今日行程都係頗緊湊～ 因為要離開京都去大阪～ 所以都係要一早八點幾Check-out就要出發～
拎住行李隨便食個Lotteria漢堡飽早餐喇～ 呢期有特別版嘅卡樂Ｂ Cross-over漢堡呀～
嗱！真係大大片薯片喺度㗎～
Daddy尋晚喺Yodobashi買咗個迷你腳架仔～ 今朝即刻用嚟試下影合照喇～
九點幾去到大阪下榻嘅Hotel Monterey Grasmere Osaka～ 未有房，放低行李先喇～
跟住即刻再落返去搭火車往今日第一景點－即食麵博物館出發！
到達池田站～ 見到有架好趣緻嘅Volkswagen變身嘅餐車～ 專賣Crepe～
車尾揭開～ 再放埋枱凳加太陽傘就開得檔喇～
架車保養得好靚～ 立立令～
喺池田站一出嚟其實就會見到好多指示牌教你去呢個Instant Ramen發明記念館～
行五至十分鐘就會見到呢座嘢就係嘞～
入場係免費㗎～ Yuki見到咁大個杯麵落哂口水喇～
喺呢度可以話必做嘅一個指定動作就係自制杯麵喇～ ３００円一杯～
先喺自動販賣機買隻杯先～ 隻杯白雪雪，俾大家自由創作～ 果度好多顏色筆任你用㗎～
Yuki開始佢嘅創作喇～ 先將啲字填咗色先～
然後畫啲佢鍾意創作上去喇～
搞掂！畫嘅時間完全無限制～ 你鍾意畫幾耐都得～ 無人會趕你走～
Mommy無畫～ 借個杯俾佢影下相喇～ 哈哈！
唔該Yuki～ 又幫Daddy Mommy影相喇～
呢張相睇落Yuki真係大個女了～
畫完之後就排隊準備下一部份嘞～
呢度係將啲麵用呢個絞盤轉個杯將啲麵放入個杯度～
之後就選擇材料喇～ 平時食杯麵就食得多～ 啲材料原原本本咁放喺度原來係咁㗎喎～
呢度有特別版嘅雞仔魚蛋片㗎～ 裝完配料，啲職員好好咁專登將個杯口向我哋俾我哋影相㗎～
我哋兩個杯麵排隊等埋封錫紙～ 跟住包埋膠～
最後俾個吹氣袋我哋自己用泵吹漲佢就搞掂㗎喇～
臨走同偉大嘅即食麵發明家－安藤百福像合照留念喇～
第二站～ 去海遊館方向進發～
不過離開池田之前，醫埋個肚先～ 喺站附近隨便搵一間和倉餐廳～ 除咗個牛扒靭少少～ 其他嘢都好好食～
到達港區，喺地下街食陣先～ 嘩！日本原產地嘅BeardPapa呀～
Mommy又唔執輸買咗件紅豆銅鑼燒～ 兩母女真係食相都似十足呀～
海遊館旁有個大摩天輪～
高度有１１２米～ 即係都有成三十層樓高～
有個迷你腳架仔真好！
唔使下下都係得selfie大頭照～
問過Yuki去唔去海遊館～ Yuki不大興趣喎～ 反而。。。想去隔離嘅Legoland！
呢個同聖誕節去台場果個Legoland差不多～
都係有啲迷你名勝建築喇～ 大阪城～
我哋無去睇真嘅大阪城～ 睇呢個當係喇～
通天閣～ 日景～
通天閣夜景
呢座唔知係乜嘢呢？
連心齋橋－蟹道樂都有呀～
呢個砌Lego塊板幾好玩～ 個底座可以控制搖晃力度～ 模礙地震咁～ 睇下小朋友砌高果個Lego會唔會冧～
離開Legoland～ 我哋真係去心齋橋喇～
我哋搵咗間食大阪串炸嘅老店～ 元祖串かつ だるま
嘩！昭和四年創業～ 即係八十五年前呀～
呢間新店好先進㗎～ 每張枱有個Touch screen落單～
啲串炸做好就會有架子彈火車送到你張枱度停低～
啲侍應會幫你將啲串炸放喺我哋枱上個暖盤度，慢慢食～
食串炸必須提醒大家一個好重要嘅規矩～ 就係點個盤汁嘅時候，袛可以食之前點一次～ 唔好食完一啖又再放入去點呀～
倉飽串炸再喺心齋橋行下街喇～
固力果招牌當然要影喇～
又同大家回憶下Yuki上次嚟同固力果招牌影相已經係２００８年嘅事喇～
http://yuki-lam.blogspot.hk/2008/08/2008_4288.html
係咪好可愛呢?
相隔七年～ Yuki大個咗～ Mommy靚咗～
本來都想食返餐蟹道樂回憶下Yuki兩歳果陣嚟食過～ 不過無預約，真係完全唔使諗有得食～
最後再掃下街先～
好好味咁嘅Waffle~
士多啤梨味同朱古力味～ 好貼心嘅設計～ 用雪條棍拮住嚟食～ 唔使食到成手都係～
跟住到Daddy掃街～ 嚟到大阪無理由唔食章魚燒㗎嘛～
行咗陣見幾檔都收檔～ 正有少少失望之際～ 居然見到呢檔長龍店仲有得賣～
梅田Walker第一位呀～
睇下果排整章魚燒嘅盤幾勁～
睇落都有啲流口水呀～
到喇～ 到喇～ 排咗十幾分鐘終於到我哋喇～
好味呀～
食飽哂～ 行完街～ 返酒店喇～
呢間酒店Mommy book咗間叫做夜景房～ 望出去又真係幾靚喎～
Good night!
沒有留言:
發佈留言