日本東北之旅: 八戶>花卷 (8月8日)

又係一個天朗氣清既一天～ 我地再一次往海邊出發～ 我地去左尋日蕪島附近既種差海岸～ 果度望出去就係太平洋～

下面個海灘仲有人係度游水添喎～

Yuki都好想落去游水，但係Daddy Mommy都無準備泳衣，邊有得游呢？ 所以Yuki就係度嘟咀嬲爆爆囉～

不過好快就無野喇～ 仲同Daddy玩騎膊馬影相添～

Daddy見Yuki無再曳，就俾Yuki落去沙灘行一行喇～

午餐我地原本打算食八戶市場既七厘村炭燒海鮮架～ 不過可能係星期日喇，人多到要等成個半鐘呀～ 無辦法喇～

唯有搵市場內其他既食店喇～ Yuki，又有榻榻米位播～

係～ 又係冷麵（Yuki食既）跟三件壽司(Daddy食既)～

帶子海膽飯(Mommy食既)~

淨海膽飯(Daddy食既)~

食完美味既海產料理，我地再出發去今日既主要景點：小岩井農場～

「Yuki！ 你拎住張地圖識唔識睇架？」

因為口蹄病既關係，本來諗住黎睇渣牛奶同剃羊毛表演都無得睇呀～

淨係得返騎馬仔，不過Yuki唔敢騎呀～

另外都叫做有少少羊既踪影既，不過係離得好遠好遠咁囉～

既然無乜動物，咁玩下其他野喇～

日本呢Ｄ地方既玩樂設施，好多野都係用木造架～

包括：木屋中的滑梯

木製韆鞦～

麻縄加黃波波韆鞦

木製八人搖搖板

玩完咁多野，要洗個面先喇～ Yuki好專心咁睇住Daddy開水喉～ 嘩！噴得好勁呀～

 

Yuki:「我又要試！」

自從Daddy教過Yuki潛個頭落水，咁樣噴水落塊面濕濕碎喇～

 

自己玩得唔知幾開心～ 唔使Daddy Mommy幫手架～

臨離開農場之際落起一陣好大既雨，我地唯有係賣手信既舖頭入面行下先喇～ 過幾個字停雨喇～ 我地去停車場時居然見到彩虹呀！

唔係電腦效果黎架～ 真係好大條彩虹呀！

今晚我地入住全個旅程Yuki最期待既一間酒店，就係温泉酒店喇～ 原因有三：１）有日式浴衣著；２）有榻榻米瞓－可以轆黎轆去；３）有得浸温泉囉～

呢個就係頭先農場避雨時買既芝士蛋糕，因為無雪柜，即刻食左佢先～

換上浴衣既Yuki即刻好斯文咁喎～

溫泉酒店既晚餐係自助餐～ 食完我地拎左Daddy買俾Yuki一齊玩既花火（煙花）出酒店停車場玩～

雖然上次Yuki兩歲果陣係美瑛玩第一次煙花試過少少辣親，不過完全無損今次玩既興趣喎～

睇下，Yuki最大膽企最前架～ Daddy縮係最後喎～ 嘻嘻～

因為個貸切風呂今晚已經俾人預約哂，所以今晚要分開去男女分開既大浴場～ 我地book左聽朝再浸個貸切風呂～ 聽日再影俾大家睇下啦～

所以要早Ｄ瞓喇～