重要的一課

今日對Yuki嚟講，算係自出生以來最重要嘅一課～

我哋希望Yuki知道有好多哥哥姐姐為咗佢哋嘅未來，日復日、夜復夜地去爭取、去發聲！

今日我哋享有嘅思想自由、言論自由，並唔係必然！

我哋更唔希望要到大家失去咗之後，先覺得要珍惜～

 

已經第十日於香港政府總部嘅集會，每日令大家見到更多香港人團結自律可貴嘅一面！ 尋晚有參與者暈倒，救護車要進入十二萬人群中救人，大家自動自覺開條路出嚟，傷者迅速被送走～ 另外，不單止集會後無亂掉垃圾，大家更自發地為垃圾分類添～

今日係星期六，仲有氣球派發，集會團體為咗令更多家庭帶埋小朋友一齊出席呢次咁有意義嘅公民教育～

集會尋晚凌晨兩點幾先結束，今早十點又繼續開始～

大家團結嘅力量，經過尋晚嘅留守，今日又準時返嚟互相支持～

從天橋上望到遠處嘅帳蓬係每晚留守同絕食嘅朋友～ 多謝你哋！

支持你哋！

電視台直播著整個集會俾全港嘅市民～

宜家技術先進到袛要用咁少嘅器材就可以即時將畫面即時網上直播～

 

民間自發嘅運動，有唔同形式嘅反對聲音，縱使字體不同，但係最重要係大家目標一致～ 呢個就係現在香港尚且可貴之處！

 

 

由天橋落返地面，與集會作更近距離接觸～

台上一位又一位參與者同大家分享佢哋嘅感受同睇法～ 司儀們經過十日連續不斷為大家主持集會，每一個把聲都變得沙啞～ 集會地點係政府總部外嘅空地，宜家變成大家嘅「公民廣場」～

   

 

Yuki! 請你好好記住呢一日～ 呢啲就係自由嘅可貴～ 雖然今年六歲嘅你仲未係好明白發生緊乜嘢事，但係希望你大個後會繼續為呢種得來不易嘅自由努力爭取呀～

小朋友係我哋嘅將來、我哋嘅希望～

睇住Yuki開心嘅笑面令我哋更肯定地要為下一代去努力去堅持～ 等佢哋繼續可以嚮呢個自由嘅環境中成長！