日本東北之旅: 香港>仙台（8月4日）

我地再次出發去日本旅行喇～

今次既目的地係嚮往已久既日本東北，我地會去仙台、秋田、角館、弘前、青森、八戶、松島。

我地搭ANA既航班先飛東京，然後再轉內陸機到仙台～

七點幾出門口，到機場食過早餐，準備上機喇～

仲有呀，今次我地既旅行仲有Daddy既朋友忠記叔叔同佢女朋友一齊架～

經過四五個鐘既機程，到左東京成田機場，等轉機既時候搵Ｄ野食下先～ 咦，麥當奴有Ｄ香港無既野食喎，呢個叫Aurora既飽係雞肉飽黎架～ 不過日本既麥當奴比香港都貴幾多架～ 成六七百円一個餐，宜家即係成六十蚊港紙架喇～

準備再上機去仙台喇～

咦～ 點解架飛機有個風車嚮對機翼度既？ 吓！ 唔係風車呀？ 呢個原來叫螺旋槳飛機呀～ 估唔到日本航空公司都仲會用呢種飛機喎～

坐正機翼隔離，清楚影到個螺旋槳同海岸線～ Good!

到左仙台落機喇～ 另一個特別之處係呢架機係要嚮出面停機坪落機跟住行入去座大樓架～

攞左行李，嚮機場既租車公司拎左Daddy Mommy之前嚮香港租定既車就即刻出發往酒店喇～ 我地住仙台呢間酒店好新架，８月１日先開張咋～

呢個行李箱之前我衹可以幫Mommy一齊推，今次我自己一個都搞得掂喇～

 

Check-in好就出去火車站行下，搵野食喇～ 成個仙台都好多七夕祭既佈置，就係後面呢Ｄ七彩波波，下面有好多彩條～

另外呢個就用紅白色為主～

仙台最出名食既野係牛舌，估唔到連百力滋都有牛舌味道～ 都唔平架～ 要成一千円一盒架～

快Ｄ排隊等位喇～ 呢間餐廳都幾多人架～ 一個炭火燒牛舌成差不多二千円架～ 一於叫呢個喇～

黎喇～無論賣相同味道都好好呀～ 估唔到原來牛舌都可以整得咁好味喎～

食完晚飯我地就返酒店早Ｄ休息準備翌日既行程喇～