今日節目精彩喇～
我哋今日會去大阪環球影城（Universal Studio）～
因為之前喺香港果陣買唔到Express Pass，所以希望早啲去到等一開門可以買到喇～
搭去環球影城嘅列車成個車身都佈置咗環球影城嘅卡通人物㗎～
好可惜地～ 當我哋去到入口處，已見到人頭擁擁～ 雖然仲有成十幾分鐘先正式開門～ 但係已經開始俾遊人進場～ 而入到去幾間有Express Pass賣嘅舖頭都已經賣哂當日嘅Express Pass喇～
無辦法喇～ 我哋抱住積極樂觀兼隨遇而安嘅心態～ 有乜玩乜囉！
入場喇～
Snoopy出嚟喎～ 行緊未企定已經被大家圍住影相喇～
呢日朝早天氣陰陰地～ 不過間唔時又有少少陽光喎～
買唔到Express Pass～ 不過好彩地，都拎到Harry Potter嘅入圍整理券～ 呢個園區喺日本人裏面都係好受歡迎～ 所以都好難先入到㗎～
但係可能我哋之前無睇過Harry Potter電影喇～ 所以對個園區嘅場景佈置唔係太熟悉～
不過佢又仿落雪扮得幾似喎～
呢座喺山上面嘅建築都幾夠氣勢喎～
入咗去～ 見到有哈利波特同佢哋朋友呀～
到排隊等玩呢個過山車－鷹馬的飛行～ 因為剛剛打完風嘅關係，陣風有時仲係頗強～ 所以排隊期間都暫停過幾次～
諗住終於下一架到我哋喇～ 點知。。。
又暫停喇！
等呀等！ 等呀等！ 就係咁企係第一排等咗成半個鐘都無跡象重開～
正當我哋想離開之際～ 玩得返喇！ 好嘢～
好彩我哋無放棄啫～ 就係後面呢架鷹馬的飛行喇～
臨離開呢個園區～ 同呢架Hogwarts Express列車影張相喇～
Flying Snoopy！
Yuki宜家大個女喇～ 唔使同Daddy或Mommy坐～ 要自己一個坐一架添～
今朝咁早出嚟～ 玩得有啲肚餓添～
呢間意大利餐廳好似唔錯喎～
入面環境都好好呀～ 坐得闊落舒服～
意大利餐廳當然唔少得Pizza喇～ 另外我哋仲order左沙律同炸calamari(魷魚圈）
起動喇！
個Pizza係未切開～ 上枱俾把圓刀大家自己切～ Yuki好乖幫手切呀！
Thank you, Yuki!
食飽再去玩另一必玩項目～ Spiderman!
一人一幅立體眼鏡先～
後面果架就係我哋會坐嘅採訪車喇～
坐完喇～ 真係非常好玩～ 同新加坡嘅Transformer類似，一樣咁好玩～
行下坐下～
又口痕痕添～ 仲要聞得有好香嘅煙薰火雞肶呀～ 幾大隻！
再加埋一個軟雪糕～ Wow!
跟住行到嚟Hello Kitty世界嘞～ Yuki同Mommy嘅pose幾型！
入到去有展覽咗好多Hello Kitty不同嘅裙、手袋、鞋～
有啲仲可以俾你行埋去拼下添～
入面有啲哥哥姐姐歡迎大家搵佢啲幫忙影相㗎～
Yuki旁邊隻高踭鞋幾大隻～ 哈哈！ 其實係滑梯嚟㗎～
最後一個環係同Hello Kitty會面～
佢同Yuki打招呼仲好親切擁抱添！
Yuki幾咁開心！
一齊同Hello Kitty合照～ 大家都變得可愛呢～
Yuki後面呢個Moppy原來係Elmo嘅朋友嚟㗎～ 不過以前睇芝蔴街好似未有呢佪朋友喎～
搵吓有啲乜嘢少啲人排隊嘅先～ 吖！呢個小朋友揸車嘅少人喎～
點知！ 突然下起大雨呀～ 仲真係好大果隻～ 啲小朋友們嘅家長紛紛拎啲雨褸過嚟～
落咗十分鐘左右，終於都停喇～
Yuki亦都落場喇！
車速當然唔會好快喇～ 不過Yuki睇落都揸得好開心咁吖～
臨玩完仲泊到埋最近出口先停添～
之後再排隊玩另外一樣～
排排下又落雨喇～ 今次仲勁～ 連Daddy Mommy都要擔遮加雨褸呀～
最後玩多樣機動遊戲都落住大雨～ 我哋直頭都費事開遮喇～ 由得佢濕喇～ 同埋原來落雨反而唔使停遊戲～ 大風反而可能會停喎～
臨走經過shop～ Yuki送兩個四眼妹look俾大家～
今日呢個環球影城之旅就係大雨中完結嘞～
沒有留言:
發佈留言