特別報告！ 於Boxing Day食早餐之際，Yuki第一隻乳齒終於甩喇！
Yuki等咗好耐嘅換牙終於發生喺佢身上喇～ 因為身邊絕大部份小朋友都換咗幾隻牙，所以Yuki都等得幾心急㗎！ 恭喜你呀Yuki, 又長大啲㗎喇～
好嘞！講返我哋第二日嘅滑雪行程啦～
呢朝見天氣好好！所以我哋決定過去另外一邊叫「田代」嘅地方滑～ 我哋嘅package包哂五日嘅ski pass，苗場同田代兩邊都包㗎～
由苗場去田代有兩種方法～
一、可以搭吊車過去 （不過如果天氣唔好，吊車就會停駛）
二、可以搭穿梭巴士過去
呢日天氣好好～ 所以我哋可以搭吊車呀！ 呢個吊車又名Dragondola!
每架車坐到八個人～ 先將所有雪具插嚮車外面嘅架度～
車程足足有廿幾分鐘～ 沿途風景非常之靚～ 真係唔識滑雪都應該要坐下當觀光呀～
好快嚟到田代呢邊落車喇～ 田代相比起苗場因為佢嘅面積都幾大，好多個山頭～ 所以唔太迫人，風景又靚過苗場添～
大顆兒著返好裝備就嚮呢堆綠色地帶滑下先～
坐咗幾轉綠色斜坡嘅lift~
好幾個位置真係好靚好靚～ 喺lift上面冒住㗎相機可能半空甩手嘅危險都要影低呢啲咁靚嘅景同大家分享呀！
經過咗第一日嘅熟習之後，Yuki同Mommy嘅姿勢都好咗喎～
終於滑到嚟田代湖旁邊嘞～ 風景真係一流～ 加埋有好好嘅雪友幫我哋影全家福添呢！
不過我哋發覺原來著住對ski要影合照都有啲難度㗎～ 因為唔可以企得太埋，太埋的話互相踩住就會好易跌！ 但係見到Joyce姨姨佢哋啲合照又可以企得好埋影得好靚，仲要係喺斜路添～ 勁！
田代呢區幾個主要山頭都有餐廳～ 我哋就選擇咗下面呢間～
呢間主力食各種吉列豬扒類食品～ 呢日我哋就食一個吉列豬扒定食～
另一個㗎喱吉列豬扒飯～ Yuki就叫咗個兒童㗎喱餐～
James都好犀利喎～ 同Yuki一樣自己叫一個兒童餐食㗎～
田代呢邊綠色地帶主要喺我哋落吊車附近～ 即係下面地圖嘅左邊位置～ 其他中間同偏右地帶就主要係紅色地帶lu~
所以我哋食完晏都係繼續喺下面標示咗果幾條綠色繼續滑～
另外因為㗎Dragondola開到三點零鐘㗎咋～ 所以我哋玩到咁上下都坐返過去苗場果邊lu~
喺苗場嘅酒店大堂就有呢㗎Dragondola嘅模型，同埋有Dragondola果條Dragon添～
仲有呀！唔講都唔知～ 睇下呢包咖喱嘅懷舊包裝上幅相，先知道原來苗場呢個滑雪場喺昭和34年（1960年）就開㗎喇～ 即係有53年歷史㗎喇～ 難以想像1960年啲人滑雪係點嘅呢？
眨眼浸完溫泉又到晚餐時間嘞！呢晚我哋去咗幫襯尋日中午食烏冬果間餐廳～ 不過佢晚餐嘅主打係呢啲日式釜飯（好似我哋嘅煲仔飯）～ 味道都唔錯，但係份量真係好細下～ 用佢個小飯杓好似兩下就食哂～
Daddy喺香港已經飲開嘅Suntory Premium Malt's啤酒，呢度居然有一搾裝，仲有個特別容器裝嘅添～ 不過唔知有咩作用播～ 哈哈！
Yuki今次旅行有年齡相若嘅伴一齊玩得開心好多呢～ 雖然有時大家爭呢樣、爭果樣～ 仲要大家叫極都唔聽喎，但係無事起上嚟又糖黏豆咁～ 希望嚟緊幾日大家都係繼續玩得咁開心喇～
沒有留言:
發佈留言