日本新潟苗場七天滑雪之旅(12月30日) 完

尋晚漏夜執哂嘢，今朝一早九點就要集合～

喺酒店房臨走都要望多幾眼呢個雪場景呀！　Panorama全景模式由山上面睇到落嚟酒店停車場～

搬哂行李上車喇～　Yuki同苗場王子酒店講拜拜lu~

呢程車由酒店返成田機場～　Yuki選擇同James一齊坐！　Hee Hee~

好似上次嚟到果程咁～　去機場中途我哋會停喺一個SA (service area)食一餐～　大約中午十二點我哋嚟到呢個三芳ＳＡ嘞～

呢度比起嚟果晚果度大好多～　有好多間餐廳，仲有好多手信店舖～

啲嘢食仲唔錯添～　呢個冷蕎麥麵加迷你天婦羅丼都係八百幾円咋～

跟住仲有「主菜」軟雪糕同crepes～　

一路食一路行下有乜手信賣～　其實有啲似日式百貨超市，都有新鮮蔬菜賣㗎～

俾Yuki發現到啲超巨型白蘿蔔～　驚嚇度：４分！

睇下～　同Yuki個頭一樣咁闊呀！　但係好平喎～　咁大一舊先百幾円咋！

我哋買咗啲士多啤梨同Yuki旅行必買嘅post card就上返車繼續行程喇～

由呢度再去機場大約一個多小時～　Yuki抓緊時間，快啲寫要寄出嘅post card先～

好快趣，Yuki已經寫完五張post card喇～

剛剛好旅遊巴士差不多嚟到機場～　一到機場即刻搵個郵筒寄咗啲post card先喇～　　

然後Check-in埋啲行李～　可以過埋關作最後shopping衝剌～

我哋無乜其他嘢買～　行下行下～　出咗瞭望台～

日落magic hour下嘅成田機場跑道，標誌住呢個七天滑雪之旅正式完結～

再一次多謝呢次行程一齊玩嘅雪友！　尤其是要多謝Joyce姨姨介紹我哋呢個咁正嘅滑雪團，同多謝Michael叔叔頭兩日對Yuki同Mommy多多照顧，令Yuki進步神速，令Mommy由第一日跌一千次，到第二日跌十零廿次！

好期待著下一次同大家嘅滑雪之旅呀！

日本新潟苗場七天滑雪之旅(12月29日)

聽日就返香港喇～　亦即係今日係今次滑雪之旅嘅最後一日滑雪～　時間過得真係快嘞！

因為苗場果邊喺假期太多人喇～　啲lifts大部份都要排隊，所以我哋都係決定再搭Dragondola過去田代果邊玩嘞～

今日好好彩呀～　最後一日又係藍天白雲好天氣！　太陽猛到坐吊車都要戴住goggles驚曬親呀～　哈哈！

嚟到田代，我哋先一齊滑咗一輪綠色地帶～

趁人齊～　一齊影返啲合照先！　呢度就係我哋一行十人嘅滑雪團喇～

然後我哋又兵分兩路嘞！　Michael叔叔Joyce姨姨佢哋去田代右邊紅色地帶果邊～　我哋同Dora姨姨同Ethan就喺返綠色地帶呢邊～

由於我哋都喺呢邊滑咗第三日喇，所以我哋對呢堆綠色地帶都handle到～　睇下～　其實唔係好斜啫～

因為見兩個小朋友都滑得幾好！ 所以Dora姨姨就建議Ethan同Yuki可以跟佢試下滑一次紅色～　因為有一條紅色地帶係好寬嘅斜坡～  相對較安全！

就係下面呢條嘞！　由最頂果度出嚟果三份一就係黑色地帶～ 紅色就係喺右邊中間三份二左右切出嚟果度喇～

Dora姨姨先落，跟住到Ethan，最後到Yuki～   一開頭落果個位置睇落真係都幾斜呀～

見到佢哋紮起馬步，慢慢S型咁滑落去，個人愈變愈細，話咁快就滑到落去喇～

睇吓Yuki滑起嚟開始有姿勢又有實際㗎～

睇片更加傳神～ 全程穩穩陣陣，足足滑咗兩次呢條紅色地帶呀～

 

Yuki同Ethan好嘢！ 征服到紅色地帶喇！ 一齊舉poles慶祝～

Daddy Mommy滑唔到紅色都掹車邊一齊合照先～ YEAH!

 之後我哋再喺綠色地帶又滑多一輪～   今日天氣真係好正呀！ 

配埋個湖景簡直係post card一樣～

將近中午～ 我哋都要搵下食喇～ 返返去呢間餐廳食晏先～

上次試咗吉列豬扒同咖喱豬扒～ 今日試下另外呢樣－滑蛋豬扒丼～   一樣美味！ おいしい!

食完嘢，著返ski之前，影吓Yuki對ski先～  

呢對就係Yuki嘅ski嘞～ 每對ski都會寫上你嘅名／房號／size~

呢幾日以嚟，如果坐二人lift (pair lift)的話都係Daddy同Yuki坐㗎～   Yuki好奄尖㗎～  上lift企得太埋掂到佢唔得～ 上到lift支pole掂到佢又唔得～ 落lift挨到佢又唔得～  

不過都係難得可以有咁多時間可以俾Daddy同Yuki咁樣排排坐～ 因為平時揸車都係Daddy揸，Yuki同Mommy坐後面㗎咋～  Yuki被迫拍合照! say 'Cheese!'

坐lift望住呢啲美景，兼且到咗最後呢一日，愈嚟愈唔捨得添！ 

玩下～ 滑下～  太陽開始西下添喇～

我哋要準備回程喇～  田代滑雪場！ 我哋會再返嚟㗎～

將近三點，尾班Dragondola嘅時間～ 返嚟搭Dragondola呢度見到居然排哂長龍呀！ 好誇張～

坐Dragondola 返到嚟苗場～ 除低雪具之前再嚟多一張自拍合照喇！  任務完成～

今晚最後呢餐晚餐，我哋要食哂剩低啲coupon～ 所以要食得豪啲～  揀咗間食韓式燒烤嘅～

Yuki未開始食之前，好雀躍咁拎住部iPad同大家展示佢今日滑紅色地帶嘅片呀！

呢餐有好豐富嘅和牛同豬肉，新鮮蔬菜！  我哋仲叫咗幾支紅酒添！

最後埋單用哂所有剩低價值六萬円嘅coupon～   

我哋一路傾計，一路飲，一路回味呢五日嘅旅程！ 最後傾到人哋餐廳要閂門先捨得走！  

HAPPY!  HAPPY!

嗱！呢三張就係陪咗我哋五日嘅滑雪劵喇～  有咗佢可以去哂苗場同田代兩邊～  

經過今次呢五日發熱級滑雪之旅，我哋終於都算係可以叫做識得滑雪喇～  Yuki更加係犀利添喇，可以滑紅色嘞～

雖然身體已經好疲倦，但係今晚仲要執拾所有行李，準備聽朝一早要check-out返香港喇～

日本新潟苗場七天滑雪之旅(12月28日)

好嘢！太陽伯伯返嚟喇～

第四日起身，見到嘅係藍天白雲！　啲咁清嘅天空，喺香港真係唔知幾耐未見過呀！

爭取時間快啲搭lift上去睇下有無得搭Dragondola過田代果邊先！

但係上到去先發覺原來今日都係太大風，運休呀！　唯有滑返落嚟先算喇～　　

四號館對出有好多學滑雪嘅學生～　呢度有條專俾學滑雪學生用嘅自動運輸帶～　唔使自己行得咁辛苦㗎～

如果上年韓國學果度都有就好喇～　今年就唔使lu~ 　Yuki宜家搭lift都唔知搭得幾自在～

由於今日Michael叔叔佢哋會滑紅色地帶，所以我哋要分頭玩嘞～ 　

但係我哋尋日已經滑過苗場呢邊主要嘅綠色地帶，今日又再滑好似悶咗啲喎～

Daddy知道無Dragondola都可以搭穿梭巴士去田代果邊～　不過啲穿梭巴士唔係太密，拎個時刻表出嚟睇果陣十一點，下一班要十二點～　為咗爭取時間過到果邊即刻滑雪，所以我哋先喺四號館嘅Edelweiss西餐廳食個early lunch先！

呢度啲pizza好得意～　我哋叫咗呢個不規則形狀，有薯仔同香腸做配料～

另外叫咗個Mommy同Yuki都喜愛嘅人氣甜品～

食得咁上下，時間就到喇～　四號館外面就係等巴士嘅地方～　

呢個牌就係穿梭巴士會行經嘅地方嘞～　總共四個站～　我哋搭一個站由苗場去田代啫～　有苗場滑雪券可以免費乘搭㗎～

巴士好準時十一點五十五分到咗喇～　

外面有幾凍呢？　睇下架巴士個泵把啲雪同埋車牌下面果啲冰條可以想像得到！

車程廿分鐘嚟到田代吊車站～　

呢個吊車站坐果架吊車好勁㗎，可以裝到１００人以上～

就係埋緊站呢架喇～　呢條吊車線應該就係１９６０年開始運作㗎喇～　即係早兩日影果盒咖喱果度囉～

坐呢架吊車又可以欣賞到田代區山脈另一種風景～

我哋三個自己滑，都係滑返啲輕鬆簡單嘅綠色地帶喇～

滑滑下，啲雲愈嚟愈厚～　我哋滑到三點左右，開始落雪添～

喺排隊等吊車嘅時間，啲雪愈落愈大啦～

所以一剎那間，好多人都嚟排隊諗住搭吊車走喇～　睇下，真係塞到好多人㗎～

呢晚係苗場尾二嘅一晚，我哋繼續根據我哋一早諗好嘅美食地圖掃到嚟「天八」～

因為早幾晚就算約六點食晚飯都要等位，今晚我哋有咁早得咁早！　五點半落嚟霸位～

呢度嘅餐主打shabu shabu～　另外有吉列串燒～

Shabu Shabu啲牛肉好好味！

配埋日本清酒俾啲大人飲，大家食得好滿足呀～

唔好以為食完飯今日嘅節目就完結呀！　因為我哋咁早食飯，食完仲好早咋～　大家約好夜啲再會合，宜家先shopping嘅去shopping，要買手信嘅去買手信！

Mommy就帶咗Yuki去扮靚靚嘞～　咦？揀咩呢？　貼紙？

係去做美甲呀～　Yuki恨咗好耐㗎喇～　上次去布吉已經想做嘅喇～

姐姐好細心幫Yuki畫緊隻手指公喎～

登登！　左手畫雪花～　右手貼閃石！

同美甲師姐姐合照先～　ありがとうございました！

到咗今晚最後一個節目嘞，夜晚九點十五分嘅煙花大會～

Yuki第一次咁近距離睇煙花㗎咋～　幾興奮！

為大家配上今年雪場主題曲(Winter Dream) 嘅煙花片段～