家族之旅（長隆三日遊）第一日

七月廿八日

距離上次我哋一家一齊去旅行轉眼原來已經係四年前喇～ 當年嘅<<新春大旅行>>去咗海泉灣～

今次我哋選擇咗去番禺嘅長隆作為今次旅行嘅重點～

出發日一早０７：２０搭巴士向祈福進發～

我哋第一次嚮深圳灣口岸過境，呢個口岸都幾大喎～

由口岸開車再經過兩個多小時嘅車程就嚟到我哋今次住宿嘅祈福酒店喇～

我哋無揀住長隆酒店，因為暑假旺季附加費實在爭太遠喇～ 房租比平日貴咗成６０％～

祈福酒店平啲，附近又多嘢食～ 住得過！

那邊廂趁大人辦緊入住手續，這邊廂Yuki就同家姐同Boy哥哥玩得好高興～ 笑得幾咁燦爛～

叫得做家族之旅梗係唔少得爺爺嫲嫲喇～ 今次我哋一行九人～ 有爺爺、嫲嫲、伯伯、伯娘、家姐、Boy哥哥、Daddy、Mommy同Yuki～

Yuki其實已經講咗好耐要一齊嚟長隆旅行一次～ 今次終於可以趁暑假遷就到大家都可以攞一日假嚟玩足三日～

可惜我哋１１點幾咁早嚟到酒店未有房間俾我哋，佢哋話１點左右先有房，所以我哋袛好搵啲嘢做吓先喇～

今朝咁早食早餐，所以差唔多十二點不如食個晏先喇～

行咗過隔離嘅祈福食街，每間餐廳都有一個以上嘅姐姐好落力地叫你入去幫襯～ 所以由食街頭行到街尾之後，發覺耳仔已經俾佢哋嘅叫賣聲整到有少少耳鳴～

最後我哋決定遵從揀餐廳第一大原則：揀最多人幫襯果間喇！

由於午飯時間未正式開始，所以都仲搵到張大枱坐下～ 先嚟一搾西瓜汁俾Yuki佢哋三姐弟妹分～ 大家都有齊嘢飲就嚟飲杯先喇～ 「飲杯！」

上到嚟嘅第一餐，雖然係午飯，不過睇見個餐牌好多嘢都想食～ 結果叫到好似食晚飯咁～ 哈哈！

呢餐最驚喜係果碟煎釀豆腐～ 外脆就唔在講，內裏軟兼滑，仲好有黃豆香～ 係香港食唔到嘅豆腐質素～ 好食～

食飽行返酒店睇下有房未～ 中途見到有架私家車，車尾貼有以下抵死字句：越催越慢，再催熄火～ 哈哈，好正呀～

 

酒店未有齊四間房，只有一間房俾咗我哋先～ 唔好浪費時間，我哋放低行李就出去喇～

因為見到今日天氣尚好，無落雨，唔係太曬～ 我哋作咗個正確嘅決定，就係第一日先遊野生動物園～ 因為根據天氣預報，之後嘅兩日只會愈黎愈熱，行動物園隨時會中暑㗎～

好在酒店有穿梭巴士接載我哋到長隆動物園入口～

呢個動物園比起以前我哋嚟過嘅夜間動物園爭好遠～

同樣係坐小火車遊覽，但係呢度多好多好多動物睇～

仲要好多係以前我哋都未見過㗎～ 真係大間眼界～

除咗坐小火車遊覽，當然仲可以步行遊覽其他嘅步行觀賞區喇～

行下，睇下，休息下～

仲可以有Boy哥哥同家姐請食香腸添喎～ 為食Yuki有零食就最開心喇～

宜家暑假仲有多個新主題區「恐龍動起來了」～

咦？有兩隻喺樹林入面呀！

Yu…ki… be quiet! 有恐龍呀！ Don’t panic!

玩左接近四個鐘，係時候走喇～ 離開時係動物園門口有幾隻公仔同遊客講拜拜同影相～

呢晚嘅晚餐我哋去祈福新村附近一間Mommy朋友介紹嘅餐廳－－「南崗漁港」

晚霞伴美食～

 

好大嘅餐廳呀～ 兩層高成個建築物都係間餐廳嚟嘅～

 

帶子、扣肉、豬手、手撕雞、煲仔飯～ 一餐飽過一餐～ 好滿足呀～

食飽後，步行１５至２０分鐘返酒店～

稍為休息，趁泳池未關門，我哋仲落去泳池游咗一陣夜水添～

明日主打：水上樂園～