七月廿九日
第二日主打行程係長隆水上樂園～ 我哋打算趁早少少未係太多人入場玩，所以一早落酒店餐廳食早餐～
點知，今朝食早餐有人曳曳激嬲Mommy喎～ 事緣頑皮嘅Yuki食早餐時將隻羹放落杯水度～ Mommy即時警告之下，Yuki仲將隻叉都放埋入杯水度～ 結果Mommy當然嬲喇～
返上房時各有各行…
等電梯時Yuki知衰嘞～ 抱住Mommy想氹返Mommy嘞～ 好彩，Mommy好快原諒咗Yuki～
返到房快手快腳換好泳衣準備出發去水上樂園喇～
祈福酒店坐車過黎長隆袛需要幾個字車程～ 幾方便架～
一如所料，一早過到黎尚未算多人～ 入場都算順利～
呢幅相一睇就知邊個最心急想玩水喇～ 得Yuki一個著定泳衣同拖鞋，一黎到就可以落水㗎喇～
呢個水上樂園嘅設施都唔錯～ 例如locker有大有細，仲係用電子鎖匙，好似戴隻錶咁放埋locker感應器就開門～ 另外有電子錢包（防水手帶），戴住條帶場內任何消費都用得～ 用剩咗嘅錢可以走嘅時候退返錢～
不過租locker要另外俾錢㗎～
入咗場，發覺原來唔係太多樣嘢可以俾身高不足120cm嘅小朋友玩～ Yuki宜家得118cm咋～
所以我哋唯有玩下啲Yuki玩得架喇～
包括下面呢條叫Lazy River～
呢條Lazy river係要坐喺大水泡上玩先玩得嘅～ 我哋租用咗兩隻水泡～ （無錯，係要租用㗎！）
我哋出發喇～
條懶惰河，有好多淋水同噴水落嚟嘅位置，加上我哋兩隻水泡自己相互潑水，一陣間就玩到濕哂身啦～
原先以為條河幾分鐘應該玩完～ 點知玩一個圈成半個鐘以上～ 我哋唔同人嘅配搭玩咗兩次，足足玩成個幾鐘呀～
辛苦哂伯娘要追住我哋黎影呀～
原來玩Lazy river，一啲都唔lazy得㗎～
玩完再用盡呢兩個大水泡，用黎做道具俾我哋影埋合照先～
另外玩咗小型滑水梯～ 其他例如大喇叭，大滑水梯之類就要等Yuki高啲再黎玩過喇～
好快就食埋晏，再玩下玩下就到下奏四點幾喇～
一早我哋已經約好左酒店穿梭巴士嚟接我哋，離開水上樂園行幾分鐘過黎呢個巴士站等車～
玩完日頭嘅節目，準備去我哋今晚要去食飯嘅人氣店喇～
呢間唔一早訂位就無得食嘅就係「四海一家」～ 係一間食自助餐嘅餐廳～
我哋揀咗食第一段時間，所以六點就到喇～
門口仲放咗隻好似transformer嘅機械人添播～
先要係入口處俾錢先入得～ 原來生日嘅人有優惠㗎～ 生日正日嘅完全免費～ 生日月份嘅朋友可獲八打優惠～ 咁即係Yuki同Daddy兩個人都有優惠喇～ Yeah! 不過記得要帶回鄉咭証明㗎～
入到店內簡直係俾佢超大嘅空間嚇親呀～ 睇落隨時可以坐兩三千人呀～
宜家仲有卡通人物嘅主題，週圍都有好多唔同嘅公仔呀～
俾Yuki搵到佢嘅favorite～ Belle(貝兒公主)呀～
仲有加菲貓～ 咦，其實宜家嘅小朋友知唔知加菲貓係乜嘅呢？
食得咁上下，Yuki話要搵家姐喎～ 佢哋喺度做乜呢？ 好似寫大字咁嘅？
真係寫大字呀～ 原來係用朱古力噴泉果啲朱古力黎寫左個「林」字喎～ 哈哈！
生日正日除咗免費之外，仲有多一個優惠㗎，就係有多一個免費生日蛋糕送㗎～
啱哂喇～ 呢日係Yuki正日生日呀～
Yuki, 祝你六歲生日快樂！ Happy birthday!
行出行入拎嘢食咁多次，Yuki見到兩個藍色頭髮嘅哥哥姐姐，最後仲話要同呢兩個cosplay哥哥姐姐一齊合照呀～
臨出門口仲有隻熊bear bear同胡廸㗎！
食到好飽，離開四海一家喇～ 入夜之後睇到燈光範圍內嘅建築物都係四海一家㗎～
我哋都返酒店喇～
返到酒店房，大家各自拜拜返房，聽朝見～ 之後Daddy話要過去爺爺房拎返啲報紙，得返Yuki同Mommy喺房～
十幾分鐘後，Yuki正在床上好舒服地睇緊電視際… Daddy按門鐘，Mommy去開門～
「Happy birthday to you…」
呢個係Daddy早一日已經聯絡酒店餐飲部訂好嘅生日蛋糕～ 因為要俾Yuki一個驚喜，所以一路都無同Yuki講話返房會有生日蛋糕～
Yuki~ 六歲女喇～ Daddy Mommy祝你健康成長、開心愉快咁迎接你嘅小一生活～
雖然今年嘅生日無朋友仔生日會，又無Mickey同Minnie～ 但係可以係旅行當中有我哋一班愛鍚你嘅人一日為你唱兩次生日歌，希望呢個生日會令你難忘喇～
除左預備神秘生日蛋糕，Daddy仲預備咗生日禮物添～
呢份係偷運入喼帶黎嘅禮物，Yuki之前睇反斗城本catalogue已經好鍾意㗎喇～
多謝爺爺、嫲嫲、伯伯、伯娘、家姐、哥哥，你地為Yuki帶來呢個開心嘅生日呀！
沒有留言:
發佈留言