10大9小復活節高雄墾丁食玩遊(第二日3/27)

漢來大飯店嘅早餐喺位於頂樓(43樓)嘅餐廳食～　比起喺房裏面望得更高更遠～　

有師傅即場煎蛋、奄列、整擔仔麵～　


沙律果度有呢個成個鼎咁大嘅嘢～　唔通用嚟煮嘢嘅？

好大個窿喎～　用嚟做乜㗎？　

原來係用嚟刮芝士㗎～　哈哈！　咁大個唔知可以用幾耐呢？

Yuki飲啲奶梗係好好味嘞～　好似人哋賣廣告咁～　飲到個咀唇上面有小小白鬍子咁～

食完早餐唔使趕住出發～　因為今日會有第二批團友會合～　佢哋搭早機大概中午會到酒店～
所以我哋喺酒店黐住隔鄰嘅百貨公司商場行陣先～　

行行吓Uniqlo有眼鏡試戴～　呢位四眼妹係邊位呢？　揸住部相機喺度玩自拍～

等齊人喇！　出發～
坐的士去義大世界大約４０分鐘車程就到～　

義大世界於２０１０年開幕～　成個山頭都係義大世界同一間大學嘅範圍～

９個小朋友終於人齊喇～　６個女仔３個男仔～　

坐過山車～　Yuki千望萬望唔係第一排～　哈哈！咁橋俾我哋排到最後一排～　

呢個唔記得係玩邊個遊戲之前嘅合照～　

碰碰車好安全呀～　仲有條安全bar～　不過小朋友如果腳唔夠長就玩唔到喇～

上上到頂樓仲有一啲機動遊戲㗎～　

同Charlotte姐姐坐熱氣球呀～

呢個鞦韆有啲似早排喺ＡＩＡ嘉年華坐果款～　不過呢款無咁高咁剌激～

跟住呢款頂樓過山車Daddy都一齊玩呀～

嘩！好驚呀～

最後小朋友們玩埋個海盜船～　仲要無乜人玩俾佢哋連玩三次添呀～

六個女仔齊齊玩～　Nice pose!

木馬逃城記呀～

差不多日落喇～
去埋義大商場頂樓坐下個幸福摩天輪喇～

唔知點解喺外地睇日落零舍好睇嘅呢～

我哋同公公一齊坐摩天輪呀～　

仲有同Charlotte Edmund叔叔一齊坐一卡添呀～

嘩！好高呀～　直徑８０公尺，即係成廿幾層樓高㗎～

上到最高點喇～

雖然已經見唔到太陽～　但係個日落晚霞仍然好靚呀～

玩完義大世界我哋出發去今晚食晚飯嘅餐廳－天水玥～　
高雄市左營區曾子路105號 (文自路口)

呢間餐廳入咗門口已經見到裝煌好特別～　有好多佛像～

食嘢嘅位置仲有個超大嘅佛佗像陪你食添㗎～　中間嘅水面飄住煙幕～　好特別嘅氣氛～

Yuki同Hillary, Hannah坐埋一張枱～

Daddy Mommy同Iris姐姐同公公坐一張～　呢間餐廳係一人一鍋咁食法～

每人嘅餐可以揀選唔同種類嘅牛或豬肉～

另外仲有一盤雜錦火煱配料～　好好味～　超抵食～

值得一提係個Sukiyaki湯底係有會有棉花糖跟住先落湯㗎～　一落湯果下啲棉花糖即刻溶哂～　好得意～　睇片！

Mommy另一個台灣好朋友Ellen姐姐都專登買咗啲嘢嚟送俾我哋兼且同大家見個面呀～　謝謝你呀Ellen姐姐～

就係呢啲好好味嘅檸檬餅同埋新鮮嘅紅豆餅呀～

啲紅豆餅係Mommy最鍾意㗎喇～　啲紅豆又多又好味～