愚人節新奇BBQ

假期前Mommy經約咗姨姨們四月一號一齊出嚟玩～　但係臨到復活假期前，天氣預報都係話成個復活節假期都會落雨～

好彩，今朝起身又無落雨喎～　個天仲幾光猛下添～

一齊出發，向今日我哋嘅目的地進發！

叫得做新奇BBQ，梗係有返咁上下特別喇～

考下大家知唔知道渡頭灣村喺邊吖？

背山面海～　行落十步就有個沙灘～

望到沙灘嘅同時，背景亦都望到香港發展嘅見証～　一堆堆高樓大廈，同呢個小村形成強烈對比～

沙灘上又兩間士多～　提備燒烤爐及器具租用～　自己買嘢食同飲品嚟就得喇～

 

剛剛去到，仲好整齊咁，著住鞋～

趁呢個時候做吓Daddy嘅model先喇～

士多嘅老細喜叔好好人呀～　見到幾個小朋友嚟到，又見到啲水開始退嘞，就拎咗箱玩沙玩具出嚟～

Yuki同豆豆打算合作砌個堡壘出嚟喎～

快啲反轉倒出嚟睇下先！

哎呀！冧咗喇～　啲沙乾得滯，唔得㗎～

喜叔非常好客～　每一枱幫襯燒烤爐嘅仲即席炮製新鮮青口送俾我哋～

啲青口係喜叔自己養㗎～　雖然細細隻，但係都好鮮甜，好好味！

Yuki玩緊沙都返嚟食呀！

見Mommy燒麵包，Yuki又要燒埋一份～　居然識得自己拮喎，仲拮得唔差添～

再玩多兩玩～　鞋又除咗～　褲腳摺起咗～　衫袖又摺起埋～

今日嘅陣容：Ivan, Evan, 豆豆 同 Yuki

啲樓後面嘅係咪就係馬鞍山呢？

豆豆同Yuki似乎對於砌個堡壘好大決心喎～　仲繼續堆緊！

對住個海，小朋友除咗鍾意玩沙之外～　就係掉嘢落海喇～

Yuki執咗啲唔知係石頭定貝殼，連環圖抛嘢落海！

多得喜叔呢堆玩具，Yuki佢哋消磨咗足足四五個鐘呀！

離開渡頭灣村，臨離開馬鞍山之前，再去睇埋附近另一個名景點「海之心」

由馬鞍山公園行過去，幾分鐘就到～

雖然係人造嘅，但係果位伯伯每日咁樣堆出嚟，真係好難得！