2015北海道富良野滑雪之女(第三天12/30)

踏入第三日～　

今朝繼續食酒店充滿誠意嘅自助早餐～　

Yuki就依然必食至愛嘅溫泉蛋加紫菜碎撈飯～

食飽準備出發去滑雪場喇～　

今日天氣好好呀～　有藍天白雲呢～

今朝無堂上～　係自己練習下～ 可惜喺北之峰呢邊嘅Magic Carpet仲未開得～　所以我哋都係要過去太子酒店果邊尋日果條Magic Carpet～

今朝天氣真係好好～　仲俾我哋見到diamond dust～　呢啲係北海道冬天難得嘅自然奇觀～　

過去太子酒店果邊好方便～　酒店問口就有巴士搭～　但如果班次唔啱，可以叫酒店幫你叫架的士～

嘩！個天真係靚到呢～　天特別藍！雪特別白～

型格snowboard兩母女！　好型呀！

加埋Daddy都唔差吖～

喺富良野滑雪場遠望個景都好靚㗎～　離遠見到果座唔知係咩山？

滑snowboard型喺邊呢？　咪就係隨便坐地下傾下計對住個雪山都已經好型喇～

呢兩位係邊個呢？就係兩位媽咪囉～

今朝無落雪～　連個Magic carpet都唔使掃雪～　

再經過多啲練習～　Yuki嘅姿勢愈嚟愈似樣喇喎～

配埋背後嘅雪山景簡直一級棒呀～

練下練下好快就半奏喇～　午飯時間集返齊啲團友仔先～

今日午餐幫襯太子酒店呢個場果間拉麵店～　一人一款口味～

全部都咁好食～　尤其是幾塊叉燒煮得好燜好好味～　

下奏我哋兵分兩路～　Daddy Mommy同Michael叔叔自己上lift練習～　Yuki就跟Joyce姨姨同其他小朋友去玩Waku Waku Family Snowland~

用snowboard落lift完全係由零開始～　未掌握到就跌喇～

坐lift一個好處就係可以再上高啲～　景觀更好～　

那邊廂小朋友好開心咁玩緊香蕉船～　

扮揸雪上電單車～　其實有啲哥哥揸嘅～

仲有玩呢個雪上橡皮艇～　睇下Yuki笑得幾開心～　

眨下眼～　下午時段又玩完喇～　臨搭下返酒店影張合照先喇～

另外，Daddy今日臨尾跌親一下受傷，到底聽日可唔可以繼續滑呢？

呢晚嘅晚餐係無預先安排～　我哋打算搭車出去富良野火車站附近應該會多啲嘢食～　點知….

落車喺正火車站前都黑掹掹～　於是向附近比較大嘅街行下～　

行行下唔係好對路又開google map嚟睇下～　卒之行咗幾個字…

終於見到間食soba（そば）嘅餐廳－小玉家～　Yeah!

今晚食飯又多咗新團友加入喇～　就係細舅父一家三口～　佢哋又係嚟滑雪～　我哋今次係第二次同佢哋喺日本旅遊時約埋一齊食飯呀～

呢餐每人都食得好飽～　因為啲嘢食真係好豐富呀～　真係睇見啲相都仲落緊口水呢～