小學生

呢個blog由Yuki出世前兩日開始，六年來同大家見證著Yuki無數個第一次～

由一個階段到另一階段～

好似無幾耐之前先話入讀幼稚園… 眨眼四年過去…

今朝一早六點起身～ Yuki邁向生命新一章！

小學生確係大個女～ 今朝起身好合作～ 好快就梳洗完畢，換好校服～

上個禮拜條腰帶鬆得滯，經過Mommy修改之後，今日幾fit!

食過早餐～ 早十分鐘落樓行去校車站喇～

七點未到嘅早上，街上全部都係準備迎接新學年嘅學生們～

Yuki上校車嘅地點相信有成五六間學校嘅校車都喺呢度上車～

 

見到啲高班姐姐排好隊等車，Yuki都跟住排隊～ 但係原來係由低年級排到高年級㗎，哈哈！

校車到喇！Yuki～俾心機上堂喇～ Enjoy your primary school life!

頭呢個半星期返半日～ 第一日未有教書～

派咗智能學生証～ 呢張証用嚟記錄返學放學時間，同埋將來交錢都係用佢～ 即係好似八達通咁用～

原來仲預咗六個空格印班級，可以用足六年～

明早繼續努力早起喇～