今日我哋一早七點就出發喇～ 因為尋日訂到搭嵯峨野小火車～ 但係得返朝早八點開出嘅班次～
喺京都火車站影返張相先～
影埋日頭嘅京都塔～ 日夜景各有各靚～
我哋搭JR去到JR嵯峨嵐山站，行去隔離トロッコ嵯峨駅轉車～
喺呢個站上車有得喺火車頭影相㗎～ 仲有得借車長帽俾你戴住嚟影添～
呢架小火車沿途有好靚嘅風景～ 途經保津川～
車廂內好有風味～ 木凳同吊燈～ 另外小火車啲窗好大～ 方便大家睇風景同影相～
咦～ 條河有好多架玩激流嘅橡皮艇呀～
大約廿三四分鐘嘅車程就到達龜崗站喇～
Yuki買咗幾張Post card寄俾朋友先～
Yuki今次旅行嘅第一支軟雪糕～ 扭紋朱古力同雲尼拿～
行返去ＪＲ馬堀駅中途見到一片稻田～ Yuki同Mommy入去幻想下去咗北海道先～
今日第一個行程完畢～ 搭ＪＲ返京都上酒店稍事休息～ 再出發去食個晏先喇～
嚟到京都車站地下街～ 見呢間有人等位喎～ 自由行的話，又唔知去邊間好的話，搵間有咁上下日本人等位嘅嚟食喇～ 應該唔會太差嘅～
我哋就等呢間大阪燒專門店嘞～
師傅好忙咁同一時間造緊好多個大阪燒呀～
啲大阪燒上枱會幫你放嚮枱面塊鐵板上面繼續保溫～ 拎住鑊鏟仔整整下，好得意㗎～
一份牛扒加兩個大阪燒～ 好滿足！
食完午餐～ 我哋開始今日第二項行程～
踩單車遊京都～
租單車可以喺京都車站附近～ 通常喺酒店都有啲優惠券～ 我哋租呢間八百円租足一日～ 啲單車又新喎～ 真係超抵呀！
京都真係有好多寺～ 喺單車舖一踩出嚟隔離街已經係西本願寺嘞～
有個日本叔叔見我哋喺度影相，主動咁行埋嚟話幫我哋三個一齊影～ 真好人呀！
喺日本市區踩單車其實都好舒服同安全～ 因為好多行人路都有一邊僻出嚟做單車徑～ 同埋日本人都好習慣行人同單車一齊喺路上～
大約踩五十分鐘，嚟到清水寺下面段斜路～ 呢度就開始要落車推嘞～ 因為無單車徑，兼人多車多～
上去到停車場度，其中一角可以泊單車～ 二百円一日可以泊喺好幾個京都嘅寺～
提醒大家，喺日本單車唔可以亂咁泊㗎～ 因為如果個個都隨便泊，十架、廿架、一百架就會對大家造成困擾㗎喇～ 仲要罸錢添㗎～
泊好單車～ 行上清水寺前條斜路同日本其他大寺一樣，有好多紀念品、手信、食店～
京都其中最出名嘅係咩呢？
係嘞～ 咪就係抹茶制品囉～ 今日咁熱，踩咗成個鐘單車～
Yuki獲得抹茶軟雪糕一大支～
清水寺算係京都最出名嘅寺之一，所以好多人呀～ 睇吓啲相影出嚟人頭擁擁～
不過唔緊要！我哋可以影close-up!
影出嚟效果仲正！ Yuki已經即刻用咗嚟做佢Facebook嘅profile picture~
呢張應該會係入選Yuki ２０１６日曆最後幾強其中一張～
寫滿願望同祝福語嘅繪馬～
呢個好似鎚仔嘅唔知係咩嚟嘅呢？
呢三條水柱叫靈泉～ 又稱音羽之滝～
去飲果啲水條人龍要排好長呀～ 所以我哋遠距離影吓算喇～ 行程緊密吖嘛～
離開清水寺前嚟多張selfie～
行到熱辣辣～ 又到甜品時間～ 哈哈！ 幾大兜！
正宗嘅宇治金時～
拍影花絮！ Yuki做乜搞到隻手一條條白色呢？
因為今日好曬呀！ 所以Mommy同Yuki都要補擦防曬～
離開清水寺，我哋又踩單車向下個目的地出發～ 睇下Yuki同Mommy踩得幾開心～
Yuki enjoyed cycling in Kyoto so much!
嚟到鴨川河邊，好有日劇feel嘅場景～
有啲日本人真係落咗河度玩水㗎～
經過鴨川河之後，去咗個街市～ 其實呢度叫錦市場～
講大家都未必信～ 原來錦市場今日係４００年紀念呀～
嚟呢度最主要係要搵呢度其中一樣名物：玉子燒！
喺呢間三木鷄卵～
有大、中、小三個size～ 一場嚟到，梗係唔會淨係要個小喇～ 一個中嘅唔該！
大家如果鍾意食玉子燒嘅記住唔好錯過喇～
跟住另一名物係呢間豆乳制品～ 即係豆腐喇～
我哋最喜愛嘅當然係豆腐軟雪糕嘞～
喺Yuki後面呢間係舊式嘅日本浴堂～ 日本人叫錢湯，或湯～ 好開心呀！意外驚喜見到難得一見嘅錢湯～
之後我哋再喺河邊踩返去京都站～
嗱！啲人喺河邊會做乜嘅呢？ 其中一樣就係將啲石頭高難度咁砌高佢，好似下面呢幅相咁～ 勁嗎？
差不多五點喇～ 我哋今日踩單車遊京都非常正！ 返去還車喇～
晚餐又繼續近近哋喺京都站大樓上面嘅拉麵小路～
呢度有十間八間日本各地出名嘅拉麵店進駐～ 間間都排哂隊～ 所以隨便揀一間都應該無乜錯～ 我哋就揀咗博多一幸舍嚟等～
唔知係咪踩咗成日單車運動充足，好肚餓～
拉麵好味啲～ 炸雞嫰滑啲～ 炒飯食到一粒都唔剩～ 哈哈！
食完趁酒店連接嘅京都塔未閘門～ 快啲用酒店割引券上去睇下先～
京都塔大概有一百米高～ 即係三十幾層樓左右嘅高度～ 對大城市嚟講可以唔算高～ 但係喺京都已經係一望無際嘅高度喇～
今晚個天好清～ 睇得到好遠呀～
第二日行程好精彩～ 認識咗京都唔同方面嘅美～ 返酒店休息準備聽日去大阪喇～
沒有留言:
發佈留言