獅城之旅: Universal Studios (Apr 18)

天氣預報話今日可能落雨～ 希望唔好落雨喇～

天氣點控制唔到～ 點都好，開心高興咁食左早餐先算喇～ 黎到第三日先記得俾大家睇下食早餐既地方～

環球片場位於聖淘沙～ 宜家去聖淘沙比起以前方便好多喇～ 以前Daddy Mommy黎新加坡果次，係要搭纜車去聖淘沙島架～ 咁宜家可以點呢? 搭MRT去HarbourFront站，跟住轉Sentosa Express單軌列車一個站就到WaterFront站～ 由Clark Quay站出發，半個鐘就去到環球片場～

呢個購票站其實亦係一個商場－VivoCity～

到左環球片場入口喇～ 估唔到聖淘沙可以變左咁多～

環球片場對Yuki黎講相對比較陌生～ 因為Ｄ卡通人物比較少見～

好彩，一入門口見到個識既－－功夫熊貓～ Yuki仲有隻麥當奴開心樂園餐換既功夫熊貓公仔架～ 睇下Yuki捉實熊貓隻手幾肉緊!

旋轉木馬變成全部馬達加斯加既動物們～ Yuki揀左最高果隻長頸鹿～

咦咦咦～ 史力加呀～ 原來Yuki都識佢喎，明明Daddy Mommy都無同Yuki睇過～ Yuki仲知同史力加一齊果個女仔係公主黎添呀～  唔好問咁多住喇，同佢地影左相先～

問返Yuki原來佢係同Ｄ同學仔傾計中知道史力加架～

仲知道後面呢座係費安娜公主既城堡添喎～

進入朱儸紀世界～ 好刺激既遊戲～ 我地就玩到由頭濕到落腳喇～ 如果認真諗住去玩既朋友，奉勸你地一係自己帶雨褸，一係就用兩蚊坡紙買件雨褸喇～ 如果唔係就會好似我地咁～ 好彩Ｄ相機收得好咋～

跟住玩呢個看似恐怖既翼龍～ 其實唔驚架～ 基本上同迪士尼既小飛象一樣咋～

好彩天公造美，一路都無落雨，仲好好太陽添呀～ 好曬呀～

黎到古埃及區，有Ｄ好宏偉既建築～

呢兩隻巨人足足有五六層樓咁高～ 入面係玩室內過山車既，Yuki未夠高，唔使諗～ 不過Yuki今次都玩左佢出世以來第一次既過山車，因為呢度有另一個俾小朋友玩既小童過山車～ 高過92cm就玩得架喇～ Yuki玩左兩次添～

呀～ 呢Ｄ企鵝唔知係邊套戲既呢?  (乜Yuki宜家同Ｄ公仔影親相都咁肉緊既?)

Waterworld有好精彩同好笑既表演～ 想濕身可以坐藍色座位，好大機會你可以由頭濕到腳～

特別版咖啡杯～ 好高呀～ 小朋友坐入去都睇唔到出黎咁滯～

Yuki～ 頒個奧斯卡金像獎－Best Friend獎俾你喇～

玩左八個鐘～ 盡興而回呀～

諗住食埋晚飯先返酒店喇～ 今晚黎呢個肉骨茶名店－發起人～ 據講呢度好多明星黎幫襯，隨時要等一頭半個鐘～ 問題黎喇～ 如果係父母既可能知道會發生乜野事～ 同一個由朝玩到晚，又無瞓過晏覺既四歲幾小朋友… 會點呢?

登登～ 扭眼瞓啦～ 喊哂口～ 結果肉骨茶都未黎就伏係Mommy度瞓左喇～

噢～ 好味既肉骨茶黎喇～ 可惜Yuki一Ｄ都食唔到囉～ 睇黎下次去旅行都要安排Ｄ午睡時間俾Yuki先得～

兩個主要行程都玩過～ 聽日傍晚就要返香港喇～