日本東北之旅:青森>八戶 (8月7日)

黎到行程既第四日，過左一半喇～

今朝我地去左尋日唔夠時間去既青森蘋果公園～

我地都已經十點前去到架喇，但係咁早都係好曬好熱呀～

門口呢個銅像係一個女孩子好用力咁拎住一大籮蘋果～Yuki快Ｄ學佢咁既姿勢同表情影相先～

行上觀景台～ 嘩！遠眺有輕津富士之稱既岩木山～ 因為佢真係好似富士山架～ 另外大家都係火山黎架喎～

用岩木山做背景，笑容一致既全家福～

快Ｄ入返去有冷氣既地方～ 又黎食軟雪糕喇～ 係呢度梗係要食蘋果味既雪糕喇～

實在太熱喇～ 我地都係出發往下一個目的地：奧入瀨溪流

去到差唔多時候係午餐時間～

無錯！又係冷麵～ 不過呢個係燒牛肩肉跟冷麵～

Daddy就要左個中華冷麵（冷やし中華）

有無發現Yuki換左條裙呢？ 因為Yuki係車程中途忽然吽吽地～又唔出聲～ 跟住突然嘔左出黎！

所以唯有換左條裙喇～ Daddy Mommy估計可能係青森往奧入瀨溪流既山路好多彎～ 轉到Yuki暈暈地所以嘔喇～ 不過嘔完Yuki又完全回復生猛喇～

奧入瀨溪流係由十和田湖流出黎既一條河～ 成個奧入瀨溪流長十四公里，所以沿途可以有好多地方落車去睇同影相～

呢個瀑布叫做：雲井の滝

因為個瀑布縮左入一堆好高既樹林入面，所以好涼快～ 又黎一個全家福先～

再開左一輪車～ 終於上到十和田湖喇～ 唔講真係會以為呢度係海邊～ 因為個湖真係好大呀～ 佢係全日本第三大既湖黎架～

個湖有遊覽船可以坐去幾個唔同既上落點～ 不過呢Ｄ要俾錢既項目我地都係pass喇～

 

繼續往下一站～ 就係去八戶蕪島睇日落～

蕪島其實並唔係一個島，袛係一個伸出海邊既半島，果度仲有個神社～ 叫做蕪嶋神社～

呢個神社有好多，好多，係好多既海鷗呀～ 樓梯最底下有Ｄ傘俾人拎黎行上去上面既神社～ 知唔知點解呀？ 梗係唔係遮太陽或者雨喇～ 係俾你遮住以免俾Ｄ海鷗Poo Poo擊中呀～

好喇～ 準備迎接日落喇～

等到悶悶地～ Yuki施展樹熊式熊抱拑住Mommy～

等到喇～ 日落下的全家福～ 影得好靚呀～

今次旅行好多謝忠記叔叔幫我地影左唔少全家福呀～

入夜又到食野時間～ 今晚我地去左八戶屋台村食屋台食品～

屋台村係由好多唔同既舖頭組合而成～ 唔同舖頭有唔同既特色～ 一般都係由傍晚先開，營業至翌日清晨～

我地揀左間單邊比較闊落既一間坐低～

先黎一個燒帶子～

跟住有炸雞～

炸魷魚鬚～

呢個好似冷麵既其實係魷魚剌身黎架～ 八戶出名海產嘛～ 佢又真係好似食冷麵咁點豉油咁食架～

中間仲有Ｄ燒魚呀，薯條等等～ 食完係時候返酒店休息啦～

呢間酒店好得意～ 間房可以瞓到三個人～ 之不過唔係三張單人床～ 而係一張雙人床，另外一張碌架床～ 張碌架床仲要係橫置於床頭上面～ 真係地盡其用呀～

Good night! お休み～