首次入廠~

Yuki呢個星期斷斷續續咳下好下～ 近禮拜尾又咳多左～

尋晚訓到四點幾又醒左係度喊～ Mommy摸落覺得Yuki有Ｄ熱，於是叫Daddy幫Yuki探熱～ 差不多１０２度～ 於是即刻俾Ｄ退燒藥同退熱貼Yuki，跟住再瞓過～

到朝早六點左右再幫Yuki探熱，都仲有１０２～ Mommy同Daddy商量後決定同Yuki入急症睇睇～

我地去到都仲係六點幾，要等姑娘CALL醫生番黎～ Yuki由睡眼惺忪到七點零醫生到既時候已經醒哂，仲要Daddy抱住佢周圍行～

醫生詳細檢查後，話無乜喉嚨發炎，扁桃線無乜腫，不過左邊肺有Ｄ聲，所以建議照一照Ｘ－ＲＡＹ睇一睇個肺～

好快趣照完肺片俾番醫生睇，醫生話Ｘ－ＲＡＹ見到有少少花，以策安全建議我地俾Yuki留院觀察下～

就係咁～ Yuki就第一次要入廠喇～ 估唔到Yuki讀既幼稚園會讀Daddy細個讀過果間，連入廠都係入Daddy細過入過去割盲腸既同一間醫院～

跟住上到房，相信如果其他Daddy Mommy有試過囝囝囡囡入過院，都知道跟住會發生一樣父母最心痛既野－－就係入姑娘房落「豆」同「上水」，因為佢地唔俾父母入內，我地只可以隔住度門聽到Yuki既嚎哭～ 呢種喊聲真係原來只有成為左父母之後先會咁深切感受到～ 心痛加肉痛！

燈～燈～燈～凳～ 經過一輪折騰，Yuki出番黎當然繼續喊左一輪，不過不消一會就開始俾Ｄ玩具吸引住喇～

Yuki～ 單手渣車好危險架～

 

大家唔好以為Yuki咁勤力埋枱做野呀～ Yuki其實係去呢張化粧枱make up咋～

轉轉折折今日燒下退下，好彩入夜之後就退番到３８／３７度幾～

Yuki你要乖乖地多Ｄ休息，快Ｄ好番呀～ 好快可以出院番屋企架啦～

Daddy、Mommy同Yuki係呢度要好多謝今日知道Yuki入院既消息即刻好有心咁黎探Yuki既長輩們：多謝～ 爺爺／麻麻／舅公／表叔／叔公／叔婆／大姑姐／細姑姐／伯伯／伯娘／Siti姐姐／仲有經視像電話既 家姐／Boy哥哥～ 仲有經電話向麻麻問候既咁多位～ 代Yuki感謝咁多位對佢既關懷呢～