～ 因為今堂開始練習另一個方向喇，即係左腳疊右腳，因為未習慣所以好易跌呀～

另外今堂都有練習上一堂教既新野，就係伸右腳剎停～ 不過Daddy淨係影左movie，無影相，大家一陣睇movie喇～

最後教左一招新野呀～ 就係輪流單腳滑，我地袛係做到輪流提起隻腳，要好好練習下先～

落堂行返入去果陣個姿勢又好似幾好咁喎～